Jeremiah 4
Раббиге къайтынъыз!
1 a– Эй, Исраиль, сен къайткъанда,Манъа къайтаджакъсынъ, – дей РАББИ.
– Юзюмнинъ огюнден джиренч шейлерни узакълаштыргъанда,
бир даа манасыз долашмайджакъсынъ;
2 bРАББИнинъ Адынен ант этип,
акъикъатнен, адалетнен ве догърулыкънен ант этеджексинъ;
Рабби халкъларгъа яхшылыкъ этеджек,
ве олар Оны макътайджакълар.
3 cРАББИ Ехуда акъайларына
ве Ерусалим халкъына бойле дей:
– Ишлетильмеген топрагъынъызны сюрюнъиз,
тикенлер арасында сачманъыз.
4 dЕхуда акъайлары, Ерусалим халкъы!
РАББИ ичюн сюннет олунъыз,
юреклеринъизни сюннет этинъиз.
Ёкъса, гъазабым атеш киби ягъаджакъ,
яман япкъанларынъыз ичюн сёнмейип янаджакъ.
Шимальден кельген беля
5 e– Ехудада хабер этинъиз,Ерусалимде бильдиринъиз,
мемлекет бою бору чалып, айтынъыз,
бар сесинъизнен къычырынъыз:
«Топланынъыз, айдынъыз, къавийлештирильген шеэрлерге кетейик!»
6 fСионгъа сигнал беринъиз,
токътамаздан къачынъыз!
Мен шимальден беляны,
эр шейни йыкъаджакъ фелякетни алып кетиреджегим.
7 gАрслан ормандан еринден чыкъа,
халкъларны харап этмеге келе,
мемлекетинъизни бош ве бакъымсыз этмек ичюн,
озь еринден чыкъа.
Шеэрлеринъ йыкъыладжакъ,
адамсыз къаладжакъ.
8 hОнынъ ичюн чувал токъумасына сарылынъыз,
аджджы агъланъыз,
РАББИнинъ янгъан ачувы бизден къайтмайджакъ.
9– О куню, – дей РАББИ, –
падиша да, башлыкълар да рухтан тюшеджеклер,
руханийлернинъ отьлери патлайджакъ,
пейгъамберлер шашып къаладжакълар.
10 iО заман: – Ах, РАББИ-ТААЛЯ! – дедим. – Аджеба, «Сизде тынчлыкъ-аманлыкъ оладжакъ», – дегенде,
бу халкъны ве Ерусалимни алдаттынъмы?
Олар къылычтан джан береджекми?
11О заман бу халкъкъа ве Ерусалимге айтыладжакъ:
– Сахрадаки бош тёпеликлерден
халкъымнынъ къызына сыджакъ ель уфюреджек,
амма онен арманда савурмакъ,
кепекни айырмакъ мумкюн дегиль,
12 jМен ёллагъан ель бундан даа кучьлю оладжакъ,
о заман Мен сизлерни суд этеджегим.
13 kБакъынъыз, душман, булут киби, котериле,
дженк арабалары – боран кибидир,
атлары къарталлардан чабик!
Вай-вай-вай! Ёкъ оладжакъмыз!
14 lЭй, Ерусалим, къуртулмакъ ичюн,
юрегинъни яман шейлерден темизле.
Къара ниетлеринъ ичинъде даа не къадар къаладжакъ?
15Дандан бир сес эшитиле,
Эфраим дагъларындан фена хабер келе!
16Халкъларгъа бильдиринъиз,
Ерусалимни хабердар этинъиз ки,
узакъ мемлекеттен алкъагъа аладжакъ аскерлер келелер,
Ехуда шеэрлеринде къычыралар,
17 mчёль къаравуллары киби,
Ерусалимнинъ чевресини саралар.
– Шеэр Манъа къаршы чыкъты, – дей РАББИ. –
18 nБунынъ эписини башынъа
арекетлеринъ ве япкъанларынъ тюшюрдилер.
Яманлыгъынъ аджджы джеза кетирди,
юрегинъни урды.
19 oАх, ичим-багърым, ичим-багърым!
Юрегим яна, юрегим сызлай,
сусып оламайым!
Джаным боразан сесини,
дженк давушларыны эшите!
20 pБеля артындан беля келе:
бутюн мемлекет бошап къалды,
чадырларым апансыздан йыкъылды,
перделерим бир аньде ёкъ олды.
21Байракъларны даа чокъ кореджегимми,
боразан сесини не къадар эшитеджегим?
22 q– Халкъым акъылсыз,
Мени танымайлар.
Олар – акъылсыз балалар,
ич бир шейни анъламайлар.
Яманлыкъ япмагъа усталар,
яхшылыкъ этмеге исе бильмейлер.
Мемлекетнинъ йыкъылувы
23 rМен мемлекетке бакътым, о, бакъымсыз ве боштыр;кокке бакътым, ярыкъ ёкътыр.
24 sДагъларгъа бакътым,
иште, тепренелер,
бутюн байырлар къалтырайлар.
25 tБакътым, бир инсан ёкъ,
коктеки эписи къушлар къачкъанлар.
26 uБакътым, берекетли топракъ сахрагъа чевирильген,
РАББИнинъ къызгъын ачувындан
бутюн шеэрлери харап олгъандыр.
27 vРАББИ бойле дей: – Бутюн мемлекет бакъымсыз оладжакъ, амма бутюнлей йыкъылмайджакъ.
28 wМемкелет агълайджакъ,
юкъарыдаки коклер къарараджакъ.
Мен айттым, къарар эттим,
пешман этмейджегим,
ниетимден къайтмайджагъым.
29Эр шеэрнинъ халкъы атлыларнен окъчуларнынъ гудюрдисинден къачаджакъ;
кими орманларгъа кетеджек,
кими къаяларгъа тырмашаджакъ.
Эписи шеэрлер бакъымсыз къаладжакъ,
анда кимсе яшамайджакъ.
30 xЭй, сен, йыкъылгъан шеэр,
энди не япаджакъсынъ?
Ал урба кийсенъ де,
озюнъни алтын ильванларнен безетсенъ де,
козьлеринъе сурьме къойсанъ да,
бошуна озюнъни яраштырасынъ.
Ойнашларынъ сенден вазгечти,
джанынъны алмагъа истейлер.
31 yДерди туткъан къадыннынъ къычырувыны, биринджи баласыны догъгъан къадынны,
Сион къызынынъ сесини киби эшитем.
О, къолларыны узатып:
«Вай-вай-вай! Белягъа огърадым!
Мени ольдюргенлернинъ огюнде такъаттан кесильдим», – дей.
Copyright information for
CrhCTB