‏ Jeremiah 14

Къургъакълыкъ

1Къургъакълыкъ акъкъында РАББИнинъ Йирмеягъа берген хабери.

2 ^a– Ехуда агълай, шеэр къапулары йыкъылды,
ер устюнде ята-ята къарардылар;
Ерусалимде къычырувлар котериле.
3Мырзалар хызметчилерини сувгъа ёллайлар,
олар къую янына келип, сув тапамайлар,
бош савутнен къайталар.
Утанып чекинелер,
башларыны орьтелер.
4 ^bЯгъмур олмагъаны ичюн,
мемлекетте ер чатлады,
топракъны ишлегенлер де утанып,
башларыны орьтелер.
5Ала кийик биле янъы догъгъан баласыны чёльде ташлай,
отлар да ёкъ.
6Кийик эшеклер байырларда турып,
шакъал киби зорнен нефес алалар.
Козьлери сёнген, отлар да ёкъ.

7 ^c– Гуналарымыз бизни къабаатлайлар,
лякин, я РАББИ, Адынъ ичюн бир шейлер яп да!
Пек чокъ хаинлик эттик,
Санъа къаршы гуна ишледик.
8 ^dЭй, Исраильнинъ Умюти!
Яман вакъытларындаки Къуртарыджысы!
Не ичюн мемлекетте бир ябанджы дайынсынъ,
ялынъыз геджелемек ичюн кирген ёлджу кибисинъ?
9Не ичюн шашкъан бир адамгъа,
къуртармагъа кучю олмагъан аскерге ошайсынъ?
Лякин, я РАББИ, эписи бир Сен арамыздасынъ,
Адынънен адланамыз.
Бизни быракъма!

10 ^eБу халкъ акъкъында РАББИ бойле дей: – Аякъларыны тутмайып,
токътамаздан кезмеге севгенлери ичюн,
РАББИ олардан разы дегиль,
къабаатларыны акъылында тутар,
гуналары ичюн джезалар.

11 ^fРАББИ манъа:

– Бу халкънынъ эйилиги ичюн дува этме, – деди. 12 ^g– Ораза тутаджакълар, лякин къычырувларыны эшитмейджегим. Бутюнлей якъыладжакъ къурбанларны ве ашлыкъ бахшышларыны кетиреджеклер, амма олардан разы олмайджагъым. Оларны къылычнен, ачлыкънен ве ольдюриджи хасталыкънен ёкъ этеджегим.

13 ^hО вакъыт:

– Ах, РАББИ-ТААЛЯ! – дедим. – Пейгъамберлер оларгъа: «Къылычны корьмейджексинъиз, ачлыкъ сизге кельмейджек. Бу ерде мен сизге даимий тынчлыкъ-аманлыкъ береджегим», – дейлер.

14 ⁱРАББИ манъа:

– Пейгъамберлер Меним Адымдан ялан пейгъамберлик этелер, – деди. – Мен оларны не ёлладым, не эмир бердим, не де оларгъа бир шей айттым. Олар сизге ялан руяларны, фалджылыкъны, бош шейлерни, юреклерининъ арзуларыны айтып, пейгъамберлик этелер. 15 ^jОнынъ ичюн РАББИ бойле дей: Мен ёлламагъан, амма Адымдан пейгъамберлик япкъан пейгъамберлер: «Бу мемлекетте къылыч да, ачлыкъ да олмайджакъ», – дейлер, лякин бойле пейгъамберлер къылыч ве ачлыкънен ёкъ этиледжеклер. 16 ^kОлар пейгъамберлик эткен халкъ къылычтан ве ачлыкътан гъайып олып, Ерусалимнинъ сокъакъларында ятаджакълар. Оларны да, апайларыны, огъулларыны, къызларыны да комеджек кимсе олмайджакъ. Япкъан яманлыкъларыны озьлерининъ башларына тюшюреджегим. 17 ^lОларгъа бойле хабер эт: – Козьлерим гедже-куньдюз, токътамаздан козьяш тёксюн;
халкъымнынъ къызыны чокъ урдылар,
ве о йыкъылды, пек агъыр яраланды.
18 ^mТарлагъа чыкъсам,
анда къылычнен ольдюрильгенлер яталар,
шеэрге кирсем,
ачлыкътан битип кеткенлерни корем.
Пейгъамбернен руханий биле мемлекет бою долашалар,
ич бир шейни анъламайлар.

19 ⁿ– Керчектен де, Сен Ехуданы ред эттинъми?
Сионгъа нефретнен бакъасынъмы?
Не ичюн бизни чекиштиресинъ?
Не ичюн шифа тапып оламаймыз?
Тынчлыкъ-аманлыкъны беклей эдик,
яхшылыкъ кельмеди.
Шифа кореджек вакътыны бекледик,
къоркъуларны таптыкъ.
20 ^oЯ РАББИ! Япкъан яманлыкъларымызны,
деделеримизнинъ гуналарыны билемиз.
Керчектен де, Санъа къаршы гуна ишледик.
21 ^pАдынъ ичюн бизге хор бакъма,
шуретли тахтынъны ашалама!
Хатырла! Бизге берильген васиетинъни четке ташлама!
22 ^qХалкъларнынъ бош путлары ягъмур ягъдыралармы?
Кок озю-озюнден ягъмур ягъдырамы?
Сен – РАББИсинъ, бизим Алламызсынъ!
Биз Санъа ишанамыз,
тек Сен бутюн буларны япасынъ!