Jeremiah 6
Ерусалимнинъ алкъагъа алынувы
1 aЭй, Биньяминнинъ балалары, Ерусалимден къачынъыз!Текъоада боразан чалынъыз!
Бет-Хаккеремде атешнен бир сигнал беринъиз,
шимальден яманлыкъ, буюк бир къырылув якъынлаша.
2Дюльбер ве назлы Сион къызыны ёкъ этеджегим.
3Чобанлар озь айванларынен онъа келеджеклер,
чевресинде чадырларыны къураджакълар,
эр кес озь айванларыны отлатаджакъ.
4 b– Онъа къаршы азиз дженкке азырланынъыз,
турунъыз, уйледе ёлгъа чыкъайыкъ!
– Вай-вай-вай, башымызгъа беля!
Кунь къарарып башлады,
акъшам кольгелери кет-кете узаналар.
5– Айды, турунъыз, гедже де ёлгъа чыкъайыкъ,
къалелерини харап этейик!
6 cОрдуларнынъ РАББИси бойле дей:
– Тереклерини кесинъиз,
Ерусалимге къаршы уджюм обаларыны япынъыз.
Бу шеэр джезаланаджакъ,
ичи эр тюрлю зорбалыкъкъа толу.
7 dЧокъракъ сувны фышкъырткъаны дайын,
Ерусалим де яманлыкъны фышкъырта.
Анда зулум ве хырсызлыкъ токътамай,
адамларнынъ азаплары ве яралары эр вакъыт козюм огюндедир.
8Эй, Ерусалим! Джезагъа къулакъ ас,
ёкъса, Мен сенден узакълашырым,
сени бакъымсыз топракъкъа чевиририм,
анда кимсе яшамайджакъ.
Исраильнинъ ялан ве кяр къыдырмаларында къабаатланмасы
9Ордуларнынъ РАББИси бойле дей:– Сонъки салкъымына къадар юзюм джыйылгъаны киби,
Исраильде къалгъанларны да ойле топлайджакълар.
Юзюм джыйгъан бирев киби,
къолларынъны пытакъларгъа узат.
10 e– Эшитсинлер деп, кимнен лаф этейим?
Кимни тенбиелейим?
Къулакълары къапалы, эшитип оламайлар,
РАББИнинъ сёзлерини динълемеге истемейлер,
оларны бегенмейлер.
11 fМен РАББИнинъ ачувына толудырым,
оны ичимде тутып оламайым.
– Сокъакъта оны балаларгъа,
топлангъан йигитлернинъ устюне ягъдыр.
Апайнен акъай да,
къартларнен къарт деделер де тутуладжакъ.
12 gЭвлери, тарлалары ве апайлары
башкъаларнынъ къолуна кечеджек.
Къолумны мемлекетте яшагъанларгъа къаршы узатаджагъым, –
дей РАББИ.
13 h– Эм кучюги, эм буюги –
эр кес арам къазанчны къыдыралар;
эм пейгъамберлер, эм руханийлер –
эписи алдаталар.
14 iХалкъымнынъ джан яраларыны тек сёзде яхшы этелер;
«Аманлыкъ! Аманлыкъ!» – дейлер,
амма аманлыкъ ёкъ.
15 jПис ишлерни япкъанда, утандылармы?
Ёкъ! Ич утанмайып, къызарып бозармайлар да!
Онынъ ичюн тюшкенлернинъ арасына тюшеджеклер,
джезанен кельгенимде,
ерге йыкъыладжакълар, – дей РАББИ.
16 kРАББИ бойле дей:
– Туткъан ёлларынъызда токътанъыз,
бакъынъыз, эвельки ёллар акъкъында сораштырынъыз,
догъру ёл къайда олгъаныны тапынъыз да,
о ёлнен кетинъиз.
О заман джанларынъыз ичюн
раатлыкъ ерини тападжакъсынъыз.
Амма олар:
«О ёлнен кетмейджекмиз», – дедилер.
17 lСизге къаравуллар къойып:
«Боразан сесини динъленъиз», – дедим,
амма олар: «Динълемейджекмиз», – дедилер.
18Бойлеликнен, миллетлер, динъленъиз!
Эй, джемаат, башларына нелер келеджегини билинъиз!
19 mДинъле, мемлекет!
Мына, бу халкъкъа яман беляны ёллайджагъым,
къара фикирлерининъ акъларыны кетиреджегим.
Сёзлериме къулакъ асмадылар,
Къанунымны ред эттилер де.
20 nШевадан кетирильген къокъулы май,
узакъ бир мемлекеттен кельген къокъулы къамыш
Манъа не керек?
Бутюнлей якъыладжакъ къурбанларынъызны къабул этмейим,
къурбан ве бахшышларынъызны бегенмейим.
21 oБунынъ ичюн РАББИ бойле дей:
– Бу халкънынъ огюне ёлдан ураджакъ шейлерни къояджагъым,
бабалар да, огъуллар да оларгъа сюрюнеджеклер,
къомшу да достунен берабер гъайып оладжакъ.
Шимальден кельген беля акъкъында
22 pРАББИ бойле дей:– Иште, шимальден бир халкъ келе,
дюньянынъ кенарындан кучьлю миллет котериле,
23къолларында мызракънен яй туталар,
олар шефкъатсыз ве мераметсизлер,
сеслери денъиз гудюрдиси кибидир.
Сеннен дженк этмек ичюн, эй, Сион къызы,
бир адам киби тизилип, ат чаптыралар.
24 q– Олар акъкъында хабер кельгенинен,
рухтан тюштик.
Догъургъан къадынны киби,
бизни агъры ве дерт сарды.
25 rТарлагъа чыкъманъыз, ёл бою юрменъиз!
Душман къылычны котерди,
орталыкъны къоркъу къаплады.
26 sЭй, халкъымнынъ къызы!
Чувал токъумасына сарыл,
тозгъа йыкъыл.
Бирден-бир огълунъны джойгъан киби,
аджджы-аджджы агъла;
гъайып этиджи бизге апансыздан келеджек.
27 t– Халкъымнынъ ёлларыны сынап, бильмек ичюн,
сени оларнынъ арасына ерлештирдим,
бир къале киби эттим.
28Олар эписи ёлдан урулгъан инатлардыр,
башкъаларны яманлап яшайлар.
Олар бакъыр ве демирдир,
эписи бозукъ арекет этелер.
29Корюк уфюре-уфюре,
къуршунны атеште ирите,
амма иритиджи бошуна гъайрет этти,
яманлар айырылмадылар.
30 uОларгъа «ред этильген кумюш» дейджеклер;
РАББИ оларны ред этти.
Copyright information for
CrhCTB