Isa 8 | CrhCTB | STEP | РАББИ манъа: – Балабан бир тахта ал да, устюнде эр кес ичюн анълайышлы язынен: «Хырсызлыкъ япмагъа ашыкъа, гъанимет къазанмагъа тез келе» деп яз,

‏ Isaiah 8

Ашшур – Раббининъ силясы

1 ^aРАББИ манъа:

– Балабан бир тахта ал да, устюнде эр кес ичюн анълайышлы язынен: «Хырсызлыкъ япмагъа ашыкъа, гъанимет къазанмагъа тез келе» ^{▼▼Къ. еуд. «Махер-шалал-хаш-баз».} деп яз, – деди. – 2 ^cМен руханий Урияны ве Еверекьяхунынъ огълу Зекъарьяны – эки ишанчлы шаатны чагъырырым.

3 Сонъ апай пейгъамбернен яттым, ве о юкке къалып, огълан бала тапты. РАББИ манъа:

– Онынъ адыны Махер-Шалал-Хаш-Баз деп къой, – деди. 4 ^d– Бала «бабам» ве «анам» айтмагъа огренмезден эвель, Дамаскнынъ байлыгъыны ве Самариенинъ гъаниметини Ашшур падишасынынъ огюне алып кетиреджеклер.

5 РАББИ манъа даа бойле айтты: 6 ^e– Бу халкъ яваш акъкъан Шилоах озенининъ сувларына хор бакъкъаны,
лякин Рецинге ве Ремальяхунынъ огълуна къувангъаны ичюн,
7 ^fРабби оларгъа къаршы буюк Фират дерьясынынъ кучьлю къабаргъан чокътан-чокъ сувларыны –
Ашшур падишасыны ве бутюн шуретли ордусыны алып кетиреджек.
Дерья бутюн ирмакъларында котерилип,
эписи ялыларындан толып-ташаджакъ,
8 ^gЕхуда бою акъып, оны сувгъа толдураджакъ,
юксек котерилип, тап богъазына къадар етеджек.
Топрагъынъны бойдан-бой къаплап аладжакъ о,
эй, Иммануэл! ^{▼▼Я да «Амма къуш чипчесини къанатларынен япкъаны киби, Алла сени къорчалар. Алла бизнен!»}

9 Эй, халкълар! Рухтан тюшюнъиз
ве къоркъудан къалтыранъыз!
Эй, узакътаки топракълар, къулакъ асынъыз!
Дженкке азырланынъыз,
амма къоркъудан къалтыранъыз!
Дженкке азырланынъыз,
амма къоркъудан къалтыранъыз!
10 ⁱПланларынъызны япсанъыз да,
ниетлеринъиз гъайып оладжакъ.
Сёз берсенъиз де,
о, беджерильмейджек!
Алла бизнен! ^{▼▼Къ. еуд. «Иммануэл».}

Сюрюндирген таш

11 РАББИ кучьлю къолунен мени тутып, бу халкънынъ ёлундан кетмемеге насиат берип, бойле деди: 12 ^k– Бу халкъ фитне деген эр шейине
фитне деменъиз,
къоркъкъан шейинден къоркъманъыз,
отюнъиз патламасын.
13 Амма Ордуларнынъ РАББИсини
ве Онынъ азизлигини урьмет этинъиз!
Ондан къоркъунъыз,
Онынъ огюнде къалтыранъыз!
14 ^lО, сизге азиз ер киби,
эм де йыкътырыджы таш киби оладжакъ.
Исраильнинъ эки падишалыгъы
бу къаягъа сюрюнеджеклер!
Ерусалимде яшагъанларгъа
О, къапкъан ве тузакъ киби оладжакъ;
15 оларнынъ чокълары сюрюнип,
йыкъыладжакъ ве парчаланаджакъ,
къапкъангъа тюшип,
сарыладжакъ да, тутуладжакъ.

Раббиге ишанч

16 ^m– Шаатнынъ сёзлери киби, бу кягъытны сарып, багъла,
шегиртлерим огюнде эмирлериме печат къой.

17 ⁿЯкъупнынъ эвинден юзюни сакълагъан РАББИни беклейджегим,
Онъа ишанаджагъым.

18 ^oМына, мен ве РАББИ манъа берген балалардыр. Биз – Сион дагъында яшагъан Ордулар РАББИсинден Исраильге берильген аляметлер ве бельгилермиз.

19 ^pСизлерге: «Рухларнен лаф эткенлерге, джинлерни чагъыргъанларгъа, фысылдашкъан ве мыдырдагъанларгъа барынъыз. Эр халкъ озь аллаларынынъ истегини къыдыра, тири адамлар ичюн олюлерден сорайлар», – дерлер. 20 ^qКъанунда ве Алланынъ сёзлеринде догърусыны къыдырынъыз. Эгер адамлар буларгъа коре айтмасалар, оларда ярыкъ ёкътыр! 21 ^rОлар ер юзю бою долашаджакълар, чекишип, ачлыкъ чекеджеклер. Ачлыкъ заманда ачувланып, падишаларыны ве аллаларыны къаргъайджакъ. 22 ^sТёпеге бакъаджакълармы, ерге козь ташлайджакълармы, бакъсалар, эр ерде – сыкъынты ве къаранлыкъ, гъам ве къасевет. Оларны къаранлыкъ ичине къуваджакълар. Лякин азап чеккенлер ичюн гъам олмайджакъ ^{▼▼Я да «Сюргюн этильгенлер ичюн азчыкъ ярыкъ биле ёкъ».}.