‏ Job 15

Элифазнынъ экинджи лафы

Инсафлы адам ёкъ

1 ^aТеманлы Элифаз бойле джевап берди:

2 ^b– Акъыллы адам ель бошлугъына джевап берерми?
Къарныны сыджакъ шаркъий ельге толдурырмы?
3Файдасыз лафларнен, къуветсиз сёзлернен
озь ишини къорчалармы?
4Эбет, сен къоркъуны джойдынъ
ве Алланынъ огюнде тюшюнмекни аз бир шей сайдынъ.
5Къабаатынъ агъзынъны бойле ёлгъа къойды,
ве сен айнеджилернинъ тилини сайладынъ.
6 ^cОзь агъзынъ сени къабаатлай,
мен дегиль, тилинъ санъа къаршы чыкъа.

7 ^dБиринджи догъгъан адам сенсинъми, аджеба?
Я байырлардан эвель яратылгъан эдинъми?
8 ^eАлланынъ огреткенини динълединъми?
Акъыл сабысы тек сен олдынъмы?
9 ^fБиз бильмеген шейден сен не билесинъ?
Биз анъламагъандан да сен нени анъладынъ?
10Арамызда чал да бар,
бабанъдан буюк къарт да бар.
11Алла берген гонъюль
ве йымшакъ лафлары санъа етерлик дегильми?
12Юрегинъ сени алып кеткен ер недир?
Нечюн козьлеринъ ачувнен айлана?
13Нечюн Аллагъа къаршы чыкъасынъ?
Нечюн бойле лафлар айтасынъ?

14 ^gАдам недир? О, темиз олмакъ мумкюнми?
Къадын догъгъан бирев инсафлы ола билирми?
15 ^hБакъ, Алла азиз мелеклерине биле ишанмаз,
коклер де Онынъ козюнде айдын дегиль.
16 ⁱСув ичкени киби, акъсызлыкъны япкъан адам
о къадар бетер джиренч ве бозукътыр.

Имансызларнынъ пайы

17Мен анълатырым, сен мени динъле,
корьгенлеримни айтып берерим.
18 ^jБуны акъыллы адамлар айта эди,
бабалары буны гизлемей эди.
19Топракъ янъгъыз оларгъа берильген эди,
араларында ябанджы юрмей эди.
20Яман адам омюрбилля хорланыр,
хорлайыджы къач йыл яшаса да,
омюри ойле оладжакътыр.
21Дешет сеслери къулагъындадыр,
аманлыкъ вакътында айдутлар онъа атылыр.
22Къаранлыкътан къуртулып оладжагъына ишанмаз,
даима огюнде къылычны корер.
23Долашып, отьмек тилимини къыдырыр,
къаранлыкъ куню якъын олгъаныны билир.
24Ёкъсуллыкъ ве сыкъынты отюни патлатыр,
урушкъа азыр бир падиша киби оны енъер.
25Чюнки о, Аллагъа къаршы къол котерип,
Къудретлиге къаршы чыкъты,
26къалын къалкъаныны котерип,
Онъа къаршы юзьсюзликнен атылды.
27 ^kОнынъ бетини ягъ къаплады,
янбашларыны ягъ басты.
28Шунынъ ичюн о, хараплангъан шеэрлерде,
отурылмаз эвлерде,
йыкъылаяткъан ерлерде яшайджакъ.
29О, зенгин олмайджакъ,
байлыгъы сакъланмайджакъ,
ер юзюнде берекети де олмайджакъ.
30 ^lКъаранлыкътан къуртулмайджакъ,
атеш онынъ филислерини къурутаджакъ,
ель эсип, оны ёкъ этеджек.
31О, бош шейге ишанмасын, озюни алдатмасын;
ондан о, тек бош шей аладжакъ.
32 ^mО, вакъытсыз къуругъан терек киби солып къаладжакъ,
ве пытакълары бир даа ешермейджек.
33Юзюм кутюги киби, о, чий мейвасыны тюшюрир,
зейтюн тереги киби, чечегини дагъытыр.
34 ⁿБойледже алласыз адамнынъ топлашувы бош къалыр,
къапар алгъанларнынъ чадырларыны атеш якъып ёкъ этер.
35 ^oОлар беля тюшюнип, яманлыкъ догъар,
къарынлары да алдав азырлар.