Jeremiah 46
Мысырнынъ харап олувы акъкъында эвельден хабер этилюв
1 aРАББИден Йирмея пейгъамберге халкълар акъкъында хабер кельди. 2 bМысыр акъкъында. Ёшиянынъ огълу Ехояким Ехудада дёртюнджи йыл падишалыкъ эткенде, Вавилоннынъ падишасы Невукъаднеццар Къаркемиш шеэри янында, Фират дерьясы янында Мысырнынъ падишасы Неконынъ ордусыны урып енъди. Неко фыравуннынъ ордусы акъкъында. 3– Буюк ве кичик къалкъанларны азырланъыз,дженк этмеге чыкъынъыз!
4Атларынъызны екинъиз,
атларгъа мининъиз!
Демир башлыкъларны кийип турынъыз,
мызракъларынъызны къайранъыз,
зырхларынъызны кийинъиз.
5 cНедир Меним корьгеним?
Олар къоркъты, арткъа чевирильди,
кучьлю аскерлери де урулды,
артына бакъмайып, къачалар,
орталыкъны къоркъу къаплады, –
дей РАББИ.
6– Аягъы тез олгъан къачып оламаз,
кучьлю къуртулмаз.
Шимальде, Фират дерьясы янында
сюрюнип йыкъылырлар.
7Нил дерьясы киби юксельген,
акъымлар киби сувлары далгъалангъан ким?
8Дерья киби юксельген Мысырдыр,
акъымлар киби сувлары далгъаланды.
О: «Котерилирим ве ер юзюни къапларым,
шеэрни ве анда яшагъанларны ёкъ этерим», – дей.
9Атлар, сычранъыз!
Ат арабалары, тез кетинъиз!
Къалкъаннен силялангъан
Хуш ве Путтан кучьлю аскерлер,
яй чеккен Луд окъчулары, огге чыкъынъыз!
10 dБу кунь – Раббининъ, Ордулар РАББИсининъ
джезасы кунюдир.
О, душманларыны джезалайджакъ,
къылычы тойгъандже ашайджакъ,
къанларыны тойып ичеджек!
Бу, шималь топракъта, Фират дерьясы янында
Раббиге, Ордулар РАББИсине, чалынгъан къурбандыр.
11 eЭй, къыз! Мысыр къызы!
Гилад дагъларына кетип, мелем ал!
Лякин бошуна иляджларны чокълаштырдынъ,
сен ичюн шифа ёкъ!
12 fХалкълар масхаралыгъынъ акъкъында эшиттилер,
къычырувларынъ ер юзюни толдурды!
Кучьлю аскерлер сюрюнди,
ерге йыкъылдылар.
Невукъаднеццарнынъ басып келюви акъкъында эвельден хабер этилюв
13Мысыр топрагъыны урмакъ ичюн Вавилон падишасы Невукъаднеццарнынъ келюви акъкъында РАББИден Йирмея пейгъамберге бойле хабер кельди: 14 g– Мысырда хабер этинъиз, Мигдолда бильдиринъиз,Ноф ве Тахпанхес шеэрлеринде бильдиринъиз!
«Турунъыз, азырланынъыз,
къылыч чевре-четинъни ашай», – айтынъыз!
15Не себептен кучьлю аскерлеринъ йыкъылды,
не ичюн аякъта турамады?
Оларны РАББИ къувалады.
16 hО, йыкъылгъанларнынъ сайысыны чокълаштырды,
олар атта бири-бирининъ устюне йыкъылып:
«Турунъыз, гъайып этиджи къылычтан сакъланып,
халкъымызгъа, тувгъан топрагъымызгъа къайтайыкъ», – дейлер.
17 iАнда бойле къычыралар:
«Фыравун, Мысырнынъ падишасы баягъы шамата котерди,
лякин келишкен вакъытны къачырды!»
18 j– Озюмнен ант этем,
– дей Падиша.
Онынъ Ады – Ордуларнынъ РАББИси.
– Дагълар арасында Тавор дагъы насыл юксек олса,
Къармел дагъы денъиз ялысында насыл буюк олса,
сизге келеджек де ойле олур!
19 kЭй, къыз! Мысырда яшагъанлар!
Сюргюнлик ичюн шейлеринъни топла!
Ноф бакъымсыз этиледжек,
адамсыз къалып, харап оладжакъ.
20 lМысыр – пек гузель бир танадыр!
Шимальден онъа къаталакъ чибини учып келеята.
21Парагъа тутулгъан аскерлери –
бесленген бузавлар киби,
лякин олар да арткъа чевирилип,
турып оламайып, къачтылар.
Башларына беля куню кельди,
джеза вакъты якъынлашты!
22Мысыр, йылан киби, сызгъырып, кете,
ордулар келе,
орманны кесиджилер онъа къаршы
балталарынен чыкъалар.
23Орманыны кестилер, – дей РАББИ. –
Чытырман олса да, оны йыкътылар.
Олар сарынчкъадан чокъ,
саймагъа чареси ёкъ!
24 mМысыр къызы масхара олды,
шималь халкъынынъ къолуна берильди.
25 nОрдуларнынъ РАББИси, Исраильнинъ Алласы, бойле дей: – Мына, Но шеэрининъ Амон алласыны, фыравунны, Мысырны, аллаларыны, падишаларыны, фыравуннен онъа ишангъанларыны джезалайджагъым. 26 oДжанларыны къыдыргъан Вавилоннынъ падишасы Невукъаднеццаргъа ве онынъ хызметчилерине оларны береджегим. Лякин ондан сонъ, эвель куньлерде олгъаны дайын, адамлар кене Мысырда яшайджакъ. 27 p– Сен исе, къулум Якъуп, къоркъма,
эй, Исраиль, отюнъ патламасын!
Бакъ! Мен сени узакъ мемлекеттен къуртараджагъым,
эвлятларынъны да эсирлик топрагъындан къайтараджагъым.
Якъуп арткъа къайтып, эсен-аман раат яшайджакъ
ве кимседен къоркъмайджакъ.
28 q– Сен исе, къулум Якъуп, къоркъма, – дей РАББИ. –
Мен сеннен!
Сени къувалагъан эписи халкъларны ёкъ этеджегим,
сени исе бутюнлей ёкъ этмейджегим.
Сени адалетнен джезалайджагъым,
джезасыз сени къалдырмайджагъым.
Copyright information for
CrhCTB