Jeremiah 48
Моав акъкъында къарар
1 aОрдуларнынъ РАББИси, Исраильнинъ Алласы, Моав акъкъында бойле дей: – Вай-вай-вай, Нево шеэри!О харап этильди!
Кирьятаим шеэри запт этилип,
масхара олды,
къалеси йыкъылып, масхара олды.
2Энди моавлыларнынъ шурети ёкъ олды;
Хешбон шеэринде:
«Айдынъыз, оларны халкълар арасындан ёкъ этейик», – деп,
оларгъа къаршы яманлыкъ япмагъа тюшюнелер.
Сен де, Мадмен шеэри, гъайып оладжакъсынъ!
Къылыч артынъдан келе!
3Хоронаим шеэринде:
«Зорбалыкъ! Эр шей харап этильди!» –
деп, ярдымгъа къычырып чагъыралар.
4Моав йыкъылды,
уфакъ балалары фигъан къопарды!
5 bЛухит ерине котерильгенде,
токътамайып агълайлар!
Хоронаимден тюшкенде,
аджджы фигъанлар эшителер!
6 cКъачынъыз, джанынъызны къуртарынъыз!
Чёльдеки тикенли чалыгъа ошайджакъсынъыз!
7 dИшлеринъе ве байлыгъынъа ишангъанынъ ичюн,
сен де запт этиледжексинъ,
Кемош алласы да озь руханийлеринен ве башлыкъларынен берабер
сюргюнликке кетеджек.
8 eЁкъ этиджи эр шеэрге келеджек,
бир шеэр къуртулмайджакъ.
Вадий гъайып оладжакъ,
тюзлюк бошап къаладжакъ, – дей РАББИ.
9– Моавнынъ къабирине чечек алып кетинъиз,
о мытлакъа бу яшайыштан кетеджектир ▼
▼Я да «учып кетсин деп, Моавгъа къанат беринъиз».
,шеэрлери къоркъунчлы шейге чевириледжек,
оларда ич кимсе яшамайджакъ.
10РАББИнинъ ишини абул-къубул эткен лянет олсун!
Къан тёкмектен къылычыны токътаткъан да лянет олсун!
11 gЯшлыгъындан берли Моав къасеветсиз эди,
боткъасыны къыбырдатмагъан,
савуттан савуткъа тёкюльмеген шарап киби эди,
сюргюнликке кетмеди.
Онынъ ичюн дадыны джоймады,
къокъусы бозулмады.
12– Лякин, бакъынъыз, – дей РАББИ, –
ойле куньлер келеята ки,
оны тёкеджек адамларны ёллайджагъым.
Онынъ савутларыны бошатаджакълар,
бардакъларыны парлайджакълар.
13 hИшангъан Бет-Эль шеэри ичюн Исраиль халкъы насыл масхара олгъан олса,
Моав да Кемош алласы ичюн ойле масхара оладжакъ.
14Сизлер бошуна: «Бизлер кучьлю аскерлер,
дженкке азыр адамлармыз», – айтасынъыз.
15 iМоав йыкъылды, шеэрлерине уджюм этильди,
энъ яхшы йигитлери къурбан кетти, –
дей Падиша, Ады – Ордуларнынъ РАББИсидир.
16Моав якъында гъайып оладжакъ,
белялар онъа ашыкъып якъынлаша!
17Къомшуларынынъ эписи ве адыны таныгъан эр кес,
агъланъыз!
«Къудрет таягъы, шуретли аса парчаланды», – денъиз.
18 jЭй, Дивон шеэринде яшагъан къыз!
Шуретли еринъден тюш,
къуру топракъ устюнде отур;
Моавны ёкъ этиджи санъа келеджек,
къалелеринъни йыкъаджакъ.
19 kЭй, Ароэрде яшагъан къыз!
Ёл кенарында тур да бакъ!
Къачкъан адамдан, къуртулгъан союндан:
«Не олды?» – деп сора.
20Моав масхара олды, харапланды.
Аджджы-аджджы агъланъыз,
Моавнынъ йыкъылгъаны акъкъында
Арнон вадийинде илян этинъиз.
21Тюзлюкке джеза кельди;
Холон, Яхца, Мефаат,
22Дивон, Нево, Бет-Диблатаим,
23Кирьятаим, Бет-Гъамул, Бет-Меон,
24Кериот, Боцра шеэрлери,
эм узакъ, эм якъын олгъан
Моав топрагъынынъ шеэрлери суд этильди.
25Моавнынъ такъаты кесильди,
кучю къырылды, – дей РАББИ.
26 lМоавны сархошлатынъыз,
РАББИге къаршы котерильди де!
