Job 21 | CrhCTB | STEP | Эюп бойле джевап берди:

‏ Job 21

Эюпнынъ джевабы

1 Эюп бойле джевап берди:

2 – Сёзюмни дикъкъатнен динъленъиз,
бойле этип, манъа гонъюль беринъиз.
3 ^aСабыр этинъиз, мен айтайым,
мен айткъан сонъ, мыскъылланъыз.

4 Айткъанларым адамгъамы, аджеба?
Нечюн сабырсызланмайым?
5 ^bМанъа бакъынъыз да, къоркъу тюбюне къалынъыз,
элинъизнен агъзынъызны къапатынъыз.
6 Буны тюшюнгенде, ичимни къоркъу сара,
вуджудым титремеге башлай.

Эюп яман адамлар бахтлы олгъанлары акъкъында айта

7 ^cЯман адамлар не ичюн яшай берелер?
Омюрлери узакъ олып,
кучьлери де арта.
8 Балалары эсен-аман олып, янларында,
торунлары козьлери огюнде.
9 Эвлери къоркъудан узакъ,
Алланынъ джезасы оларгъа тиймей.
10 Бугъаларнынъ чифтлешмеси ич бошкъа чыкъмаз,
сыгъырлары эп бузавлай, ич ташламаз.
11 Балалары, къойлар киби, секирелер,
кучюк эвлятлары ойнайлар.
12 Даре ве сантырнынъ авасына тюркю йырлайлар,
къавал сесине къуваналар.
13 Куньлерини бахыт ичинде кечирелер,
ве бир аньде олюлернинъ дюньясына кечелер.
14 ^dАллагъа: «Бизден узакъ тур! – дейлер.
– Сенинъ истеклеринъни огренмеге истемеймиз.
15 ^eКъудретли Алла ким олгъан?
Не ичюн онъа хызмет этейик?
Онъа дува эткенде не файда?»
16 ^fКоресинъми, бахытлары къолларында дегильми?
Лякин яман адамларнынъ огюти менден узакъ олсун.

17 ^gКъач кере яман адамларнынъ лампады сёне,
башларына беля тюше?
Алла ачувында оларгъа азап береми?
18 ^hОлар ель къувалагъан тобан киби,
боран учургъан саман киби олурлар.
19 ⁱАлла яман адамнынъ джезасыны балаларына берерми?
Озь башына тюшюрсин,
насыл олгъаныны бильсин.
20 ^jБелясыны озь козьлеринен корьсюн,
Къудретли Алланынъ гъазабыны ичсин.
21 Чюнки сайылы айлары сонъуна еткен сонъ,
артындан къалгъан эви ичюн неге къайгъы чексин?

22 ^kАлла юкъарыда олгъанларны суд эте,
лякин Онъа ким акъыл огретип олур?
23 Бирлери сап-сагълам олып олер,
бус-бутюн раат ве къайгъысыз.
24 Ичи-багъры ягъ толу,
кемиклери кучьке толу.
25 Башкъалары къасеветке толу олер,
эйиликнинъ дадыны бильмеден.
26 Топракъта берабер ятарлар,
устьлерини къуртлар къаплар.
27 Манъа къаршы тизген тюшюнджелеринъизни,
сизинъ ниетлеринъизни билем.
28 «Мырзанынъ эви къайда? – дерсинъиз.
– Яман адамларнынъ чадырлары не ерде?»
29 Узакъ мемлекетлерге баргъанлардан ич сорамадынъызмы?
Оларнынъ хаберлерине къулакъ асмадынъызмы?
30 ^lБеля куню яман адам къорчаланыр,
гъазап куню о сакъланып къалыр ^{▼▼Даа бойле терджиме этмеге мумкюн: «Яман адам гъайып олув кунь ичюн сакъланыр, гъазап куню оларны огге чыкъарырлар».}.
31 ⁿКим оны япкъанлары ичюн бетине бакъып къабаатлар?
Ким япкъанынынъ къаршылыгъыны онъа берер?
32 Оны мезарлыкъкъа алып кетеджеклер,
къабири башында къаравул къояджакълар.
33 Вадий топрагъы онъа йымшакъ олур.
Артындан бир сюрю адам кетер,
огюнден кеткенлер де сайысыздыр.

34 Бош лафларнен манъа гонъюль бермеге истейсинъизми?
Джевапларынъыз ялангъа толудыр.