‏ Jeremiah 25

Сюргюнликнинъ етмиш йылы

1 ^aЁшиянынъ огълу Ехояким дёртюнджи йылы Ехуданынъ падишасы олгъанда, Невукъаднеццар биринджи йылы Вавилонда падишалыкъ эткенде, Йирмеягъа РАББИден бутюн Ехуда халкъы акъкъында хабер этильди. 2Йирмея пейгъамбер бу хаберни Ехуда халкъына ве Ерусалимнинъ бутюн адамларына еткизип, бойле деди:

3 ^b– Амоннынъ огълу Ёшия 13-юнджи йылы Ехудада падишалыкъ эткенинден башлап бу куньгедже, 23 йыл РАББИ манъа хаберлер берип, мен бу хаберлерни сизге еткизе эдим. Оларны сизге къайта-къайта текрарлай эдим, сизлер исе динълемей эдинъиз. 4 ^cРАББИ сизлерге къайта-къайта бинълердже пейгъамбер къулларыны ёллады, амма сиз динълемей ве къулакъ асмай эдинъиз. 5 ^dСизлерге: «Эр биринъиз яман ёлунъыздан, яман ишлеринъизден къайтынъыз ве РАББИ асырдан асыргъа деделеринъизге берген топракъта яшанъыз, – дедилер. 6 ^e– Башкъа аллаларнынъ артындан юрменъиз, оларгъа хызмет ве ибадет этменъиз, эткен ишлеринъизнен Мени гъазапландырманъыз, Мен де сизлерге яманлыкъ этмем».

7– Амма сиз Мени динълемединъиз, – дей РАББИ. – Эткен ишлеринъизнен Мени гъазапландыра эдинъиз ве озьлеринъизге яманлыкъ эттинъиз.

8Онынъ ичюн Ордуларнынъ РАББИси бойле дей:

– Меним сёзлеримни динълемегенинъиз ичюн, 9 ^fМен эписи шималь халкъларыны чагъырып, топлайджагъым ве къулума, Вавилон падишасы Невукъаднеццаргъа ёллайджагъым, оларны бу мемлекетке, анда яшагъанларгъа, чевресиндеки бутюн халкъларгъа къаршы алып кетиреджегим ве оларны ёкъ этеджегим. Оларны къоркъунчлы шей этип, масхара этеджегим, ве олар эбедиен харап оладжакълар, – дей РАББИ. 10 ^g– Оларнынъ арасында севинч ве къуванч сеслери, киев-келин сеслери, дегирмен ташларынынъ давушлары кесиледжеклер, къандиллер де ярыгъыны бермейджеклер. 11 ^hБутюн бу топракъ бакъымсыз ве харап оладжакъ. Бу халкълар Вавилон падишасына етмиш йыл девамында хызмет этеджеклер. 12Етмиш йыл кечкен сонъ, – дей РАББИ, – къабаатлары ичюн Вавилон падишасыны ве халкъыны, эм де къасдийлилернинъ топрагъыны джезалайджагъым, эбедий бакъымсыз сахрагъа чевиреджегим. 13 ⁱО топракъ акъкъында айткъан бутюн сёзлеримни беджереджегим, Йирмеянынъ бу халкъларгъа айткъан ве бу китапта язылгъан бутюн пейгъамберлик сёзлерини ерине кетиреджегим. 14 ^jЧокъ сайылы халкълар ве буюк падишалар оларны да къул этеджек. Япкъан ишлери ве къолларындан чыкъкъан эр шейлерине коре акъларыны береджегим.

Алла халкъларны суд эте

15 ^kРАББИ, Исраильнинъ Алласы манъа бойле деди:

– Элимден хышым шарабына толу савутны ал да, Мен сени ёллайджакъ эписи халкъларгъа ичир. 16 ^lОлар шарап ичип, салланаджакълар ве Мен оларгъа къаршы ёллайджакъ къылычнынъ огюнде делиреджеклер.

