‏ Jeremiah 31

Исраильнинъ сюргюнликтен къайтувы

1– О заман, – дей РАББИ, –
Мен бутюн Исраиль къабилелерининъ Алласы оладжагъым,
ве олар Меним халкъым оладжакълар.
2РАББИ бойле дей:
– Къылычтан сагъ къалгъан халкъ
сахрада мерамет тапты.
Исраильге раатлыкъ бермеге кетем.
3 ^aРАББИ манъа узакътан корюнди ве деди:
– Сени эбедий севгинен севдим,
онынъ ичюн санъа мерамет эйлейим.
4 ^bСени кене къавийлештиририм,
ве къавий олурсынъ, эй, Исраиль къызы!
Кене къолунъа дарелерни аладжакъсынъ,
къуванчнен ойнайджакъсынъ.
5 ^cСамарие дагъларында кене юзюм багъларыны осьтюреджексинъ,
оларны сачкъанлар мейваларыны ашайджакълар.
6 ^dОйле кунь келеджек ки,
Эфраим дагъындаки къаравуллар:
«Турунъыз, Сионгъа котерилейик,
РАББИге, бизим Алламызгъа кетейик!»
7РАББИ бойле дей:
– Якъуп акъкъында къуванчнен йырланъыз!
Халкълар башы огюнде къычырынъыз!
Халкъларгъа бильдиринъиз,
Раббини макътанъыз;
«Я РАББИ, халкъынъны,
къалгъан Исраильни къуртар!» – денъиз.
8 ^eБакъынъыз! Мен оларны шималь мемлекетинден кетиририм,
ер юзюнинъ кенарларындан топларым.
Оларнынъ арасында кёр ве топаллар,
юклю ве локъса апайлар оладжакътыр.
Буюк джемаат олып, къайтаджакълар.
9 ^fАгълай-агълай келеджеклер,
мерамет этип, оларны алып кетиреджегим,
сув бою дос-догъру ёлдан алып келеджегим,
сюрюнмезлер.
Мен – Исраильнинъ бабасыдырым,
Эфраим – биринджи догъгъан баламдыр.
10 ^gРАББИнинъ сёзюни динъленъиз, эй, халкълар!
Четте къалгъан адаларгъа хабер этип:
«Исраильни ким дагъыткъан олса,
о да оны топлайджакъ,
чобан озь айванларыны киби,
оларны къорчалайджакъ», – айтынъыз.
11 ^hРАББИ Якъупны къуртараджакъ,
кучьлюдже олгъандан оны къорчалайджакъ.
12 ⁱОлар келеджек,
Сионнынъ тёпесинде къуванчнен къычыраджакъ,
РАББИнинъ къысметине:
богъдайгъа, янъы шарапкъа, тазе зейтюн ягъына,
къозуларгъа ве бузавларгъа къуванаджакълар.
Джанлары сувгъа тойгъан багъчаларгъа ошайджакъ,
бир даа хор олмайджакълар.
13 ^jО заман къызлар ойнап къуванаджакълар,
яшлар къартларнен берабер шенъленеджеклер,
агълавларыны къуванчкъа чевиреджегим,
гонъюллерини аладжагъым,
чеккен хорлукъларындан сонъ оларны къувандыраджагъым.
14Руханийлерни ягъгъа тойдурарым,
халкъым да бол-берекетиме тояджакъ, – дей РАББИ.

Исраильге косьтерильген Раббининъ мерамети акъкъында

15 ^kРАББИ бойле дей:
– Рама шеэринде бир сес эшитиле,
агълав ве аджджы къыямет!
Балалары артындан Рахель агълай,
тынчланмагъа истемей;
онынъ балалары ёкъ энди!
16РАББИ бойле деди:
– Агъламакътан озюнъни тут,
козьлеринъден козьяш чыкъмасын,
ишинъ ичюн мукяфат бардыр, – дей РАББИ, –
олар душман топрагъындан къайтаджакълар.
17– Келеджегинъ ичюн умют бар, – дей РАББИ, –
огъулларынъ озь топрагъына къайтаджакълар.
18 ^lЭфраимнинъ фигъан къопаргъаныны эшитем:
«Сен мени джезаладынъ,
инат бузав дайын, мен джезаландым.
Къайтар мени, ве мен къайтарым,
Сен – РАББИ, меним Алламсынъ.
19Ёлдан урулгъанымдан сонъ тёвбе эттим,
акъыл огретильгенимден сонъ озюмни янбашымдан урдым;
масхара олдым, ашаландым,
яшлыгъымда ишлеген гунам башымдадыр».
20 ^mЭфраим къыйметли огълум дегильми, аджеба?
Джан-юректен севген балам дегильми?
Онъа къаршы чокъ кере айткъан олсам да,
оны ич бир вакъыт унутмадым,
онынъ ичюн ичим-багърым яна,
онъа мерамет косьтеририм, – дей РАББИ.
21Ёл бою озюнъе косьтергичлерни ве диреклерни къой,
кеткен ёлунъа мукъайт ол!
Эй, Исраиль къызы, арткъа къайт, бу шеэрлеринъе къайт!
22 ⁿДаа чокъ долашаджакъсынъмы, имансыз къыз?
РАББИ ер юзюнде насылдыр янъы шей яратаджакъ,
апай акъайны къуртараджакъ!

