Jeremiah 50
Вавилон акъкъында къарар
1 aВавилон ве къасдийлилернинъ топрагъы акъкъында РАББИнинъ Йирмея пейгъамбернен берильген хабери: 2 b– Халкъларгъа хабер этинъиз ве бильдиринъиз!Байракъ котерип, илян этинъиз, гизлеменъиз!
«Вавилон алынды, – айтынъыз, –
Бел алласы масхара олды,
Меродакъ алласы йыкъылды,
путлары масхара олды,
аллалары чиль-парча олды».
3 cШимальден онъа къаршы бир халкъ котерильди,
о, онынъ топрагъыны бакъымсыз этеджек,
анда не адамлар, не айванлар яшайджакъ,
эписи долашып кетеджек.
Эсирликтен къайтув акъкъында
4 d– О куньлерде ве о заманларда, – дей РАББИ, –Ехуда огъулларынен берабер Исраиль огъуллары келеджек,
агълап-сызлап юреджеклер,
РАББИни, оларнынъ Алласыны, къыдыраджакълар.
5 eСионгъа кеткен ёл акъкъында сорайджакълар,
юзьлерини онъа тараф чевирип:
«Айдынъыз, РАББИге къошулайыкъ,
эбедий унутылмыз васиетини къабул этейик», – дейджеклер.
6 f– Халкъым гъайып олгъан къойлар киби эди,
чобанлары оларны ёлдан урдылар,
дагъларда дагъыттылар;
олар дагъ-байыр долашып,
тургъан ерлерини унуттылар.
7Оларны тапкъан эр кес оларны ашай эди,
оларны хорлагъанлар:
«Бизлер къабаатлы дегильмиз!
Олар озьлери РАББИнинъ огюнде гуна яптылар,
адалет чокърагъы, баба-деделерининъ ишанчы огюнде,
РАББИнинъ огюнде гуна ишледилер», – дей эдилер.
8 gВавилондан къачынъыз,
къасдийлилернинъ топрагъындан кетинъиз,
къойларнынъ башында текелер киби олунъыз.
9 hМына, Мен буюк халкъларны котерип ве топлап,
оларны шималь топрагъындан Вавилонгъа кетиреджегим.
Олар шеэрге къаршы ерлешип,
оны запт этеджеклер.
Окълары – уста аскерлер кибидир,
бири гъаниметсиз къайтмайджакъ.
10Къасдийлилернинъ мемлекети оларнынъ гъанимети оладжакъ,
оны чайпагъанлар малына тояджакълар, – дей РАББИ.
11Сизлер шенъленип, къувана эдинъиз,
Меним топрагъымны харап эттинъиз.
Таналар киби, отлакъ устюнде
къуванчнен секире эдинъиз,
дженк атлары дайын, кишней эдинъиз.
12Сизинъ ананъыз пек утанаджакъ,
сизни тапкъан къадын масхара оладжакъ.
Бакъынъыз! О халкъларнынъ келеджеги – сахра,
къуру топракъ ве сувсуз чёльдир.
13 iРАББИнинъ гъазабындан анда кимсе яшамайджакъ,
о, бакъымсыз ерге чевириледжек.
Вавилоннынъ янындан кечкен эр кес шашып къаладжакъ,
беляларыны корьген сызгъырып аладжакъ.
14 jВавилоннынъ чевресинде сырагъа тизилинъиз;
яйны чеккенлернинъ эписи,
окъларны аджымаздан, онъа атынъыз!
О, РАББИге къаршы гуна ишледи.
15 kЭр тарафтан онъа къаршы багъырынъыз!
Шеэр ярдым сорай, амма къуллелери бозулды,
диварлары ерге йыкътырылды.
Бу – РАББИнинъ джезасы!
Оны джезаланъыз!
О насыл япкъан олса,
сиз онъа да айны япынъыз!