17 ^mМен РАББИнинъ элинден савутны алып, РАББИ мени ёллагъан эписи халкъларны ичирдим. 18Ерусалим шеэри, Ехуда шеэрлери, падишаларынен башлыкълары ондан ичти ве, бугунь корюнгени киби, харап ве бакъымсыз олдылар, масхарагъа ве къаргъышкъа чевирильдилер. 19 ⁿЭм де Мысыр падишасы фыравунгъа ве хызметчилерине, башлыкъларына ве бутюн халкъына, 20 ^oэписи ябанджыларына; Уц топрагъынынъ эписи падишаларына, Фелестин топрагъынынъ эписи падишаларына – Ашкелон, Гъаза ве Экрон шеэрлерине, Ашдодда сагъ къалгъанларына; 21 ^pЭдомгъа, Моавгъа, Аммон огъулларына; 22 ^qТир шеэрининъ эписи падишаларына, Сидон шеэрининъ эписи падишаларына; денъизнинъ башкъа тарафындаки мемлекетлернинъ падишаларына; 23 ^rДедан, Тема топракъларына, Буз халкъына, зулюф сачларыны къыркъкъан эписи халкъларгъа; 24Арабистаннынъ эписи падишаларына, сахрада яшагъан чешит тюрлю халкъларнынъ эписи падишаларына; 25 ^sЗимрийнинъ эписи падишаларына, Элам топрагъынынъ эписи падишаларына ве Мадай топрагъынынъ эписи падишаларына; 26бири-бирине якъын ве узакъ олгъан эписи шималь падишаларына; ер юзюндеки эписи халкъларнынъ падишаларына РАББИнинъ гъазап савутындан ичирдим. Эр кестен сонъ Шешах ▼

▼Мында Вавилон козьде тутула. Даа 51.41 бакъ.

падишасы да ичеджек.

27 ^uОларгъа бойле айт:

– Ордуларнынъ РАББИси, Исраильнинъ Алласы бойле дей: «Ичинъиз, сархошланынъыз, къусунъыз ве ерге йыкъылынъыз. Мен сизге къаршы ёллайджакъ къылычнынъ огюнде ерден турманъыз». 28 ^vЭгер олар къолунъдаки савутны алмагъа ве ичинден ичмеге истемеселер, оларгъа айт: «Ордуларнынъ РАББИси бойле дей: Мытлакъа ичеджексинъиз! 29 ^wБакъынъыз! Адымнен адлангъан шеэрге беля кетирмеге башлайым. Джезасыз къаладжакъсынъызмы? Ёкъ, джезасыз къалмайджакъсынъыз! Ер юзюнде яшагъанлар эписининъ башларына къылычны чагъырам, – дей Ордуларнынъ РАББИси».

30 ^xОнынъ ичюн бутюн бу пейгъамберлик сёзлерини оларгъа бильдирип, бойле айт: РАББИ юксекликтен гудюрдейджек,
мукъаддес еринден сес береджек,
Озюнинъ къой аранына дешетли гурьлейджек,
юзюм эзгенлер киби,
ер юзюнде яшагъанларнынъ устюне къычыраджакъ.
31Гудюрди ер юзюнинъ четлерине къадар етеджек.
РАББИ халкъларнен дава этеджек,
эр бир джанны суд этеджек,
яманларны къылычнен ольдюреджек, – дей РАББИ.

32 ^yОрдуларнынъ РАББИси бойле дей: – Бакъынъыз, беля халкътан халкъкъа кече,
дюньянынъ четлеринден буюк боран котериле.

33 ^zО куню РАББИ адамларны дюньянынъ бир четинден башкъа четинедже ольдюреджек. Оларнынъ артындан кимсе козьяш тёкмейджек, оларны кимсе топлап джыймайджакъ. Ер юзюнде кубре киби оладжакълар. 34 ^aaЭй, чобанлар, агъланъыз, аджджы-аджджы агъланъыз!
Сюрю ёлбашчылары, тозгъа йыкъылынъыз!
Сизни соймагъа ве дагъытмагъа куньлер кельди.
Паалы савут киби тюшип, чиль-парча оладжакъсынъыз.
35Чобанлар къачып оламайджакъ,
къойларны бакъкъан ёлбашчылары къуртулып оламайджакълар.
36Чобанларнынъ агълавы,
къойларны бакъкъан ёлбашчыларынынъ къычырувы эшитиле.
РАББИ оларнынъ отлакъларыны ёкъ эте,
37РАББИнинъ алевли гъазабы тынч эвлерни гъайып эте.
38Арслан къобасындан киби,
РАББИ Озь еринден чыкъты,
Онынъ алевли гъазабындан ве ёкъ этиджи ачувындан
оларнынъ топрагъы сахрагъа чевирильди.