Jer 15 | CrhCTB | STEP | РАББИ манъа деди ки: – Мусанен Смаил огюмде турып, ялварсалар биле, бу халкъкъа юрегим ятмаз. Оларны огюмден къувала, кетсинлер.

‏ Jeremiah 15

Ехуданынъ джезаланмасы

1 ^aРАББИ манъа деди ки:

– Мусанен Смаил огюмде турып, ялварсалар биле, бу халкъкъа юрегим ятмаз. Оларны огюмден къувала, кетсинлер. 2 ^bСенден: «Къайда кетейик?» – деп сорасалар, айт оларгъа: «РАББИ бойле дей: Олюм ичюн айырылгъанлар ольсюн, къылыч ичюн айырылгъанлар ольдюрильсин, ачлыкъ ичюн айырылгъанлар ач олсун, эсир ичюн айырылгъанлар сюргюнликке кетсин».

3 ^cОларгъа дёрт джезаны ёллайджагъым, – дей РАББИ. – Ольдюрмек ичюн къылычны, парчаламакъ ичюн копеклерни, ашап битирмек ве ёкъ этмек ичюн йыртыджы къушларнен кийик айванларны ёллайджагъым. 4 ^dЕхуда падишасы, Хизкиянынъ огълу Менашше Ерусалимде япкъанлары ичюн, бутюн ер юзюндеки падишалыкълар джезасыны корип, къоркъаджакълар. 5 ^eСени ким аджыр, эй, Ерусалим?
Сенинъ ичюн ким языкъсыныр?
Санъа ким якъынлашыр?
Алынъны ким сорар?
6 Сен Мени ташлап кеттинъ, – дей РАББИ, –
Манъа аркъанъны чевирдинъ.
Мен къолумны санъа къаршы котерип,
сени гъайып этеджегим.
Сени аджымакътан ёрулдым.
7 Мемлекетнинъ шеэрлери къапуларында
халкъымны уфюрип савурдым ^{▼▼Я да «Мен оларны сенекнен бутюн ер юзюне савурырым».},
баласыз къалдырдым,
халкъымны ёкъ эттим,
лякин эписи бир туткъан ёлларындан къайтмадылар.
8 Тул къадынлары денъиз къумундан чокъ олды,
уйле вакътында йигитлернинъ аналарына къаршы
гъайып этиджини ёлладым,
къоркъу ве дешет оларны апансыздан къаплады.
9 ^gЕди балалы къадын эсини джойып,
сонъки нефесини ала.
Даа куньдюз олгъанда, кунеши батты,
утанды, масхара олды.
Сагъ къалгъанларны душманларгъа береджегим,
олар къылычнен ольдюриледжеклер, – дей РАББИ.

Йирмеянынъ дувасы ве Раббининъ джевабы

10 ^hВай-вай-вай! Башыма беля!
Ах, анам! Сен мени догъып,
давалашкъан адам олдым,
бутюн ернен къавгъалаштым!
Не борджкъа бердим,
не борджкъа алдым,
лякин мени эр кес къаргъай.

11 РАББИ бойле деди:
– Сонъунъ хайырлы оладжакъ.
Беля ве сыкъынты вакътында
душманларынъ санъа ялвараджакълар.

12 Демирни, шимальден кельген демирни ве бакъырны
ким къыраджакъ? ^{▼▼Я да «Демир насыл этип, шимальден кельген демирни ве бакъырны къыраджакъ?»}
13 ^jЯпкъан гуналарынъ ичюн
бутюн мемлекетинъ бою сени чайпайджакълар,
байлыкънен хазинелеринъни ич одемесиз аладжакълар.
14 ^kСени душманларынъа,
сен бильмеген мемлекетке ёллайджагъым;
гъазабымнынъ алеви туташты,
атеш киби, санъа къаршы янып башлады.

15 ^l– Я РАББИ, Сен эр шейни билесинъ!
Мени акъылынъа кетир ве кель манъа,
мени къувалагъанларны джезала.
Чокъ сабырлы олгъанынъ ичюн, джанымны алма.
Сенинъ ичюн ашалангъанымны биль.
16 ^mСёзлеринъ огюме келип-кечмез, мен оларны юттым;
олар манъа къуванч, юрегиме шенълик олды.
РАББИ, Ордуларнынъ Алласы!
Адынънен адлангъаным.
17 ⁿМыскъылджыларнынъ арасында кулип отурмадым,
къолунъ тюбюнде олгъанда, бир озюм къалдым,
Сен мени ачувгъа толдурдынъ.
18 ^oНе ичюн хасталыгъым кечмей,
не ичюн ярам яхшы олмайып, шифаны къабул этмей?
Алдатыджы бир чокъракъ,
ишанчсыз сувлар дайын, манъа оладжакъсынъмы, аджеба?

19 Бунъа РАББИ бойле джевап берди:
– Эгер тёвбе этсенъ,
сени арткъа алып кетиреджегим,
кене огюмде тураджакъсынъ.
Бош шейлерден къыйметлисини айры этсенъ,
Меним агъзым киби лаф этеджексинъ.
Халкъ санъа келеджек,
сен исе оларгъа кетмейджексинъ.
20 ^pСени бу халкъ ичюн къавий бакъыр дивар киби этеджегим.
Олар санъа къаршы дженк этеджеклер,
амма енъалмайджакълар.
Мен янынъда оладжагъым,
сени къорчалап, къуртараджагъым, – дей РАББИ.
21 – Яман адамлардан сени сакълайджагъым,
душман къолундан сени къуртараджагъым.