Алла халкъынынъ илериде боллукъ ичинде яшайышы акъкъында

23 ^oОрдуларнынъ РАББИси, Исраильнинъ Алласы, бойле дей: – Халкъымны эсирликтен къайтаргъанымда,
Ехуда топрагъында ве шеэрлеринде кене бойле дейджеклер:
«РАББИ сени багъышласын,
эй, догърулыкъ булунгъан ер, эй, азиз дагъ!»
24Бу топракъта ехудалылар
ве оларнынъ эписи шеэрлери ерлешеджек,
топракъны ишлегенлер
ве айванларны бакъкъанлар анда юреджек.
25Болдургъанларгъа сувны береджегим,
такъаттан кесильгенлерни ашкъа тойдураджагъым.

26Бу ерде уянып, козьлеримни ачтым. Юкъум татлы эди.

27 ^p– Бакъ, ойле куньлер келеята ки, – дей РАББИ, –
Исраильни ве Ехуданы адамларгъа ве айванларгъа толдураджагъым.
28 ^qКечмиште олардан козь алмай эдим,
оларны топракътан къувалай ве ёкъ эте эдим,
ерге ура, йыкъа ве хараплай эдим.
Ойле де олардан козь алмайып,
оларны къавийлештиреджегим ве абаданлаштыраджагъым, – дей РАББИ.
29 ^r– О куньлерде энди:
«Деделери экши юзюм ашай эдилер,
балаларынынъ тишлери исе къамаша эди», – айтмазлар.
30 ^sЭр кес озь къабааты ичюн оледжек.
Ким экши юзюм ашаса, онынъ тишлери къамашаджакъ.

Янъы васиет

31 ^t– Бакъынъыз! Ойле куньлер келеята ки, – дей РАББИ, –
Исраиль ве Ехуда халкъларына янъы бир васиет береджегим.
32 ^uДеделеринъизни къолларындан тутып,
Мысыр топрагъындан чыкъаргъанда,
оларгъа бир васиет бердим.
Мен оларнынъ Сабысы олсам да ▼

▼Я да «Мен оларнынъ ишанчлы акъайы олгъаныма бакъмадан».

,
олар о васиетни боздылар, – дей РАББИ.
33 ^w– Лякин о куньлерден сонъ Исраиль халкъына башкъа васиетни береджегим, – дей РАББИ. –
Къанунымны ичлерине ерлештиреджегим,
юреклерине язаджагъым.
Мен оларнынъ Алласы оладжагъым,
олар да меним халкъым оладжакълар.
34 ^xЭндиден сонъ кимсе бири-бирине,
ич кимсе достуна: «РАББИни билинъиз», – деп акъыл огретмейджек,
олар эписи, яшы-къарты, Мени биледжеклер, – дей РАББИ.
– Мен оларнынъ къабаатларыны багъышлайджагъым,
гуналарыны да бир даа акъылыма кетирмейджегим.
35 ^yКуньдюз парылдамагъа кунешни берген,
геджеде парылдамакъ ичюн айнен йылдызларгъа низамнамелерни буюргъан,
далгъалары окюрсин деп, денъизни котерген РАББИ бойле дей.
Онынъ Ады – Ордуларнынъ РАББИсидир!
36 ^z– Бу низамнамелер денъишильмегени киби,
Исраиль халкъы да Меним халкъым эбедиен оладжакъ, – дей РАББИ.

37 ^aaРАББИ бойле дей: – Юкъарыдаки коклерни ольчемеге чареси олмаз,
ернинъ темеллери ашагъыда огренильмез;
Мен де бутюн Исраиль халкъындан
бутюн эткен ишлери ичюн вазгечмем, – дей РАББИ.

38 ^ab– Бакъынъыз, ойле куньлер келелер ки, – дей РАББИ, – Хананел къуллесинден башлап Коше Къапусына къадар шеэр РАББИнинъ Адына янъыдан къуруладжакъ. 39Ольчю йипини андан Гъарев байырына догъру чекеджеклер ве Гоат ерине буруладжакълар. 40 ^acОлюлерге ве кульге толу бутюн вадийи, Кидрон озенине баргъандже бутюн тарлалар, куньдогъушта олгъан Атлар Къапусынынъ кошесине къадар РАББИнинъ азизлиги оладжакъ. Омюрбилля харап олмайджакъ ве йыкъылмайджакъ!