16 lВавилонда эм сачкъанларны,
эм оракъ вакътында берекет джыйгъанны ёкъ этинъиз.
Гъайып этиджи къылычтан къоркъып,
эр бири озь халкъына къайтсын,
эр бири озь топрагъына къачсын.
Исраильнинъ къайтувы акъкъында
17 mИсраиль – дагъылгъан къойлар кибидир,оларны арсланлар къувалады.
Эвель Ашшурнынъ падишасы оны ашай эди,
бу сонъкиси исе,
Вавилон падишасы Невукъаднеццар
онынъ кемиклерини къырды.
18 nОнынъ ичюн Ордуларнынъ РАББИси, Исраильнинъ Алласы, бойле дей: – Мына, Ашшурнынъ падишасыны насыл джезалагъан олсам,
Вавилон падишасыны ве онынъ мемлекетини де ойле джезаларым.
19 oИсраильни отлагъына къайтараджагъым,
ве о, Къармел дагъларында ве Башан еринде отлайджакъ.
Эфраим ве Гилад дагъларында
джаныны тойдураджакъ.
20 pО куньлерде ве о заманларда, – дей РАББИ, –
Исраильнинъ къабаатыны къыдырсалар да,
о, ич бир ерде олмайджакъ;
Ехуданынъ гуналарыны къыдырсалар да,
оларны тапамайджакълар.
Мен сагъ къалдыргъанларымны багъышлайджагъым.
21 qМератаим топрагъына къаршы дженкнен кет,
Пекъод адамларыны джезала,
оларны ольдюр, артларындан бир шей къалдырма, – дей РАББИ. –
Мен санъа бутюн буюргъанларымны беджер.
22 rМемлекетте дженк шаматасы эшитиле,
орталыкъ пек харап этиле.
23 sБутюн ер юзюни ургъан токъмакъ къырылды,
чиль-парча олды!
Халкълар арасында Вавилон къоркъунчлы шейге чевирильди!
24Сенинъ ичюн къапкъан къойдым, Вавилон,
бильмезден, сен къапкъангъа тутулдынъ!
РАББИге къаршы чыкъкъанынъ ичюн,
Сени тапып туттылар!
25 tРАББИ озь силяханесини ачты,
андан гъазабынынъ силяларыны алды,
Рабби, Ордулар РАББИсининъ
къасдийлилернинъ мемлекетинде япаджакъ иши бар.
26Эписи тарафлардан онъа барынъыз,
анбарларыны ачынъыз,
богъдай кебени киби, эписини бир ерге топланъыз,
оны бутюнлей ёкъ этинъиз,
ондан бир шей къалдырманъыз.
27Эписи бугъаларыны ольдюринъиз,
союлмагъа кетсинлер!
Башларына беля!
Оларнынъ куню,
джеза аладжакъ заманлары кельди!
28 uВавилон топрагъындан къуртулгъанларнынъ,
къачкъанларнынъ сеслери эшитиле.
Олар Сионда РАББИнинъ джезасы акъкъында,
Сарайы ичюн Алламызнынъ джезасы акъкъында хабер этелер.
29 vВавилонгъа къаршы эписи окъчуларны чагъырынъыз!
Онынъ чевресинде ордунен ерлешинъиз,
андан кимсе къачып къуртулмасын.
Ишлерине коре акъларыны беринъиз,
о, насыл арекет эткен олса,
онъа да айнысыны япынъыз.
О, РАББИге, Исраильнинъ Азизине къаршы
арсызлыкънен котерильди.
30 wШунынъ ичюн яш огъланлары сокъакъларында сериледжек,
эписи аскерлер о куню ёкъ этиледжеклер, – дей РАББИ.
31– Бакъ, Мен санъа къаршы чыкъам, эй, макътанчакъ!
– дей Ордуларнынъ РАББИ-ТААЛЯсы. –
Сенинъ кунюнъ,
джеза вакътынъ кельди.
