a Эюп 2.11; 11.1
b Баш 2.7; Текр 4.32
c Еш 14.13-14
d Збр 82.11
e Еш 29.7
f Эюп 7.8, 10
g Збр 9.28
h Эюп 16.13
i Эюп 15.34; Збр 20.10; Еуд 12.29
j Эюп 27.13; 31.2

‏ Job 20

Цофарнынъ экинджи лафы

1 aНаамалы Цофар бойле джевап берди:

2– Мени къасеветлендирген тюшюнджелер джевап бермеге меджбур этелер,
юрегим мени айтмагъа ашыкътыра.
 3Мени масхара эткенини эшиттим,
анълав рухунен мен джевап берерим.

Яман адамларнынъ келеджеги

4 bБильмейсинъми, аджеба?
Эвель-эзельден берли,
адам ер юзюнде яратылгъанындан берли,
 5яман адамларнынъ шенълиги къыскъадыр,
алласызларнынъ къуванчы бир аньдир.
 6 cБуюклиги коклерге юксельсе де,
башы булутларгъа тийсе биле,
 7 dозь пислиги киби, о, эбедиен гъайып оладжакъ,
оны корьгенлер: «Къайдадыр о?» – деп сорайджакълар.
 8 eТюш киби, учаджакъ, оны тапмазлар,
гедже руясы киби, ёкъ оладжакъ.
 9 fОны корьген козьлер бир даа оны корьмейджек,
яшагъан ерлери онъа бакъмайджакъ.
 10Балалары фукъарелернинъ мераметини къыдыраджакъ,
хырсызлагъаныны озь къолунен къайтараджакъ.
 11Кемиклери яш къуветке толу олгъанда,
онен берабер топракъта ятаджакъ.

12 gЯманлыкъ агъзында татлы корюнсе де,
оны тилининъ тюбюне гизлесе биле,
 13оны тутып, ташламаса да,
агъзынынъ ичинде оны сакъласа биле,
 14бойле аш онынъ ичинде,
къарнында йылан зеэрине чевириледжек.
 15Юткъан байлыгъыны къусаджакъ,
Алла зенгинлигини къурсагъындан зорлап чыкъараджакъ.
 16Кобранынъ зеэрини о, эмеджек,
йылан тиши оны ольдюреджек.
 17Чокъракъларны, бал ве сют акъкъан озенлерни
о, корьмейджек.
 18Арам къазанчыны
ашамайып кери къайтараджакъ.
Байлыгъына коре акъкъы оладжакъ,
лякин о, къуванмайджакъ.
 19Чюнки ёкъсулларны хорлап къувалады,
озю къурмагъан эвлерни запт этти.
 20Онынъ нефси тоймакъ бильмеди,
къызгъанчлыгъында кимсени аджымады.
 21Ачкозьлюгинден бир шей къуртулып оламады,
шунынъ ичюн байлыгъы къатты турамаз.
 22Барлыкъ ичинде олгъанда, о, сыкъынтыгъа огърайджакъ,
эр хорлангъаннынъ къолу онъа къаршы котериледжек.
 23Къарныны бутюнлей толдурмакъ ичюн,
Алла онъа къызгъын ачувыны ёллайджакъ,
устюне ягъмур киби ягъдыраджакъ.
 24О, демир силядан къачса,
бакъыр яйдан окъ оны тешип кечеджек.
 25 hОкъ оны урып, аркъасындан чыкъаджакъ,
о зафра иле парылдап чыкъаджакъ,
олюм къоркъусы башына тюшеджек.
 26 iКъап-къара къаранлыкъ оны гизли беклейджек,
уфюрильмеген атеш оны ашап битиреджек,
чадырында къалгъанларнынъ башына
яманлыкъ тюшеджек.
 27Коклер акъсызлыгъыны ачаджакъ,
ер юзю онъа къаршы чыкъаджакъ.
 28Эвининъ берекети гъайып оладжакъ,
Алла гъазабынынъ кунюнде эр шейи ирип кетеджек.
 29 jБудыр яман адамнынъ Алладан аладжакъ къысмети,
будыр Алланынъ онъа береджек пайы.
Copyright information for CrhCTB