‏ Jeremiah 49

Аммон акъкъында къарар

1 ^aАммон огъуллары акъкъында РАББИ бойле дей: – Исраильнинъ огъуллары ёкъмы, аджеба?
Ёкъмы мирасчысы?
Ойле олса, не ичюн Милкъом алласы Гъад топрагъыны запт этти?
Не ичюн онъа ибадет эткенлер Гъаднынъ шеэрлеринде яшай?
2 ^bОнынъ ичюн, – дей РАББИ, –
ойле куньлер келеяталар ки,
Аммон огъулларынынъ Рабба шеэринде
дженк давушлары эшитиледжек,
Рабба бакъымсыз байыргъа чевириледжек
янындаки шеэрлери якъыладжакъ,
ве исраиллилер эвельки сабыларына башлыкъ этеджеклер, – дей РАББИ.
3 ^c– Эй, Хешбон, агъла!
Ай шеэри харап этильди!
Рабба къызлары, ярдымгъа чагъырынъыз,
чувал токъумаларына сарылып, агъланъыз,
къораларны бойлап юрюнъиз.
Милкъом алласы
руханийлери ве башлыкъларынен берабер
сюргюнликке кетеджек.
4 ^dВадийлеринънен не макътанасынъ?
Вадийинъ гъайып оладжакъ!
Эй, саткъын къыз!
Сен байлыгъынъа ишанып:
«Манъа къаршы ким чыкъып олур?» – дей эдинъ.
5Бутюн чевре-четинъден
башынъа дешет тюшюреджегим, –
дей Ордуларнынъ РАББИ-ТААЛЯсы. –
Сизлерни къувалап, чевре-четке дагъытаджакълар,
къачкъанларны кимсе топлап оламайджакъ.
6 ^eСонъунда исе Аммон огъулларыны
эсирликтен къайтараджагъым, – дей РАББИ.

Эдом акъкъында къарар

7 ^fОрдуларнынъ РАББИси Эдом акъкъында бойле дей: – Энди Теман шеэринде акъыл къалмадымы?
Акъыллы адамларда огют биттими?
Икметлери бозулдымы?
8 ^gАркъаларынъызны чевирип, къачынъыз!
Къобаларда сакъланынъыз,
эй, Дедан топрагъында яшагъанлар!
Исавнынъ белясыны башларына тюшюреджегим.
Вакъты-саати кельди,
Мен Эдомны джезалайджагъым.
9Юзюм джыйгъанлар санъа кельсе эди,
мытлакъа бир къач салкъым къалдырыр эди.
Гедже хырсызлар кельсе эди,
керегини алыр эди.
10Мен исе Исавны чыр-чыплакъ этерим,
гизли ерлерини ачарым,
сакъланып оламайджакъ!
Эвлятлары, агъа-къардашлары, къомшулары –
эписи гъайып олды,
озьлери ёкъ олды.
11Оксюз балаларынъны ташлап кет,
Мен джанларыны сакъларым,
Манъа тул къадынларынъ да ишансын.

12 ^hРАББИ бойле дей:
– Гъазабыма толу къадеден къабаатсызлар биле ичеджеклер.
Сен исе джезадан къачынаджакъсынъмы?
Ёкъ! Джезасыз къалмайджакъсынъ!
Гъазабыма толу къадеден мытлакъа ичеджексинъ!
13 ⁱОзюмнен ант этем, – дей РАББИ, –
Боцра шеэри харап ве масхара оладжакъ,
бакъымсыз олып, оны къаргъайджакълар,
эписи шеэрлери де эбедиен йыкъыкъ оладжакълар.

14РАББИден бир хабер алдым,
халкъларгъа хаберджи ёлланды:
«Топланынъыз да, онъа къаршы кетинъиз,
дженкке чыкъынъыз!»

15– Мен сени халкълар арасында уфакъ этерим,
адамлар санъа хор бакъаджакъ.
16 ^jСен къая чатлакъларында,
байыр тёпелеринде яшадынъ,
лякин шефкъатсызлыгъынъ ве юрек къопайлыгъынъ сени алдатты.
Сен, къартал киби,
юксек ерлерде юванъны яптынъ,
амма сени андан да ашагъы тюшюририм, – дей РАББИ.
17 ^k– Эдом къоркъунчлы шейге чевириледжек,
янындан кечкен эр кес шашып къаладжакъ,
башына тюшкен беляларны корип,
тап сызгъырып аладжакъ!
18 ^lСодом, Гомора ве чевредеки шеэрлер
насыл йыкъылгъан олса, – дей РАББИ, –
анда да кимсе ерлешмейджек,
инсан огълу анда яшамайджакъ.
19 ^mИорданнынъ чалылыгъындан
ешиль отлакъларгъа арслан чыкъкъаны киби,
Мен де апансыздан оларгъа атылып,
эдомлыларны къувалайджагъым,
ёлбашчыларыны джезаларым ▼

▼Я да «сайлагъан адамымны оларгъа ёлбашчы этерим».

