Jer 5 | CrhCTB | STEP | – Ерусалимнинъ сокъакъларында юрюнъиз, чеврелерини бакъып, билинъиз, шеэр мейданларында къыдырынъыз. Эгер адалетли кишини, догърусыны къыдыргъан адамны тапсанъыз, бу шеэрни багъышлайджагъым.

‏ Jeremiah 5

Ерусалимнинъ гунасы

1 ^a– Ерусалимнинъ сокъакъларында юрюнъиз,
чеврелерини бакъып, билинъиз,
шеэр мейданларында къыдырынъыз.
Эгер адалетли кишини,
догърусыны къыдыргъан адамны тапсанъыз,
бу шеэрни багъышлайджагъым.
2 ^bРАББИнинъ Адынен ант этселер де,
ялан айтып емин этелер.
3 ^cЯ РАББИ, козьлеринъ акъикъатны корьмейджекми?
Сен оларны урдынъ –
олар такъаттан кесильмеди;
къырып ташладынъ –
джезаны къабул этмеге истемейлер,
таштан къатты олдылар,
тёвбе этмеге истемедилер.
4 ^dМен тюшюндим:
– Фукъаре олгъаны ичюн,
оларгъа акъыл етмей,
РАББИнинъ ёлуны, Алланынъ Къануныны бильмейлер.
5 ^eБуюк олгъанларгъа барайым да,
оларнен лаф этейим.
РАББИнинъ ёлуны,
Алланынъ Къануныны олар билелер.
Лякин олар да боюндырыкъны къырдылар,
багълавларыны узьдилер.
6 ^fОнынъ ичюн ормандан арсланлар чыкъып,
оларгъа атыладжакъ,
сахрадаки къашкъырлар парчалайджакъ,
шеэрлерининъ огюнде оларны леопардлар беклейджек,
андан чыкъкъан эр кес парчаланаджакъ.
Акъсыз ишлери пек чокълашты,
хиянетлиги пек буюк олды.

7 ^g– Насыл этип, санъа буны багъышлайым?
Огъулларынъ Менден вазгечтилер,
алла олмагъанларынен ант этип башлады.
Мен оларны тойдура эдим,
олар исе ороспулана,
топ-топ ороспуларнынъ эвлерине бара эди.
8 ^hОлар бесленген айгъырлардыр,
эр бири къомшусынынъ апайына кишней.

9 ⁱАджеба, Мен бунынъ ичюн джезаламаммы? – дей РАББИ. –
Мытлакъа оларнынъ акъларыны береджегим!

10 ^jДиварларына тырмашынъыз,
эр шейни йыкъынъыз,
амма бутюнлей ёкъ этменъиз.
Багъчаларыны харап этинъиз,
олар энди РАББИнинъ дегиль.
11 Исраиль халкъы ве Ехуда халкъы
Манъа хаинлик эттилер, – дей РАББИ.

12 ^kОлар РАББИ акъкъында ялан айттылар:
«РАББИ ёкъ, башымызгъа беля тюшмез,
не къылыч, не ачлыкъ корьмейджекмиз.
13 ^lПейгъамберлер – ель кибидир,
оларда РАББИнинъ сёзлери дегиль,
оларгъа оларнынъ айткъанлары япыладжакъ».

14 ^mШунынъ ичюн РАББИ, Ордуларнынъ Алласы бойле дей:
– Бойле сёзлер айткъанлары ичюн,
сёзюм агъзынъда атеш оладжакъ,
бу халкъны да одун киби этеджегим,
ве атеш оларны якъып ёкъ этеджек.

15 ⁿБакъынъыз, Исраиль халкъы!
Узакътан сизге къаршы бир халкъны,
кучьлю, къадимий бир халкъны кетиреджегим,
– дей РАББИ. –
Сиз оларнынъ тилини бильмезсиз,
не дегенлерини анъламазсыз.
16 ^oАскерлернинъ эписи – кучьлю ве юреклидир,
окълукълары ачыкъ бир мезар кибидир.
17 ^pОлар бутюн берекетинъизни ве ашларынъызны ашайджакълар,
огъулларынъызны ве къызларынъызны ольдюреджеклер,
къой-эчкилеринъизни ве малынъызны ашап битиреджеклер,
юзюм ве инджирлеринъизни ашап къояджакълар,
сиз ишангъан къавийлештирильген шеэрлеринъизни
къылычларнен йыкътыраджакълар.

18 – Амма о куньлерде биле сизни бутюнлей ёкъ этмейджегим, – дей РАББИ. 19 ^q– «РАББИ, бизим Алламыз бизге буларны не ичюн япты?» – деп сорагъанларгъа бойле джевап бер: «Менден вазгечтинъиз, мемлекетинъизде ябанджы аллаларгъа хызмет эттинъиз, шунынъ ичюн де сизинъ олмагъан мемлекетте ябанджы аллаларгъа хызмет этеджексинъиз».

Алла Озь халкъыны сакъындыра

20 Якъупнынъ халкъына илян этинъиз,
Ехуда топрагъында хабер этинъиз:
21 ^r– Эй, акъылсыз ве таш юрекли халкъ,
козьлери олгъан, амма корьмеген,
къулакълары олгъан, амма эшитмеген адамлар,
буны динъленъиз:
22 ^sМенден къоркъмакъ керексинъиз,
Меним огюме къалтырамакъ меджбурсынъыз.
Денъизге эбедий сынъыр оларакъ,
къумны къойдым,
денъиз сынъырыны кечалмаз.
Далгъалары огге ынтылсалар да,
кечип оламаз,
гудюрдеселер де,
сынъырдан чыкъып оламаз.
23 ^tАмма бу халкънынъ юреги инат ве исьянджы,
аркъасыны чевирип, озь ёлларындан кеттилер;
24 ^u«РАББИ, бизим Алламыз озь вакътында,
эм баарьде, эм кузьде бизге ягъмурларны бере,
оракъ вакъты ичюн афталарны сайлай.
Айдынъыз, Ондан къоркъайыкъ!» – деп тюшюнмедилер.
25 Сизден буларны акъсыз япкъанларынъыз алды,
бу эйиликни сизден гуналарынъыз узакълаштырды.
26 ^vХалкъымнынъ арасында яман адамлар бар.
Къуш тутмакъ ичюн ерде яткъанлар киби,
къапкъан къоялар, адамларны туталар.
27 Къушларгъа толу бир къафес киби,
эвлери ялангъа толудыр,
онынъ ичюн олар юкселип, байыдылар,
28 ^wшишманлады ве семирдилер,
яманлыкъ япмагъа уста олдылар,
оксюзнинъ давасыны адалетсиз суд этип,
арам къазанч алалар,
фукъарелернинъ ишини адалетнен чезмейлер.
29 ^xАджеба, Мен бунынъ ичюн джезаламаммы? – дей РАББИ. –
Бойле халкънынъ акъларыны бермемми?
30 Бу мемлекетте шашыладжакъ ве къоркъунчлы шейлер япыла:
31 ^yпейгъамберлер ялан пейгъамберлик этелер,
оларнынъ ярдымынен руханийлер башлыкъ этелер,
халкъым да буны бегене.
Амма сонъунда не япаджакъсынъыз?