Isaiah 62
Азиз халкъ акъкъында
1Догърулыгъы ярыкъ киби корюнмегендже,къуртулышы янгъан къандиль киби олмагъандже,
Сионнынъ файдасы ичюн сусып отурмайджагъым,
Ерусалим ичюн тынчланмайджагъым.
2 aХалкълар сенинъ догърулыгъынъны кореджеклер,
эписи падишалар Шуретинъе бакъаджакълар,
РАББИ Озю береджек янъы бир аднен сени адлайджакълар.
3 bРАББИнинъ къолунда дюльбер тадж киби оладжакъсынъ,
Алланънынъ элинде падишанынъ сарыгъы киби булунаджакъсынъ.
4 cЭндиден сонъ санъа «къувулгъан» демейджеклер,
топрагъынъа «харап этильген» айтмайджакълар,
бунынъ ерине санъа «севимли»,
топрагъынъа «эвли» дениледжек.
Сеннен РАББИнинъ разылыгъы оладжакъ,
топрагъынъ акъайсыз олмайджакъ.
5 dОгълан къызгъа эвленген дайын,
огъулларынъ да санъа ойле эвленеджек.
Киев келинге насыл къуванса,
Алланъ да санъа ойле къуванаджакъ.
6Эй, Ерусалим, диварларынъда къаравулларны къойдым,
гедже-куньдюз ич сусмайджакълар.
Эй, РАББИни акъылда туткъанлар!
Сусманъыз!
7Ерусалимни гъайрыдан тиклеп,
шеэрни ер юзюнде намлы этмегендже,
Раббининъ огюнде сусманъыз!
8 eРАББИ кучьлю онъ къолуны котерип, ант этти:
– Бир даа душманларынъ богъдайынъны ашамайджакъ,
ябанджыларнынъ огъуллары
сен япкъан тазе шарабынъны ичмейджеклер.
9Отьмекни богъдайны топлагъанлар ашайджакъ,
шарапны юзюмни джыйгъанлар ичеджек
ве Мукъаддес Еримнинъ азбарында РАББИни шуретлейджек.
10 fКечинъиз, араба къапуларындан кечинъиз,
халкънынъ ёлуны ачынъыз!
Джыйыштырынъыз, темизленъиз, ёлны тегизленъиз,
ташларыны джыйынъыз,
халкълар ичюн байракъны котеринъиз!
11 gМына, РАББИ ер юзюнинъ кенарларына илян эте:
– Сион къызына:
«Мына, Къуртарыджынъ келеята!
О, мукяфатлайджакъ, акъларыны береджек», – денъиз.
12Сион халкъына «азиз халкъ»,
«РАББИ сатын алгъан» дейджеклер,
Санъа исе «истенильген»,
«къувулмагъан шеэр» айтаджакълар.
Copyright information for
CrhCTB