‏ Isaiah 63

Джеза куню

1 ^a– Эдомдан, Боцрадан,
ачыкъ къырмызы урбаларында,
шерефли кийимлеринде,
буюк кучьнен кельген ким?
– Бу – Меним! Догърусыны айтам,
къуртамагъа кучюм бар.
2– Не ичюн урбаларынъ къырмызы?
Не ичюн кийимлеринъ юзюм баскъаннынъ кийими кибидир?

3 ^b– Юзюмни бир Озюм бастым,
халкълардан ич бири ёкъ эди янымда.
Оларны ачувнен бастым,
гъазапнен таптадым;
къанлары урбаларыма сачрады,
бутюн кийимлериме септирдим.

4 ^cДжеза кунюни тайинледим,
халкъымны сатын алып, къуртараджакъ йылы кельди.
5 ^dБакътым, ярдым этеджекни корьмедим,
къол тутаджакъ олмагъанына шаштым.
Амма кучюм Манъа енъиш берди,
гъазабым Манъа къол тутты.
6 ^eАчувнен халкъларны таптадым,
оларгъа гъазабымны тюшюрдим,
къанларыны ерге акъыздым.

Исраильге олгъан Алланынъ мерамети

7РАББИнинъ буюк севгисини акъылымда тутаджагъым,
Оны эр япкъан шейи ичюн макътайджагъым.
РАББИ бизге эр шейни берди,
исраиллилерге чокъ яхшылыкъ япты,
Онынъ шефкъаты пек буюк,
Онынъ севгиси пек кучьлюдир.
8– Олар керчектен Меним халкъым,
Мени алдатмайджакъ балаларымдыр, – деди РАББИ
ве оларнынъ Къуртарыджысы олды.
9 ^fЭр тюрлю къасеветлерини Озюне алды,
юзюнинъ Мелеги оларны къуртарды,
севгиси ве мераметинен оларны сатын алды,
къадимий заманларда оларны къолларында алып ташыды.
10 ^gАмма олар инат олып,
Онынъ Мукъаддес Рухуны ынджыттылар,
ве О, оларнынъ душманы олды,
оларгъа къаршы дженк этти.

11 ^hО вакъыт Онынъ халкъы эски заманны,
Мусанынъ куньлерини хатырлады.
– Къойларынынъ чобанларынен берабер
оларны денъизден кечирген не ерде?
Мусанынъ юрегине Мукъаддес Рухуны ерлештирген,
12 ⁱМусанынъ сагъ къолунен шанлы кучюни ёллагъан,
онынъ огюнде сувларны экиге больген,
бойле этип, Озюне эбедий нам къазангъан,
13исраиллилерни теренликтен кечирген не ерде?
Атны тегиз чёльден киби,
О, оларны алып кетти, ве олар сюрюнмеди.
14РАББИнинъ Руху оларны,
вадийде айванларны киби,
раатлыкъ ерине алып кетти.
Шанлы нам къазанмакъ ичюн,
халкъыны ойле айдап кетти.

Исраильнинъ дувасы

15 ^jКоклерден бакъ,
азиз ве шанлы булунгъан еринъден бизни корь.
Гъазабынънен къудретинъ къайда?
Шефкъатынънен мераметинъ менден узакълашты.
16 ^kБизим Бабамыз – тек Сенсинъ.
Ибраим бизни танымаса да,
Исраиль бизни къабул этмесе де,
Сен, я РАББИ – бизим Бабамызсынъ,
эвель-эзельден Адынъ –
бизни сатын алгъан Къуртарыджымыздыр.
17Я РАББИ, не ичюн ёлунъдан урулмагъа,
юреклеримизге инат олмагъа,
Сенден къоркъмамагъа бизге ёл бердинъ?
Къулларынъ, Сенинъ къысметинъ олгъан къабилелер ичюн
бизге къайтып кель.
18Азиз халкъынъ мында
къыскъа вакъыт шорбаджылыкъ этти,
душманларымыз келип, Азиз Еринъни таптады.
^lСен санки бир вакъыт башлыкъ этмеген,
Адынънен адланмагъан бир халкъ олдыкъ.
19