32 xМакътанчакъ сюрюнир ве йыкъылыр,
оны кимсе котермейджек.
Шеэрлерини атешке береджегим,
бутюн чевресини якъып ёкъ этеджек.
33 yОрдуларнынъ РАББИси бойле дей: – Исраильнинъ ве Ехуданынъ огъулларыны хорлайлар;
исраиллилерни ве ехудалыларны эсирликке алгъанлар оларны эсирликте туталар,
йибермеге истемейлер.
34Амма оларнынъ Къуртарыджысы кучьлюдир,
Онынъ Ады – Ордуларнынъ РАББИси.
О, оларнынъ ишини мытлакъа чезеджек,
топракъларына раатлыкъ береджек,
Вавилонда яшагъанларны сарсытаджакъ.
35– Къасдийлилерге ве Вавилонда яшагъанларгъа,
башлыкъларгъа ве акъыллы адамларгъа къаршы
къылыч котерильди! – дей РАББИ.
36– Ялан пейгъамберлерге къаршы къылыч котериледжек,
ве олар акъылдан таяджакълар.
Аскерлерине къаршы къылыч чыкъаджакъ,
ве олар рухтан тюшеджеклер.
37 zАтларына ве арабаларына къаршы,
араларында яшагъан чешит халкъларгъа къаршы къылыч котериледжек,
ве олар къадынлар киби оладжакълар.
Байлыкълары устюне къылыч котерильген,
шу байлыкълар хырсызланаджакъ.
38 aaСувларына къургъакълыкъ келеджек,
ве олар сувсуз къаладжакъ;
бу – путлар топрагъыдыр,
къоркъунчлы путлардан олар делиреджеклер.
39 abАнда чёль махлюкълары шакъалларнен бирликте,
ве девекъушуларнынъ балалары яшайджакъ.
Эбедиен ич кимсе анда яшамайджакъ,
несильден несильге топракъ адамсыз къаладжакъ.
40 acАлла Содомнен Гомораны ве къомшу шеэрлерини
насыл йыкъкъан олса, – дей РАББИ, –
мында да бир адам яшамайджакъ,
инсан огълу ерлешмейджек.
41 adБакъынъыз! Шимальден бир халкъ,
буюк бир миллет келе.
Ернинъ кенарларындан
чокъ падишалар котерилелер,
42къолларында яй ве мызракъ туталар,
олар шефкъатсыз ве мераметсиздир.
Сеслери, денъиз киби, шамата къопаралар;
аскерлер атларында секирелер,
бир адам киби, сыра-сыра тизилелер,
санъа къаршы, эй, Вавилон халкъы,
дженкнен чыкъалар.
43 aeВавилон падишасы олар акъкъында хабер алды,
ве эллеринде такъат къалмады.
Оны агъры сарды,
ве догъургъан къадынны киби,
оны дерди тутты.
44 afИорданнынъ чалылыгъындан
ешиль отлакъларгъа арслан чыкъкъаны киби,
Мен де апансыздан оларгъа атылып,
къасдийлилерни къувалайджагъым,
ёлбашчыларыны джезаларым ▼
▼Я да «сайлагъан адамымны оларгъа ёлбашчы этерим».
.Манъа ошагъан ким бар?
Менден ким сорап олур?
Манъа къаршы тураджакъ ёлбашчы бармы?
45 ahШунынъ ичюн Вавилон акъкъында РАББИнинъ къарарыны,
къасдийлилернинъ топрагъы акъкъында ниетини эшитинъиз!
Керчектен де, къой-эчкилернинъ энъ уфакъларыны да хырсызлайджакъ,
яшагъан ерлерини бом-бош къалдыраджакълар.
46Вавилон йыкъылувынынъ гудюрдисинден ер сарсыладжакъ,
ярдымгъа къычырувларнынъ сеслери
халкъларнынъ арасында эшитиледжек.
Copyright information for
CrhCTB