‏ James 1

Селямлашув

1 ^aЯкъуп, Алланынъ ве Рабби Иса Месихнинъ къулу –

дюньяда даркъалгъан еудийлернинъ он эки къабилесине:

Селям алейкум!

Иман ве икмет

2 ^bДин къардашларым, чешит тюрлю сынавларгъа огърагъанынъызда, чокъ къуванынъыз. 3 ^cСиз билесинъиз ки, иманынъызнынъ сыналгъанындан сабыр догъа. 4 ^dСабыр исе бол берекет кетирсин, о вакъыт сизлер ич бир шейден эксик олмайып, эр тарафтан яхшы ве къусурсыз оладжакъсынъыз.

5 ^eЭгер биринъизнинъ икмети эксик олса, Алладан истенъиз, ве Алла сизге икмет берер. Алла опькелемейип, эписине боллукънен бере. 6 ^fЛякин адам шубеленмейип, иманнен истесин. Шубеленген адам ельнен котерильген ве анда-мында айдалгъан денъиз далгъасына ошай. 7Бойле адам Раббиден бир шей алмагъа умют этмесин. 8 ^gОнынъ акъылы экиге болюнген, о, бутюн ишлеринде де буны, де башкъасыны истей.

Байлыкъ эбедий дегиль

9 ^hФукъаре дин къардаш озь фукъарелигинен макътансын, чюнки о, Алланынъ козьлеринде юксек бир севиеде ола. 10Бай дин къардаш да макътансын, чюнки о, биле ки, Алланынъ огюнде ашагъы алда ола ве, чёль чечеги киби, ёкъ оладжакъ. 11 ⁱКунеш чыкъып, якъыджы сыджагъынен отларны къурута. Чечекнинъ япракълары тюше, ве дюльберлиги джоюла. Бай адам да бойле, озь ишлери ичинде къуруп къаладжакътыр.

Сынавлар

12 ^jНе де бахтлыдыр сынавгъа даянгъан адам. Сынавдан кечкен сонъ, о, тадж киби, эбедий яшайышны аладжакъ. Алла бу мукяфатны Оны севгенлерге бермеге сёз берди. 13Сынавгъа огърагъанда, ич кимсе: «Мени Алла ёлдан ура», – демесин. Алланы яманлыкънен ёлдан урмакъ мумкюн дегиль, Алла Озю де ич кимсени ёлдан урмай. 14Лякин эр кес озь истеклеринен ёлдан урула, алданып кете. 15 ^kСонъ истек эп артып, гунагъа алып кетире, япылгъан гуна исе адамны олюмге алып кетире.

16 ^lСевимли дин къардашларым, алданманъыз! 17 ^mЭр бир яхшы ве мукеммель бахшыш юкъарыдан, коклердеки ярыкъларны яраткъан Бабадан келе. О, денъишип тургъан кольгеге ошамаз, ич бир вакъыт денъишмез. 18 ⁿАлла истеп, акъикъат Сёзю ярдымынен бизге яшайыш берди, биз Онынъ яраткъанлары арасында биринджи ерни аладжагъымызны истеди.

Сёзлер ве ишлер

19 ^oСевимли дин къардашларым, буны акъылынъызда тутунъыз: эр бир адам динълемеге азыр олсун, айтмагъа исе ашыкъмасын, ачувланмагъа да ашыкъмасын. 20Ачувлангъан адам Алла истеген инсафлы ишлерни япмаз да. 21 ^pШунынъ ичюн эр бир арамлыкътан ве дюньяда чокълашкъан яманлыкътан вазгечинъиз, Алла юрегинъизге къойгъан Сёзни алчакъгонъюлликнен къабул этинъиз. Бу Сёз джанларынъызны къуртара биле.

22 ^qАлланынъ Сёзю буюргъан шейлерни беджеринъиз. Оны тек эшиткен, амма беджермеген адамлар озьлерини алдаталар. 23Сёзюни динълеген, амма беджермеген адам озюни кузьгюде корьген адамгъа ошай: 24о, озюне бакъа, амма кеткенинен бети насыл олгъаныны бирден унута. 25 ^rАмма Алланынъ азатлыкъ берген къусурсыз Къануныны гъайретнен окъугъан ве Оны туткъан адам эр бир япкъан ишинде бахтлы оладжакъ. О, эшиткен ве унуткъан адам дегиль, динълеп беджерген адамдыр.

26 ^sКим озюни диндар сайса, лякин тилини тутып оламаса, о, озь озюни алдата, ве онынъ диндарлыгъы боштыр. 27 ^tЛякин беля куньлеринде тул къадынларны ве оксюзлерни бакъсанъыз ве бу дюньянынъ арамлыкъларындан сакълансанъыз, сизинъ диндарлыгъынъыз Алла Бабанынъ козю огюнде темиз ве къусурсыз оладжакъ.