‏ Jeremiah 18

Чёльмекчи ве бардакъ

1 ^aРАББИнинъ Йирмеягъа айткъан сёзлери.

2– Тур, чёльмекчининъ эвине бар, санъа анда хабер береджегим.

3 ^bМен чёльмекчининъ эвине кеттим, бакъсам, о чарх устюнде чалыша эди. 4Чёльмекчининъ чамурдан япкъан савуты къолунда дагъылгъанда, о чамурдан истегени дайын башкъа савут япа эди.

5РАББИ манъа кене деди:

6 ^c– Исраиль халкъы! Бу чёльмекчининъ япкъаныны Мен де сизнен япып олмаммы? – дей РАББИ. – Чёльмекчининъ элинде чамур не олса, сиз де Меним къолумда ойлесинъиз, Исраиль эви! 7 ^dБир аньде Мен бирде-бир халкъ я да падишалыкъ акъкъында къарар этип олам ве оларны къырып ташлайджагъым, ёкъ этеджегим, ве олар гъайып оладжакълар. 8 ^eАмма Мен джезаламагъа истеген халкъ яман ишлеринден къайтса, Мен де онъа япаджакъ яманлыкътан вазгечем. 9Бир аньде Мен бирде-бир халкъ я да падишалыкъ акъкъында къарар чыкъарып олам ве оларны къавий этем ве къуветлештирем. 10 ^fЛякин о халкъ сесимни динълемейип, козюм огюнде яман шей япсалар, онъа яхшылыкъны япмакътан вазгечеджегим.

11 ^gБойледже, Ехуда акъайларына ве Ерусалимде яшагъанларгъа РАББИнинъ сёзлерини бильдир: «Мына, Мен сизге къаршы бир яманлыкъ япмагъа азырланам. Онынъ ичюн эр биринъиз яман ёлунъыздан къайтынъыз, ёлларынъызны ве ишлеринъизни тюзетинъиз». 12 ^hАмма олар: «Акъылгъа биле кетирме! Озь тюшюнджелеримизге коре яшайджакъмыз, яман юреклеримизнинъ инатлыгъына коре арекет этеджекмиз», – дейлер.

13Бунынъ ичюн РАББИ бойле дей: – Халкълардан соранъыз,
бунъа ошагъан бир шейни ким эшитти?
Исраиль къызы пек джиренч шейлер япты.
14Ливаннынъ къаялы дагъларында къар эксилирми?
Узакътан акъкъан сувукъ сувлар кесилирми?
15 ⁱХалкъым исе Мени унутты,
бош путларгъа къокъулы отларны якъалар,
къадимий ёлундан урулдылар,
юрюльген ёлдан дегиль де, насылдыр сокъачыкътан кеттилер.
16 ^jШунынъ ичюн мемлекетлери къоркъунчлы оладжакъ,
эбедий масхаралыкъкъа огърайджакъ.
Андан эр кечкен адам къоркъуда къалып,
башыны саллайджакъ.
17 ^kКуньдогъуш ель киби олып,
оларны душманларынынъ огюнде савураджагъым.
Беля куньлеринде оларгъа юзюмни дегиль,
аркъамны чевиреджегим.

Къорчалав акъкъында Йирмеянынъ риджасы

18 ^lОлар исе:

– Айдынъыз, Йирмеягъа къаршы келишейик, – дедилер. – Къанун руханийлернен къаладжакъ, насиат акъыллы адамлардан кетмейджек, пейгъамберлер хабер этип береджеклер. Келинъиз, оны лафнен урып йыкъайыкъ, айткъанларына къулакъ асмайыкъ.

19– Динъле мени, я РАББИ,
душманларымнынъ сесини эшит!
20 ^mЯхшылыкъкъа яманлыкъ япылырмы?
Олар исе джаныма чукъур къазалар.
Юзюнъ огюнде тургъанымны,
олар ичюн яхшылыкъ тилегенимни,
олардан гъазабынъны къайтаргъанымны унутма.
21 ⁿБунынъ ичюн огъулларына ачлыкъ ёлла,
оларны къылычнен ольдюр;
апайлары баласыз, тул къалсын,
акъайлары ольдюрильсин,
йигитлери дженкте къылычтан ольсюн.
22 ^oАпансыздан оларгъа душман аскерлерини ёлла,
эвлеринден агълавлар эшитильсин.
Мени тутмакъ ичюн, чукъур къазалар,
аякъларыма гизли къапкъан къойдылар.
23 ^pМени ольдюрмеге эписи ниетлерини билесинъ, я РАББИ!
Къабаатларыны багъышлама,
оларнынъ гунасы эр вакъыт огюнъде олсун.
Сенинъ огюнъде йыкъылып къалсынлар,
оларны гъазабынънен джезала.