Isaiah 64
1 aСен коклерни яргъайдынъ, ашагъы тюшкейдинъ!Сенинъ огюнъде дагълар,
2одунны якъкъан атештен,
сувны къайнаткъан алевден киби, ирип кеткейди!
Адынъны душманларынъа белли эткейдинъ!
Халкълар Сенинъ юзюнъден титрейгейди!
3Бизлер беклемеген вакъытта
Сен ашагъы тюше,
аджайип ишлеринъни япа эдинъ,
ве Сенинъ огюнъде дагълар къалтырай эди.
4 bЭвель-эзельден онъа ишангъанлар ичюн
о къадар шей япкъан башкъа алла акъкъында
кимсе эшитмеди, ойлени ич бир козь корьмеди.
5 cДогърулыкънен яшагъанларны,
ёлларынъны акъылында туткъанларны
Сен къуванчнен къаршылайсынъ.
Мына, бизлер чокътан гуна япкъанларымыз ичюн,
бизге къаршы ачувландынъ.
Биз насыл къуртуладжакъмыз?
6 dЭпимиз арам шей киби олдыкъ,
догъру ишлеримиз де – кирленген урба кибидир.
Биз эпимиз, япракълар киби, соламыз,
бизни, ель киби, къабаатларымыз алып кете.
7 eКимсе Адынъны чагъырмай,
Сени гъайретнен къыдыргъан да ёкъ.
Сен бизден юзюнъни сакъладынъ,
бизге къабаатларымызда ирип кетмеге ёл бердинъ.
8 fАмма шимди, я РАББИ, Сен – бизим Бабамызсынъ!
Биз – чамурмыз, Сен – чёльмекчисинъ,
эпимиз – сенинъ къолларынънынъ ишимиз.
9Я РАББИм! Къарардан зияде ачувланма,
къабаатымызны эбедий акъылынъда тутма.
Бизге бакъ, эпимиз – Сенинъ халкъынъмыз!
10Азиз шеэрлеринъ сахрагъа чевирильди,
Сион бакъымсыз, Ерусалим харап олды.
11 gДеделеримиз Сени шуретлеген,
азиз, шанлы Эвимиз бутюнлей янды,
бутюн къыйметли шейлеримиз ёкъ олды.
12Я РАББИ! Бундан сонъ да Озюнъни тутаджакъсынъмы,
индемейип, бизни къарардан зияде къыйнайджакъсынъмы?
Copyright information for
CrhCTB