‏ Isaiah 9

Келеджек Падиша

1 ^aКечкен заманда Зевулун ве Нафталий топрагъы ашаланды, амма келеджек заманда денъиз ёлу, Иорданнынъ башкъа тарафында яткъан мемлекет ве халкълар яшагъан Галилея шуретли оладжакъ.

2 ^bКъаранлыкъта юрген халкъ
буюк ярыкъ корьди!
Олюм топрагъында, олюм кольгесинде
яшагъан адамлар ичюн
ярыкъ парылдады.
3 ^cЯ РАББИ, Сен халкъны чокълаштырдынъ,
оларгъа буюк къуванч багъышладынъ.
Берекет джыйгъан заманда киби,
алынгъан гъаниметнен пайлашкъан вакъытта киби,
халкъ Сенинъ огюнъде къувана.
4 ^dМидьян йыкъылгъан куню киби,
халкъкъа агъырлыкъ эткен боюндырыкъны ёкъ эттинъ,
омузларыны ургъан сопаны ве залымнынъ таягъыны
Сен къырдынъ.
5 ^eТопракъны таптагъан аскерлернинъ аякъкъаплары,
къангъа булангъан урбалары якъыладжакъ,
атешке аш оладжакъ.
6 ^fБизге бир Бала догъды,
бизге бир Огъул берильди!
Омузлары устюне акимиет къоюлды.
Онъа «Аджайип», «Насиатчы»,
«Кучьлю Алла», «Эбедий Баба»,
«Аманлыкъ Падишасы» дейджеклер.
7 ^gПадишалыкъ эткенине ве акимиети тюбюнде аманлыкъ-тынчлыкъкъа сонъ олмайджакъ.
Давутнынъ тахтындан эбедиен падишалыкъ этип,
адалетнен ве догърулыкънен
падишалыкъны пекитеджек ве къавийлештиреджек.
Буларнынъ эписи – гъайрет ве буюк севгинен япылгъан
Ордулар РАББИсининъ ишидир.

Раббининъ Исраильге къаршы ачувы

8Рабби Якъупкъа къаршы хабер этти,
хабер этильгени Исраильде беджериледжек.
9О вакъыт бутюн халкъ, Эфраим ве Самариеде яшагъанлар
буны анълайджакълар.
Къопайланып, кибирли юрекнен:
10– Кирпичлерден япылгъан эвлер йыкъылгъан олса да,
ёнма таштан къурармыз.
Инджир тереклер кесильген олса да,
ерлерине кедр сачармыз, – айталар.

11 ^hРАББИ оларгъа къаршы Рециннинъ душманларыны котереджек,
залымларыны юреклендиреджек.
12 ⁱАрамлылар куньдогъуш тарафындан,
фелестинлилер куньбатыш тарафындан келип,
Исраильни тишлеринен кемирип, ашайджакълар.
Бундан сонъ да РАББИнинъ гъазабы тынмады,
къолу эп бир узатылгъандыр.
13 ^jАмма халкъ оны Ургъангъа ялвармады,
Ордулар РАББИсини къыдырмады.
14 ^kРАББИ Исраильнинъ эм башыны, эм къуйругъыны кеседжек,
бир куньде эм пальма фиданларыны,
эм къамышларыны да кесип атаджакъ.
15 ^lАкъсакъаллар ве мырзалар – онынъ башыдыр,
ялан айткъан пейгъамберлер – онынъ къуйругъыдыр.
16Халкънынъ ёлбашчылары оларны ёлдан урдылар,
артларындан кеткенлер гъайып олдылар.
17 ^mШунынъ ичюн Рабби оларнынъ йигитлерине къуванмайджакъ,
оксюзлеринен тул апайларыны аджымайджакъ,
олар эписи имансыз ве яман,
агъызларынен гуна япалар.
Бундан сонъ да РАББИнинъ гъазабы тынмады,
къолу эп бир узатылгъандыр.
18Ярамазлыкъ, атешке ошап, алевленди,
тикенли чалыны ве кийик отларны ашап битире,
ормандаки чалыларны якъа,
тютюн бурум-бурум котериле.
19 ⁿОрдулар РАББИсининъ хышымы
ер юзюни атеш киби сарды,
халкъ атешке аш ерине олды,
агъа къардашыны аджымай.
20 ^oОнъ тарафта ашайлар – ач къалалар,
сол тарафта кемирелер – тоймайлар,
эр бири озь къолуны ашап битире.
21 ^pМенашше – Эфраимни,
Эфраим – Менашшени кемире,
экиси де Ехудагъа къаршы баш котерелер.
Бундан сонъ да РАББИнинъ гъазабы тынмады,
къолу эп бир узатылгъандыр.