.
Манъа ошагъан ким бар?
Менден ким сорап олур?
Манъа къаршы тураджакъ ёлбашчы бармы?

20 ^oШунынъ ичюн Эдом акъкъында РАББИнинъ къарарыны,
Теман шеэринде яшагъанлар акъкъында ниетини эшитинъиз!
Керчектен де, къой-эчкилернинъ энъ уфакъларыны да хырсызлайджакъ,
яшагъан ерлерини бом-бош къалдыраджакълар.
21Йыкъылгъанларынынъ гудюрдисинден ер сарсыладжакъ,
ярдымгъа чагъыргъанларнынъ сеслери
тап Къызыл денъизге къадар эшитиледжек.
22 ^pО, къартал киби, котерилип, тез учаджакъ,
къанатларыны Боцранынъ устюнде ачаджакъ.
Дерди туткъан къадын киби,
о куню кучьлю эдомлылар къалтырайджакъ.

Дамаск акъкъында къарар

23 ^qДамаск акъкъында.

Хамат ве Арпад шеэрлери масхара олды;
яман бир хабер эшитип,
рухтан тюштилер,
далгъалангъан денъиз дайын,
тынчланып оламайлар.
24 ^rДамаск такъаттан кесильди,
аркъасыны чевирип, къачмагъа азырланды,
къоркъу тюбюнде къалды,
дерди туткъан къадынны киби,
оны сыкъынты ве агъры сарды.
25Насыл олды да, шуретли шеэр,
къуванчымнынъ шеэри бакъымсыз къалды?
26 ^sЯш огъланлары сокъакъларда ольдюриледжек,
о куню эписи аскерлери гъайып оладжакъ, –
дей Ордуларнынъ РАББИси.
27 ^t– Дамаскнынъ диварларыны якъаджагъым,
атеш Бен-Хададнынъ сарайларыны ёкъ этеджек.

Кедар ве Хацор халкълары акъкъында къарар

28 ^uВавилон падишасы Невукъаднеццар ургъан Хацор падишалыкълары ве Кедар акъкъында РАББИ бойле дей:

– Турунъыз, Кедаргъа къаршы чыкъынъыз,
куньдогъуш тарафында яшагъанларны ёкъ этинъиз!

29 ^vЧадырларынен къой-эчкилери тутуладжакъ,
чадыр перделери, савут-сабалары ве девелери алынаджакъ;
оларгъа: «Орталыкъны къоркъу къаплады!» – деп къычыраджакълар.

30Къачынъыз, долашынъыз,
терен чукъурларда сакъланынъыз,
эй, Хацор адамлары, – дей РАББИ. –
Вавилон падишасы Невукъаднеццар
сизге къаршы къарар чыкъарды,
яманлыкъ япмагъа тюшюнди.

31 ^wТурунъыз, эсен-аман, гъамсыз-къасеветсиз
яшагъан халкъкъа къаршы чыкъынъыз, – дей РАББИ. –
Оларнынъ не къапулары, не килитлери бар,
олар озьлери яшайлар.
32 ^xДевелери гъаниметке алынаджакъ,
къой-эчкилернинъ чокъусы хырсызланаджакъ.
Зулюф сачларыны къыркъкъанларны
ернинъ дёрт тарафына дагъытаджагъым,
эр тарафтан оларгъа беля кетиреджегим, – дей РАББИ.
33 ^yХацор шакъалларнынъ яшагъан ери оладжакъ,
эбедий сахрагъа чевириледжек,
анда кимсе ерлешмейджек,
инсан огълу анда яшамайджакъ.

Элам мемлекети акъкъында къарар

34 ^zЦидкия Ехудада падишалыкъ этип башлагъанда, РАББИден Йирмея пейгъамберге Элам акъкъында бойле хабер кельди:

35– Ордуларнынъ РАББИси бойле дей: Бакъынъыз! Мен Эламнынъ яйыны,
эсас кучюни къыраджагъым.
36 ^aaКоклернинъ дёрт тарафындан
Эламгъа къаршы дёрт ель кетиреджегим,
Эламны алып, чевре-четке дагъытаджагъым.
Къувалангъан эламлылар
чешит тюрлю халкъларнынъ арасында ерлешеджеклер.
37 ^abОйле япарым ки,
эламлылар душманлары огюнде къоркъаджакълар,
джанларыны къыдыргъанларнынъ огюнде
оларнынъ отьлери патлайджакъ,
оларгъа яман беляны, ачувымнен гъазабымны тюшюреджегим, –
дей РАББИ. –
Артларындан къылычны ёллайджагъым,
оларны бутюнлей ёкъ этеджегим.
38Эламда тахтымны къояджагъым,
андаки падишаны ве башлыкъларны ёкъ этеджегим, – дей РАББИ.
39 ^ac– Амма сонъки куньлерде
Эламны эсирликтен къайтараджагъым, – дей РАББИ.