Jeremiah 2
Исраильнинъ гунасы акъкъында
1РАББИ манъа бойле деди: 2 a– Бар, Ерусалим халкъына беян эт:РАББИ бойле айта:– Акъылымда тутам ки,
яшлыгъынъда Манъа ишанчлы эдинъ,
Мени, келин киби, севдинъ,
Меним артымдан сахрагъа,
сачылмагъан топракъкъа кеттинъ.
3 bИсраиль – РАББИнинъ азизлиги,
биринджи берекети эдинъ!
Онъа зарар кетирген эр кес къабаатлы сайылды,
башына беля кельди, – дей РАББИ.
4Эй, Якъупнынъ халкъы ве Исраильнинъ эписи сойлары!
РАББИнинъ сёзюни динъленъиз!
5 cРАББИ дей ки:
– Деделеринъиз Менде насыл акъсызлыкъ таптылар?
Не ичюн Менден узакълаштылар,
бош путларнынъ артындан кетип,
озьлери де бош олдылар?
6 dОлар: «Мысыр топрагъындан бизни чыкъаргъан,
сахрада, къуру ве сувсуз чёльде алып юрген,
олюм къаранлыгъы олгъан топракъта,
бош, адам бармагъан, ич кимсе яшамагъан топракъта
бизни алып кеткен РАББИ не ерде?» – деп сорамадылар.
7 eМейваларыны ве бол берекетини ашанъыз деп,
Мен сизни багъчалар топрагъына кирсеттим.
Сизлер исе топрагъыма кирип,
оны арамладынъыз,
Меним мулькюмни джиренч бир шейге чевирдинъиз.
8 fРуханийлер РАББИни къыдырмадылар,
Къанун оджалары Мени танымадылар,
чобанлар Манъа къаршы чыкътылар,
пейгъамберлер Баал адындан пейгъамберлик эте эдилер,
файдасыз путларнынъ артындан юре эдилер.
Алла Озь халкъынен дава эте
9 gШунынъ ичюн сизлернен дава этеджегим, – дей РАББИ, – торунларынъызнен де дава этеджегим.10 hКетинъиз де, Киттим адаларына бакъынъыз!
Кедар мемлекетине адам ёллап,
яхшы этип, сорап билинъиз ве огренинъиз.
Бунъа ошагъан бир шей олдымы?
11 iАллалары алла олмаса да,
насылдыр бир халкъ аллаларыны денъиштирдими?
Меним халкъым исе озь шуретли Алласыны
файдасыз путларгъа денъиштирди.
12Эй, коклер, бунъа шашынъыз,
къоркъудан къалтыранъыз, – дей РАББИ.
13 j– Халкъым эки яманлыкъ япты:
Мени, джанлы сувлар чокърагъыны быракъты,
озьлерине сув тутмагъан, чатлакъ хавузлар къаздылар.
14Исраиль къулмы я?
Къуллукъта догъдымы?
Не ичюн гъанимет олды о?
15 kЯш арсланлар онъа къаршы ырылдады,
сес чыкъарды ве топрагъыны харап этти;
шеэрлери якъылды, адамсыз къалды.
16Ноф ве Тахпанхес халкъы башынъны тыраш эттилер.
17Буны озюнъ озюнъе этмединъми, аджеба?
Сени ёлда юрсеткен РАББИден,
сенинъ Алланъдан вазгечмединъми?
18 lШимди не ичюн Мысыргъа кетесинъ?
Шихор озенинден сув ичмек ичюнми?
Ашшургъа кетмек не керек?
Фират дерьясындан сув ичмек ичюнми?
19Озь яманлыгъынъ сени джезалар,
хиянетлигинъ сени къабаатлар.
Биль де, бакъ:
РАББИден, сенинъ Алланъдан вазгечкенинъ –
фена ве аджджы бир шей,
ичинъде Меним огюмде къоркъунъ ёкъ, –
дей Ордуларнынъ РАББИ-ТААЛЯсы.
Исраильнинъ хаинлиги
20 mБоюндырыгъынъны чокътан парчаладым,багълавларынъны къопардым,
сен де: «Ибадет этмейджегим», – дединъ.
