‏ Job 33

Элиху Эюпкъа мураджаат эте

1Шимди сёзюмни динъле, Эюп,
айтаджакъ эр шейиме къулакъ ас.
2Мына, агъзымны ачтым,
тилим дудакъларымнен айтарлар.
3Сёзлерим догъру юректен чыкъар,
дудакъларым бильгенлеримни ачыкъ айтар.
4 ^aМени Алланынъ Руху яратты,
Къудретлининъ нефеси манъа омюр берди.
5Элинъден кельсе, манъа джевап бер,
азырлан ве къаршымда тур.
6 ^bАлланынъ огюнде мен де сен кибидирим ▼

▼Я да «Мына, айткъанынъа коре, мен Алланынъ еринедирим».

,
мен де чамурдан яратылдым.
7 ^dОнынъ ичюн дешетим сени къоркъузып оламаз,
къолум санъа агъыр кельмез.

8Айткъанларынъ аля даа къулакъларымда,
сёзлеринъни мен яхшы эшиттим:
9 ^e«Мен темизим, менде акъсызлыкъ ёкъ,
саф адамым мен, къабаатым да ёкъ.
10 ^fАлла исе манъа къаршы чыкъты,
мени душман ерине корьди.
11 ^gАякъларымны бир къалыпкъа къойды,
меним эр арекетимни козете».

12Мында янъыласынъ, дейим санъа.
Алла адамдан буюктир.
13 ^hНечюн Онен давалашмагъа истейсинъ?
О, эткенлери ичюн сенинъ огюнъде джевапкяр дегиль.
14Алла бир кере айтар.
Эгер адам анъламаса,
Алла даа бир кере анълатыр ▼

▼Я да «Алла бир-эки кере айтса да, Оны анъламайлар».

.
15 ^jТюште, гедже руясында,
адамларны терен юкъу баскъанда,
олар ятакъта яткъанларында,
16 ^kо вакъыт Алла къулакъларына айтар,
огютинен оларгъа ачыкъ анълатыр,
17оларны япкъан яманлыкъларындан къайтармагъа,
адамдан кибирлигини узакълаштырмагъа,
18джаныны мезардан къорчаламагъа,
омюрини къылычтан къуртармагъа истер ▼

▼Я да «онынъ омрюне озенден кечмеге ёл бермемек». Даа 36.12 бакъ.

.
19 ^mЯ да адам озь ятагъында хасталыгъынен,
кемиклерининъ сонъсуз агърысынен джезаланыр.
20 ⁿО заман омюри отьмектен,
джаны исе энъ севген ашындан ред этер.
21Эти ирип кетер, корюнмез олур,
эвель корюнмеген кемиклери тюртип чыкъар,
22ве джаны мезаргъа,
омюри олюмге якъынлашыр.

Адамларны къуртармакъ ичюн, Алла мелеклерни ёллай

23 ^oЛякин бинъ мелектен
онынъ тарафыны туткъан бир мелек олса,
ве о, адамгъа догъру ёлны косьтерсе ▼

▼Я да «о адамнынъ догърулыгъы акъкъында айтса».

,
24 ^qонъа мерамет косьтерсе ве:
«Оны мезардан къуртар,
мен онынъ ичюн одеме таптым», – десе,
25 ^rо заман адамнынъ тени огълан тенинден тазе олур,
ве о, яшлыкъ куньлерине къайтар.
26 ^sО, Аллагъа дува этер,
ве Алла ондан разы олур.
Алланынъ юзюни корип къуваныр,
ве Алла онынъ догърулыгъыны къайтарыр.
27Сонъ адамларнынъ огюнде бойле айтаджакъ:
«Гуна къазандым, догъру лаф ерине ялан айттым,
амма манъа джеза берильмеди.
28 ^tО, джанымны мезардан къуртарды,
манъа ярыкъны корьмеге ёл берди».

29Буларнынъ эписини Алла адамгъа
эки-учь кере япар,
30 ^uджаныны мезардан къуртармагъа,
оны омюр ярыгъынен айдынлатмагъа истер.

31Яхшы динъле, Эюп, къулакъ ас,
сен индеме, мен айтаджагъым.
32Айтаджакъ бир шейинъ олса, айт,
сени акъламагъа истейим.
33Ёкъса, энди мени динъле,
индеме де, санъа акъыл огретирим.