Къускъагъы ичинде ятсын,
масхара олсун.
27 mТутулгъан хырсызларнынъ устюнден киби,
Исраильнинъ устюнден кульмединъми?
Не ичюн онынъ акъкъында лаф эткенде,
башынъны салладынъ?
28 nЭй, Моав адамлары!
Шеэрлеринъизни ташлап кетинъиз,
къаялар арасында сакъланынъыз!
Гогерджинлер киби олып,
тюпсюз чукъур устюнден юва япынъыз!
29 oМоавнынъ гъурурлыгъы,
буюк къопайлыгъы,
онынъ озюни юксек туткъаны,
кибирлилиги ве магърурлыгъы акъкъында,
бурнуны котергени акъкъында эшиттик.
30– Мен онынъ арсызлыгъыны билем! – дей РАББИ. –
Макътангъаны да бош, ишлери де боштыр!
31 pОнынъ ичюн Моав акъкъында агълайым,
бутюн Моав акъкъында фигъан къопарам,
Кир-Херес шеэри акъайлары артындан ынъранам.
32 qЭй, Сивма шеэрининъ юзюмлиги,
сенинъ ичюн Язер халкъындан чокъ агълайджагъым!
Пытакъларынъ денъизнинъ башкъа тарафына узанып,
Язернинъ денъизине ете эди.
Ёкъ этиджи яз махсулларынъны,
пишкен юзюминъни ёкъ этти.
33Моавнынъ багъчасындан ве топрагъындан
къуванч ве шенълик алынды.
Юзюм сыкъкъан ерлерни шарапсыз къалдырдым;
кимсе къуванчнен къычырмайып, юзюм басмай.
Адамлар къычыралар, амма къуванчнен дегиль.
34 rХешбондан Элале шеэринедже ярдымгъа чагъыралар;
Цоардан Хоронаимгедже,
Эглат-Шелишьягъадже,
тап Яхац шеэрине баргъандже къычырувлар эшитиле,
Нимримнинъ сувлары да къуруйджакъ.
35Моавда ибадет тёпелеринде къурбан чалгъанларны,
озь аллаларына къокъулы отларны якъкъанларны ёкъ этерим,
– дей РАББИ.
36– Онынъ ичюн юрегим, къавал киби,
Моав ичюн инълей,
юрегим, къавал киби,
Кир-Херес адамлары ичюн агълай.
Бутюн къазангъан байлыгъы
гъайып олды.
37 sЭр кеснинъ башы тыраш этильген,
сакъалы алынгъан,
эр кеснинъ къоллары яралангъан,
устьлерине чувал урбасы кийильген.
38 tМоавнынъ эписи дамларында
ве эписи сокъакъларында тек агълав эшитиле.
Бегенмеген савутны киби,
Мен Моавны къырдым, – дей РАББИ.
39Моав йыкъылды. Адамлар аджджы-аджджы агълай.
Аркъасыны чевирип,
насыл масхаралыкъкъа огърады!
Чевре-четтекилернинъ эписи Моавны мыскъыллай,
о, оларгъа къоркъунчлы шей олды!
40 uРАББИ бойле дей:
– Мына, бир къартал киби,
душман Моавгъа тез учаджакъ,
Моавнынъ устюнде къанатларыны ачаджакъ.
41 vМоавнынъ шеэрлери алынаджакъ,
къалелери запт этиледжек.
Дерди туткъан къадын киби,
о куню кучьлю моавлылар къалтырайджакъ.
42РАББИге къаршы котерильгени ичюн,
Моав халкъларнынъ арасындан ёкъ оладжакъ.
43 wЭй, Моавда яшагъанлар!
Къоркъу, чукъур ве къапкъан –
сенинъ къысметинъ! – дей РАББИ.
44 x– Къоркъудан къачкъан чукъургъа тюшеджек,
чукъурдан чыкъкъан къапкъангъа тюшеджек!
Моавнынъ башына
джезалав йылыны ёллайджагъым, – дей РАББИ.
45 yКъачакълар такъаттан кесилип,
Хешбон диварларынынъ талдасында токътадылар.
Амма Хешбондан атеш янды,
Сихоннынъ ортасындан алев чыкъты,
Моавнынъ четини,
инат адамларнынъ башларыны якъты.
46 zВай-вай-вай, Моав!
Кемошкъа табынгъан халкъ гъайып олды.
Огъулларынъ эсирликке кетти,
къызларынъ да алынды.
47 aaАмма сонъки куньлерде
Моавны эсирликтен къайтараджагъым, – дей РАББИ.
Моав акъкъында къарарнынъ сонъу.
Copyright information for
CrhCTB