Эр юксек байырда
ве эр даллы терек тюбюнде ороспуландынъ.
21 nМен сени сачкъанда, сен энъ яхшы юзюм пытагъы,
тер-темиз урлукъ эдинъ.
Насыл этип, Меним огюмде кийик юзюм пытагъына чевирильдинъ?
22 oСабуннен ювунсанъ да, башкъа темизлейджек шей къуллансанъ да,
къабаатынъ огюмде къара леке киби олды, –
дей РАББИ-ТААЛЯ.
23«Мен арамланмадым,
Баал путларынынъ артындан юрмедим», – айтаджакъсынъмы?
Вадийде озюнъни насыл туткъанынъны бакъ да,
не япкъанынъны анъла.
Сен анда-мында урулгъан
ойнакъ бир деве киби олдынъ,
24 pчёльде оськен эшекке ошадынъ:
джаны истекнен янгъанда,
эшек агъзынен нефес ала.
Ким оны тутып олур?
Оны къыдыргъан эр кес болдурмаз,
чифтлешме заманында оны тапар.
25 qЯлынаякъ юрмектен сакъын,
сувсузлыкътан богъазынъны сакъла ▼
▼Я да «Ороспулыкътан къачын, ёкъса ялынаякъ юреджексинъ, богъазынъ да сувсузлыкътан къуруйджакъ».
.Амма сен: «Э-эй, эписи джоюлып кетсин!
Ябанджы аллаларны севем,
оларнынъ артындан кетеджегим», – дединъ.
Исраильнинъ джезасы
26 s– Тутулгъан хырсыз насыл масхара олса,Исраиль эви де:
исраиллилер, падишалары, башлыкълары,
руханийлери ве пейгъамберлери де масхара олды.
27 tОлар терекке: «Сен бабамсынъ»,
ташкъа: «Сен мени догъурдынъ», – дейлер.
Манъа юзьлерини дегиль, аркъаларыны чевирдилер.
Амма башларына беля тюшкенде,
олар: «Тур да, бизни къуртар», – деп ялварырлар.
28 uКъана, озьлеринъизге япкъан аллаларынъыз къайда?
Беля кельгенде, сизни къуртарып олсалар,
айды, турсунлар!
Шеэрлеринъиз не къадар олса,
о къадар аллаларынъыз да бар, эй, Ехуда!
29Сизге Меннен дава этмеге не керек?
Манъа къаршы эпинъиз чыкътынъыз, – дей РАББИ.
30 v– Балаларынъызны бошуна джезаладым,
олар тербиелеримни огренмедилер.
Йыртыджы арслан киби,
къылычларынъызнен пейгъамберлеринъизни ольдюрдинъиз.
31Эй, бугуньки несиль! РАББИнинъ сёзлерине къулакъ асынъыз!
Исраиль ичюн Мен сахра киби эдимми?
Къап-къаранлыкъ бир мемлекет олдыммы?
Сонъ не ичюн халкъым: «Истеген еримизге кетемиз,
энди Санъа къайтмайджакъмыз», – дей?
32 wКъыз озь ильванларыны,
келин озь келин урбасыны унутып олурмы?
Халкъым исе сайылмаз куньлерден берли Мени унутты.
33 xСевгини тапмакъ ичюн,
не къадар устасынъ!
Яман къадынларны биле буны япмагъа
яхшы огретип оласынъ.
34 yКъабаатсыз ёкъсулларнынъ къанынен
урбаларынъ биле булашты.
Сен оларны хырсызлыкъта туттынъмы?
Эписи бир, бунъа бакъмадан:
35«Мен къабаатсызым!
РАББИнинъ ачувы манъа тиймез», – дейсинъ.
Бакъ! «Гуна ишлемедим», – дегенинъ ичюн,
Мен сени суд этеджегим.
36 zНеден ёлунъны денъиштирип,
о къадар чокъ долашасынъ?
Ашшур сени насыл масхара эткен олса,
Мысыр да сени масхара этеджек.
37Къолларынънен башынъны тутып, андан чыкъаджакъсынъ,
РАББИ сен ишангъанларны ред этти,
олар санъа бахыт кетирмейджек.
Copyright information for
CrhCTB