Job 1 | CrhCTB | STEP | Уц топрагъында Эюп адлы бир адам яшай эди. Къусурсыз, догъру адам олып, о, Алладан къоркъа ве яманлыкътан къача эди.

‏ Job 1

Эюп акъкъында

1 ^aУц топрагъында Эюп адлы бир адам яшай эди. Къусурсыз, догъру адам олып, о, Алладан къоркъа ве яманлыкътан къача эди. 2 Онынъ еди огълу ве учь къызы бар эди. 3 ^bОнынъ даа 7 000 къой-эчкилери, 3 000 девеси, 500 чифт бугъасы, 500 эшеги ве чокътан-чокъ хызметчилери бар эди. Куньдогъушта яшагъанларнынъ арасында шу акъай энъ намлы адам эди.

4 Огъуллары топлашып, озь эвлеринде невбетнен байрамлар япа эдилер ве учь къызкъардашларыны озьлеринен берабер ашап-ичмеге чагъыра эдилер. 5 ^cБайрамларынынъ куньлери биткенинен, Эюп эр вакъыт огъулларыны чагъыртып, оларны темизлеп, Алланынъ огюнде азиз эте эди. Саба эрте турып, о, эр бир огълунынъ адындан бутюнлей якъыладжакъ къурбанлар кетире эди, чюнки: «Бельки, огъулларым Алла акъкъында яман сёзлер тюшюнип, гуна къазангъандырлар», – деп тюшюне эди. Эюп эр вакъыт ойле япа эди.

Алланынъ Шейтаннен биринджи субети

6 ^dБир кунь Алланынъ огъуллары ^{▼▼Бельки, мында Алла яраткъан мелеклер акъкъында лаф этиле.} РАББИнинъ огюне кельгенде, Шейтан ^{▼▼Шейтан – къ. еуд. мында «сатан» сёзю къулланыла. О, «душман» манасыны ташый.} да оларнен берабер кельди. 7 ^gРАББИ Шейтандан:

– Къайдан кельдинъ? – деп сорады.

Шейтан:

– Ер юзюни доланып кельдим, – деп джевап берди РАББИге.

8 РАББИ Шейтангъа:

– Къулум Эюпны корьдинъми? – деди. – Дюньяда онынъ киби адам ёкъ. Къусурсыз, догъру бир адамдыр. О, Алладан къоркъа ве яманлыкътан къача.

9 Шейтан РАББИге:

– Эюп Алладан къоркъкъанындан файда корьмейми? – деп джевап берди. 10 ^h– Сен оны, эвини ве бутюн барлыкъ-вариетини эр тарафлама къорчаламайсынъмы? Онынъ япкъан эр шейини Сен багъышладынъ, ве айванлары бутюн ер юзюнде чокълаштылар. 11 ⁱАмма къолунъны узатып, онынъ эр шейине зарар кетирсенъ, о, Сени ачыкъ яманлайджакъ!

12 О вакъыт РАББИ Шейтангъа:

– Яхшы, онынъ бутюн малы-мулькюнен не япмагъа истесенъ, яп, янъгъыз озюне тийме, – деди.

Сонъра Шейтан РАББИнинъ огюнден кетти.

Эюпнынъ биринджи сыналувы

13 Бир кунь Эюпнынъ огъулларынен къызлары буюк агъасынынъ эвинде аш ашап шарап иче эдилер. 14 Бир хаберджи Эюпкъа келип, бойле деди:

15 ^j– Биз огюзлернен топракъны сюре эдик, янларымызда эшеклер отлай эди. Бирден шевалылар бизге атылып, айванларынъны тутып алдылар, хызметчилеринъни исе къылычнен ольдюрдилер. Янъгъыз мен къуртулдым ве санъа бу хаберни кетирдим.

16 ^kО сёзюни битирмезден, башкъа бир хаберджи келип:

– Алланынъ атеши коктен тюшип, къой-эчкилернен берабер хызметчилеринъни якъып ташлады. Янъгъыз мен къуртулдым ве санъа бу хаберни кетирдим, – деди.

17 ^lО сёзюни битирмезден, башкъа бир хаберджи келип:

– Къасдийлилер учь тарафтан кельдилер ве девелерге атылып, оларны тутып алдылар, хызметчилеринъни исе къылычнен ольдюрдилер. Янъгъыз мен къуртулдым ве санъа бу хаберни кетирдим, – деди.

18 О сёзюни битирмезден, башкъа бир хаберджи келип:

– Огъулларынънен къызларынъ буюк огълунънынъ эвинде аш ашап шарап ичкенлеринде, 19 апансыздан сахра тарафтан буюк боран къопып, дёрт тарафтан эвге урды ве эвни йыкъты. Эв йыкъылды, ве балаларынънен хызметчилеринъ ольди. Янъгъыз мен къуртулдым ве санъа бу хаберни кетирдим, – деди.

20 ^mО заман Эюп турды, урбасыны йыртты, сачларыны кести де, ерге тюшип, Аллагъа ибадет этти 21 ⁿве бойле деди: – Бу дюньягъа чыплакъ кельдим,
мындан чыплакъ да кетеджегим.
РАББИ берди, РАББИ алды,
РАББИнинъ Ады мубарек олсун!

22 Башына тюшкенлерине бакъмадан, Эюп гуна ишлемеди ве Алланы къабаатламады.