Isaiah 61
Къуртулыш акъкъында хайырлы хабер
1 aУстюмде РАББИ-ТААЛЯнынъ Руху булуна;РАББИ мени ягънен сюртип,
алчакъгонъюллилерге хайырлы хабер этмеге чагъырды,
юреклери къырылгъанларгъа шифа бермеге,
эсирлерге – азатлыкъ акъкъында,
зинданда яткъанларгъа – къуртулыш акъкъында айтмагъа,
2 bРАББИнинъ разылыгъы йылыны
ве Алламызнынъ джеза кунюни беян этмеге,
эписи агълагъанларнынъ гонъюллерини алмагъа,
3 cСионда къасеветленгенлерге куль ерине – сарыкъны,
агълав ерине – къуванч ягъыны,
тюшкен рух ерине – аджайип макътав урбасыны бермеге ёллады.
Оларгъа: «Догърулыкъ эменлери,
Озь шурети ичюн РАББИнинъ сачкъанлары», – дейджеклер.
4 dЧокътан йыкъылгъан шеэрлерни янъыдан къураджакълар,
эски заманларда къырылгъан ерлерни тиклейджеклер,
къадимий несиллерден бошап къалгъан шеэрлерни
янъыдан къураджакълар.
5Ябанджылар келип, къой-эчкилеринъизни бакъаджакълар,
ябанджыларнынъ огъуллары топрагъынъызны ишлейджеклер,
юзюмликлеринъизде чалышаджакълар.
6 eСизлерге «РАББИнинъ руханийлери» дейджеклер,
«Алланынъ хызметчилери» деп адланаджакъсынъыз.
Халкъларнынъ байлыгъыны къулланаджакъсынъыз,
оларнынъ шурети сизинъки оладжакъ.
7 fМасхаралыгъынъыз ичюн эки къат аладжакъсынъыз.
Ашалангъаны ичюн къысметине къуванаджакълар,
озь топрагъында эки къат мульк аладжакълар,
шенълиги сонъсуз оладжакъ.
8 gМен, РАББИ, адалетни севем,
чайпавнен зорбалыкъны корьмеге истемейим,
мукяфатларыны акълылыкънен береджегим,
оларгъа эбедий васиетни береджегим.
9 hМиллетлер арасында оларнынъ балаларыны биледжеклер,
халкъларнынъ арасында эвлятлары намлы оладжакълар.
Оларны корьген эр кес биледжеклер ки,
олар – РАББИнинъ багъышлагъан эвлятларыдыр.
10 iРАББИде буюк къуванч тападжагъым,
Аллам ичюн джаным шенъленеджек.
О манъа къуртулыш урбаларыны,
инсафлыкъ урбасыны кийдирди.
Киевге, руханийге киби, башыма сарыкъ къойды,
бир келинни киби, ильванларнен безетти.
11Топракъ осюмликлерни насыл осьтюрсе,
багъча сачылгъаныны насыл етиштирсе,
РАББИ-ТААЛЯ да бутюн миллетлернинъ огюнде
догърулыгъыны ве шуретини косьтереджек.
Copyright information for
CrhCTB