Jer 37 | CrhCTB | STEP | Ехоякимнинъ огълу Еконьядан сонъ Ёшиянынъ огълу Цидкия падиша олды. Вавилон падишасы Невукъаднеццар оны Ехуданынъ падишасы этти.

‏ Jeremiah 37

Йирмея зинданда

1 ^aЕхоякимнинъ огълу Еконьядан сонъ Ёшиянынъ огълу Цидкия падиша олды. Вавилон падишасы Невукъаднеццар оны Ехуданынъ падишасы этти. 2 ^bНе Цидкия, не хызметчилери, не мемлекетнинъ халкъы РАББИнинъ Йирмея пейгъамбер ярдымынен айткъан сёзлерине къулакъ асмадылар.

3 ^cЦидкия падиша Шелемьянынъ огълу Ехукъалны ве Маасеянынъ огълу Цефанья руханийни Йирмея пейгъамберге бойле сёзлернен ёллады: «РАББИге, бизим Алламызгъа биз акъкъында дува эт».

4 ^dО вакъыт Йирмея халкънынъ арасында сербест юре эди, оны даа зиндангъа атмагъан эдилер. 5 ^eО вакъыт фыравуннынъ ордусы Мысырдан чыкъты ве Ерусалимни алкъада туткъан къасдийлилер бу хаберни эшиткен сонъ, Ерусалимден чекильдилер.

6 ^fРАББИден Йирмея пейгъамберге хабер кельди:

7 – РАББИ, Исраильнинъ Алласы, бойле дей: Сизни Меним истегимни сорамагъа ёллагъан Ехуданынъ падишасына айтынъыз: «Мына, фыравуннынъ ордусы сизге ярдым этмек ичюн ёлгъа чыкъты, лякин аскерлер кене озь топрагъына, Мысыргъа къайтаджакъ. 8 ^gКъасдийлилер исе мында къайтып, бу шеэрге къаршы дженк этеджеклер, оны запт этеджеклер ве якъаджакълар».

9 РАББИ бойле дей: Озьлеринъизни алдатманъыз, къасдийлилер мындан кетеджек, деп тюшюнменъиз. Олар кетмейджеклер. 10 Сизге къаршы дженк эткен къасдийлилернинъ бутюн ордусыны енъген олсанъыз ве оларда тек яралы сойлары къалгъан олсалар, олар биле озь чадырындан чыкъып, бу шеэрни якъар эдилер.

11 Фыравуннынъ ордусы ичюн къасдийлилернинъ ордусы Ерусалимден чекильгенде, 12 Йирмея Ерусалимден чыкъты ве халкънынъ арасында джоюлмакъ ичюн ^{▼▼Я да «халкънынъ арасында топракъ пайыны алмакъ ичюн».}, Биньямин топрагъына кетти. 13 ⁱАмма о, Биньямин Къапусындан кечкенде, анда олгъан Хананьянынъ торуны, Шелемьянынъ огълу Иреия адлы къаравулларнынъ башлыгъы Йирмея пейгъамберни токътатып:

– Къасдийлилернинъ тарафына кечмеге истейсинъми? – деп сорады.

14 – Ялан! – деди Йирмея. – Къасдийлилернинъ тарафына кечмеге истемейим.

Амма Иреия оны динълемеди. Оны тутып, башлыкъларгъа алып кетирди. 15 ^jБашлыкълар Йирмеягъа ачувланды. Оны котеклеп, зиндангъа ташладылар, Ехонатан языджынынъ эвине къапаттылар. Бу эвни зиндан эттилер. 16 Йирмеяны зиндангъа аттылар, ве баягъы вакъыт девамында о, анда къалды. 17 ^kСонъ Цидкия адамларны ёллап, Йирмеяны кетиртти. Падиша озь сарайында:

– РАББИден насылдыр хабер бармы? – деп гизлиден ондан сорады.

– Бар, – деди Йирмея. – Сен Вавилон падишасынынъ къолуна тюшеджексинъ.

18 Сонъ Йирмея Цидкия падишадан:

– Мен сенинъ, хызметчилеринъ ве бу халкънынъ огюнде не гуна къазандым да, сиз мени зиндангъа аттынъыз? – деп сорады. 19 ^l– Сизинъ: «Вавилон падишасы сизге къаршы ве бу топракъкъа къаршы кетмез», – деп пейгъамберлик эткен пейгъамберлеринъиз къайда? 20 Шимди исе, эфендим падиша, мени динъле! Ялварувымны эшит. Мени Ехонатан языджынынъ эвине къайтарма. Ёкъса, мен анда оледжегим.

21 ^mЦидкия падишанынъ буюргъанына коре Йирмеяны къаравуллар азбарында къапаттылар. Шеэрде отьмек битмегендже, эр кунь онъа фурунджылар сокъагъындан бир пите бере эдилер. Бойледже, Йирмея къаравуллар азбарында къалды.