‏ Job 14

Адамнынъ омюри къыскъа

1 ^aКъадын догъгъан адам аз кунь яшай,
олар да гъамгъа толудыр.
2 ^bЧечек киби ачып солар,
кольге киби, къачып гъайып этер.
3Бойле адамгъа тикилип бакъасынъмы?
Мени судгъа чагъырасынъмы?
4 ^cКирли адамдан ким темиз олып догъар?
Ич кимсе!
5Адамнынъ куньлерини бельгилединъ,
айларнынъ сайысыны тайинлединъ,
кечип оламайджакъ сынъырыны Сен онъа къойдынъ.
6 ^dШунынъ ичюн ондан юзюнъни чевир,
къалдыр оны озь алына,
о, иш кунюнинъ сонъуны беклеген ыргъаткъа ошап,
оледжек кунюни корьмеге истемесин.

Эюпнынъ шикяетине коре, Алла онынъ умютлерини ёкъ эте

7Бир терек ичюн умют бардыр:
кесильсе биле, янъыдан джанланып,
эп бир фидан берер.
8Тамыры ерде къартайып,
кутюги топракъта ольсе биле,
9сув къокъусыны алыр-алмаз филисленир,
бир яш фидан киби пытакъланыр.
10Адам исе къуветсиз олып, олер,
гъайып олур, ондан бир шей къалмаз.
11 ^eСувлар бувгъа чевирилип, денъизден учар,
озен суву къуруп кетер.
12 ^fАдам да ойле, ятар ве бир даа турмаз,
коклер тургъандже уянмаз,
юкъусындан уяндырылмаз.

13 ^gАх, мени олюлер дюньясында гизлегейдинъ,
гъазабынъ кечкендже, мени сакълагъайдынъ,
белли вакъыттан сонъ исе мени акъылгъа кетиргейдинъ!
14 ^hАдам ольген сонъ, сагъ олурмы?
Хызметимнинъ бутюн куньлеринде
денъишмелер вакътыны беклерим.
15 ⁱКъолларынънен яраткъанынъны корьмеге истесенъ,
Сен чагъыргъанда, мен джевап берерим.
16 ^jЭнди исе Сен адымларымны саясынъ,
ве гуна япаджагъымны беклемейсинъ.
17Торбада бир шей сакълагъанлары киби,
Сен де меним акъсызлыгъымны сакълагъайдынъ,
къабаатымны къапаткъайдынъ.

18Амма дагъ йыкъылып этрафларгъа дагъыла,
къая еринден коче,
19сув ташларны ашай,
сув ташкъыны тоз-топракъны алып кете.
Ойле де Сен адамнынъ умютини ёкъ этерсинъ.
20Сен адамны енъерсинъ, ве о, бу дюньядан кетер.
Бет-сымасыны денъиштирип,
Сен оны узакъкъа ёлларсынъ.
21 ^kБалалары сайгъы корьсе, онынъ хабери олмаз,
олар ашалансалар, о, шуны бильмез.
22Тек беденининъ агъыраджагъыны,
джанынынъ азап чекеджегини дуяр.