k Збр 134.9
Jeremiah 32
Йирмея тарла сатын ала
1 aЦидкия онунджы йылы Ехудада падишалыкъ эткенде, Невукъаднеццар 18-инджи йылы падиша олгъанда, РАББИден Йирмеягъа хабер кельди. 2 bО заман Вавилон падишасынынъ ордусы Ерусалимни алкъада тута эди. Йирмея пейгъамбер исе Ехуда падишанынъ эвиндеки къаравуллар азбарында къапалы эди. 3Ехуданынъ падишасы Цидкия оны анда къапаткъан эди. О, Йирмеядан бойле сорады: – Не ичюн пейгъамберлик этип, бойле дейсинъ: «РАББИ айта: Бу шеэрни мытлакъа Вавилон падишасынынъ къолуна береджегим, о онынъ сабысы оладжакъ. 4Ехуданынъ падишасы Цидкия къасдийлилернинъ къолундан къуртулып оламайджакъ, о, мытлакъа Вавилон падишасынынъ къолуна бериледжек, онен юзьме-юзь лаф этеджек, козьлери де онынъ козьлерини кореджек. 5 cВавилоннынъ падишасы Цидкияны Вавилонгъа алып кетеджек, ве о, Мен онъа кельмегендже, анда къаладжакъ, – дей РАББИ. – Сиз къасдийлилернен дженк этсенъиз де, енъмейджексинъиз»? 6Йирмея джевап берди: – РАББИ манъа деди: 7 dМына, Шаллум эмдженънинъ огълу Ханамел санъа: «Анатот шеэриндеки тарламны сатын ал. Сой-соплукъ акъкъынен оны сен сатын алмакъ керексинъ», – айтмагъа янынъа келе. 8 eРАББИ айткъаны дайын, эмджемнинъ огълу Ханамел, къаравуллар азбарында яныма келип: «Биньямин топрагъындаки Анатот шеэринде ерлешкен тарламны сатын ал, – деди. – Оны сатын алмагъа ве онынъ сабысы олмагъа акъ сенинъдир. Оны сатын ал». О заман бу – РАББИнинъ сёзю олгъаныны анъладым 9ве эмджемнинъ огълу Ханамелден Анатотта ерлешкен тарланы сатын алдым. Онъа он еди кумюш ▼▼Он еди кумюш – къ. еуд. «еди шекель кумюш ве он кумюш».
чекип бердим. 10Буны кягъыткъа яздым да, печат къойдым. Шаатларны чагъырып, кумюшни теразеде чектим. 11Сонъ мен сатыш кягъытынынъ эки копиясыны: эм къанунгъа ве низамнамеге коре печат къоюлгъан копияны, эм ачыкъ къалгъан союны алдым да, 12 gМахсеянынъ торунына, Нериянынъ огълуна Барукъкъа бердим. Буны корьгенлернинъ арасында эмджемнинъ огълу Ханамел, сатыш кягъытында язгъан шаатлар ве къаравуллар азбарында отургъан бутюн ехудалылар эди. 13Эписилернинъ козьлери огюнде мен Барукъкъа бойле буюрдым: 14– Ордуларнынъ РАББИси, Исраильнинъ Алласы бойле дей: Бу языларны: эм печат къоюлгъан сатыш кягъытыны, эм ачыкъ копияны ал да, чокъ вакъыткъа бардакъкъа къой. 15Ордуларнынъ РАББИси, Исраильнинъ Алласы, бойле дей: Бу мемлекетте эвлер, тарлалар ве юзюмликлер кене сатын алынаджакълар. Йирмеянынъ дувасы
16Сатыш кягъытыны Нериянынъ огълу Барукъкъа берип, мен РАББИге дува эттим: 17 hРАББИ-ТААЛЯ! Сен буюк кучюнънен, къудретинъненкоклерни ве ер юзюни яраттынъ!
Сенинъ къолунъдан кельмейджек бир шей ёкъ!
18 iСен бинълер адамларгъа мерамет эйлейсинъ,
бабаларнынъ къабаатлары ичюн
балаларыны джезалайсынъ.
Буюк ве кучьлю Алла!
Сенинъ Адынъ – Ордуларнынъ РАББИсидир!
19 jНиетлери – буюк, ишлери – эсапсыз!
Козьлеринъ инсан огъуллары туткъан бутюн ёлларына ачыкътыр.
Эр кеске туткъан ёлуна
ве эткен ишлерине коре бересинъ!
20 kСен Мысыр топрагъында аляметлерни косьтердинъ,
аджайип ишлерни яптынъ,
бу куньге къадар эм Исраильде,
эм халкълар арасында шуны япасынъ.
Сен Озюнъе буюк Нам къазандынъ.
21 lАляметлерни косьтерип, аджайип ишлерни япып,
кучьлю къолунънен ве къудретинънен,
орталыкъта буюк къоркъу сачып,
Исраильни Мысыр топрагъындан чыкъардынъ,
22 mдеделерине бермеге ант эткен бу топракъны,
сют ве бал акъкъан мемлекетни оларгъа бердинъ.
23 nОлар келип, топракънынъ сабылары олдылар,
амма Сенинъ сёзюнъни динълемедилер,
Къанунынъа коре арекет этмедилер,
Сен оларгъа буюргъан шейлерни беджермедилер,
ве Сен бутюн бу беляларны башларына тюшюрдинъ.
