Jer 39 | CrhCTB | STEP | Цидкия докъузынджы йыл Ехудада падишалыкъ эткенде, онунджы айында Вавилон падишасы Невукъаднеццар бутюн ордусынен Ерусалимге кельди ве оны сарып алды.

‏ Jeremiah 39

Ерусалимнинъ йыкъылувы

1 ^aЦидкия докъузынджы йыл Ехудада падишалыкъ эткенде, онунджы айында Вавилон падишасы Невукъаднеццар бутюн ордусынен Ерусалимге кельди ве оны сарып алды. 2 ^bЦидкия падишанынъ 11-инджи йылында, дёртюнджи айнынъ докъузынджы кунюнде шеэр запт этильди. 3 Вавилон падишасынынъ эписи башлыкълары Ерусалимге кирип, Орта Къапунынъ янында ерлештилер. Анда Нергъал-Сар-Эцер, Самгъар-Нево, баш везир Сар-Секим, сераскер Нергъал-Сар-Эцер ве эписи къалгъан башлыкълар бар эдилер.

4 Ехуданынъ падишасы Цидкия ве эписи аскерлер оларны корип, къачтылар, геджесинен падишанынъ багъчасындан эки дивар арасындаки къапудан кечип, Арава ёлунен кеттилер. 5 ^cАмма къасдийлилернинъ ордусы оларнынынъ артындан къувалады ве Ерихон тегизликлеринде Цидкиянынъ артындан еттилер. Оны тутып, Вавилон падишасы Невукъаднеццаргъа, Ривла шеэрине, Хамат ерине алып кетирдилер. Анда Невукъаднеццар оны суд этти. 6 Вавилоннынъ падишасы Ривла шеэринде, Цидкиянынъ козьлери огюнде огъулларыны ольдюрди, эписи ехудалы мырзаларыны да сойды. 7 ^dЦидкиянынъ козьлерини ойды, Цидкияны бакъыр зынджырнен багълап, Вавилонгъа алып кетти. 8 ^eКъасдийлилер падишанынъ эвини ве халкънынъ эвлерини якътылар, Ерусалимнинъ диварларыны йыкътылар. 9 ^fКъаравулларнынъ башлыгъы Невузарадан шеэрде сагъ къалгъан халкъны, онынъ тарафына кечкенлерни ве башкъа адамларны Вавилонгъа сюргюн этти. 10 Бир шейлери олмагъан халкътан чыкъкъан фукъарелерни исе къаравулларнынъ башлыгъы Невузарадан Ехуда топрагъында къалдырды, эм де оларгъа юзюмликлерни ве тарлаларны берди. 11 Йирмея акъкъында исе Вавилон падишасы Невукъаднеццар къаравулларнынъ башлыгъы Невузарадангъа:

12 – Оны козь огюнъе ал, онъа бир яманлыкъ этме. О санъа не айтса, оны яп, – буюрды.

13 Къаравуллар башлыгъы Невузарадан, баш везир Невушазбан, сераскер Нергъал-Сар-Эцер ве Вавилон падишасынынъ эписи буюклери 14 ^gадамларны ёллап, къаравуллар азбарындан Йирмеяны алдылар ве Шафаннынъ торунына, Ахикъамнынъ огълу Гедальягъа оны эвине алып кетмеге буюрдылар. Бойледже, Йирмея халкъ арасында къалды.

15 ^hЙирмея даа къаравуллар азбарында къапалы олгъанда, РАББИден онъа бойле хабер кельди:

16 ⁱ– Бар да, хушлу Эвед-Мелекке айт: «Ордуларнынъ РАББИси, Исраильнинъ Алласы, бойле дей: Бакъ, бу шеэр акъкъында айткъанларымны беджереджегим. Онъа яхшылыкъ дегиль, яман беля келеджек. О куню эписи айткъанларым козюнъ огюнде беджериледжеклер. 17 ^jЛякин сени Мен о куню къуртараджагъым, – дей РАББИ, – сен къоркъкъан адамларнынъ къолуна берильмейджексинъ. 18 ^kСен Манъа ишангъанынъ ичюн, Мен сени мытлакъа къорчалайджагъым. Сен къылычтан ольмейджексинъ, джанынъны къуртараджакъсынъ, – дей РАББИ».