‏ Job 27

Эюпнынъ сонъки айткъанлары

1Эюп лафыны кене девам этип, бойле деди:

2 ^a– Манъа адалет косьтермеген Алланынъ огюнде,
джанымны ынджыткъан Къудретлининъ огюнде ант этем:
3 ^bМен сагъ олып, нефес алгъаныма къадар,
ичимде Алла берген яшайыш руху олгъанына къадар,
4агъзымдан яман сёз чыкъмайджакъ,
тилим ялан айтмайджакъ.
5Сизни ич бир вакъыт акълы саймайджагъым,
олерим, амма инсафлы олгъанымдан вазгечмейджегим.
6Акъикъатымда къатты тураджагъым,
ондан вазгечмейджегим,
яшагъан куньлерим ичюн юрегим мени сёгмейджек.

Яман адамларнынъ устюнден Алланынъ суду

7Душманларым къабаатлы сайсын,
манъа къаршы тургъанлар акъсызлыкъ япкъанлар киби олсун.
8 ^cАлласыз адам неге ишаныр?
Алла оны ёкъ этер, онынъ джаныны алыр!
9 ^dБашына беля кельгенде,
Алла онынъ ярдымгъа чагъыргъаныны эшитирми?
10Ойле адам Къудретлиде къуванч къыдырырмы?
Эр заман Аллагъа ялварырмы?

11Алланынъ къолунда не олгъаныны сизге хабер этеджегим,
Къудретлининъ барлыгъыны гизлемейджегим.
12Сиз эпинъиз буны корьдинъиз,
ойле олса, нечюн о къадар бош лафлар этесинъиз?

13 ^eЯман адамнынъ Алладан аладжакъ пайы,
хорлагъаннынъ Къудретли береджек къысмети бойле:
14 ^fогъланлары чокъ олса да, къылычнен ольдюриледжек,
эвлятлары отьмекке тоймайджакъ,
15 ^gсагъ къалгъанларны олюм мезаргъа тюшюреджек,
артларындан тул апайлары агъламайджакъ.
16 ^hО, бир оба топракъ киби кумюш топласа да,
чокъ чамур киби урбалар азырласа да,
17 ⁱонынъ азырлагъаныны догъру адам киеджек,
кумюш къабаатсызнынъ пайы оладжакъ.
18 ^jСюме киби, эвини къура,
яшагъан ери къаравул япкъан чалашкъа ошай.
19 ^kБай олып ятса да, зенгин олып уянмаз,
козьлерини ачкъанда, эписи ёкъ олып кеткендир.
20Къоркъулар оны, буюк сувлар киби, басар,
боран оны гедже алып къачар,
21 ^lкуньдогъуш ели учып, оны котерир,
еринден алып, фуртунадан алып кетер,
22онъа атылыр ве ич аджымаз,
ельнинъ кучюнден о, мытлакъа къачмагъа тырышыр.
23 ^mОны мыскъыллап, артындан сызгъырып,
ель оны еринден къувалар.