24 oБакъынъыз! Шеэрни алмакъ ичюн,
диварлары янында топракъ обаларыны къурдылар;
шеэр къылычтан, ачлыкътан ве ольдюриджи хасталыкътан чекише,
онъа къаршы дженк эткен къасдийлилернинъ къолуна кече.
Бутюн Сенинъ айткъанларынъ ерине келе,
мына, Сен буны коресинъ!
25Сен де, РАББИ-ТААЛЯ, манъа:
«Тарланы озюнъе кумюшке сатын ал да,
шаатларны чагъыр», – дейсинъ,
о вакъытта исе шеэр къасдийлилернинъ къолуна кече.
Раббининъ джевабы
26 pРАББИ Йирмеягъа джевап берди: 27– Мен – РАББИм, бутюн тири джанларнынъ Алласыдырым! Меним къолумдан кельмейджек шей бармы? 28Онынъ ичюн РАББИ бойле дей: Бакъынъыз, Мен мытлакъа бу шеэрни къасдийлилерге ве Вавилоннынъ падишасына Невукъаднеццаргъа береджегим, олар оны запт этеджеклер. 29 qШеэрге къаршы дженк эткен къасдийлилер ичери киреджеклер, оны ве эвлерини якъаджакълар. Эвлерининъ дамларында Баалгъа къокъулы отларны якъа эдилер, ябанджы аллаларгъа ичимлик бахшышларыны кетире эдилер ве бойле этип, Мени ачувландырдылар. 30 rЯшлыкъ чагъындан берли Исраиль ве Ехуда огъуллары козюм огюнде тек яманлыкъ япа эдилер; къоллары япкъан ишлеринен Исраиль огъуллары Мени тек ачувландыра эдилер, – дей РАББИ. 31– Къурулгъан кунюнден башлап бугуньгедже бу шеэр Мени ачувландыра ве гъазапландыра эди, шунынъ ичюн Мен ондан юзюмни чевиреджегим. 32 sИсраиль огъуллары ве Ехуда огъуллары чокъ яманлыкъ яптылар, падишалары, башлыкълары, руханийлери, пейгъамберлери, ехудалылар ве Ерусалимде яшагъанлар Мени ачувландырдылар. 33Олар Манъа юзьлерини дегиль, аркъаларыны чевирдилер. Мен оларны огрете эдим, къайта-къайта оларны огрете эдим, олар Мени динълемей, огютлериме къулакъ асмай эдилер. 34 tАдымны ташыгъан Эвнинъ ичине олар тюрлю джиренч шейлерини къойдылар ве оны арамладылар. 35 uБен-Хинном вадийинде Баалгъа ибадет тёпелерини къурдылар, Молекке къурбан оларакъ огъулларыны ве къызларыны атеште якъа эдилер. Мен исе буны буюрмадым, олар бу писликлерни япаджакъларыны ве ехудалыларны ёлдан ураджакъларыны тюшюнмедим биле. 36 vСизлер шеэр акъкъында: «Къылычтан, ачлыкътан ве ольдюриджи хасталыкътан чекишип, шеэр Вавилоннынъ падишасына кече», – дейсинъиз. Энди РАББИ, Исраильнинъ Алласы, бойле айта: 37 w– Бакъынъыз, Мен оларны эписи мемлекетлерден, ачувнен, гъазабымнен, буюк хышымнен къувалагъан ерлерден топлайджагъым ве бу ерге къайтараджагъым, оларгъа къоркъусыз яшайыш береджегим. 38 xОлар Меним халкъым олурлар, Мен де оларнынъ Алласы оладжагъым. 39 yОларгъа бир ёл ве бир юрек береджегим; олар омюрбилля Менден къоркъаджакълар, ве бойле этип, озьлери ве эвлятлары яхшылыкъ кореджеклер. 40 zМен оларгъа эбедий васиет береджегим, оларгъа бир даа аркъамны чевирмейджегим, эр вакъыт эйилик япаджагъым, Менден ич айырылмасынлар деп, юреклерине къоркъу сачарым. 41 aaДжан-юректен оларгъа къуванаджагъым, чокъ эйилик этеджегим, оларны бу мемлекетте ерлештирип къавийлештиреджегим. 42 abРАББИ бойле дей: – Бу халкъкъа буюк яманлыкъ алып кетирдим, Мен энди оларгъа айткъан эйиликни де япаджагъым. 43Сизлер: «Бу топракъ бакъымсыз, адамсыз, айвансыз олгъан сахрадыр, къасдийлилернинъ къолуна берильгендир», – дей эдинъиз, амма бу топракъта кене тарлалар сатын аладжакълар. 44 acБиньяминнинъ топрагъында, Ерусалимнинъ чевресинде, Ехуданынъ шеэрлеринде, дагълыкъ шеэрлеринде, Шефела шеэрлеринде ве Негев шеэрлеринде кумюш берип, тарларарны сатын аладжакълар, шаатларны чагъырып, сатыш кягъытларына печат къояджакълар. Мен оларны эсирликтен къайтараджагъым, – дей РАББИ.
Copyright information for
CrhCTB