‏ Job 38

Алла Эюпкъа джевап бере

1 ^aРАББИ бораннынъ ичинден Эюпкъа бойле джевап берди:

2 ^b– Бильгисиз сёзлернен
Меним япкъанларыма шубеленген бу адам кимдир?
3 ^cШимди эркек киби, азырлан да,
Мен сорайым, сен анълат.

Денъиз ве ер юзю акъкъында

4 ^dМен дюньянынъ темелини къойгъанда,
сен къайда эдинъ?
Эгер бильсенъ, айт.
5Онынъ ольчюлерини ким бельгиледи? Билесинъми?
Оны ольчеп, устюнден йипни ким чекти?
6– 7 ^eНенинъ устюне темеллери къоюлды?
Саба йылдызлары бирликте къувангъанынен,
Алланынъ эписи огъуллары севинчлеринден къычыргъанынен,
ким темельташыны къойды?

8 ^fДенъиз теренликтен фышкъырып чыкъкъанда,
онынъ къапуларыны ким къапатты?
9О вакъыт Мен оны булутларнен, урбанен киби, сардым,
къою къаранлыкънен, къундакъкъа саргъан киби сардым,
10онъа сынъырларыны къойдым,
къапуларынен мандалларыны ерлештирдим.
11«Бу ерге къадар келип токътайджакъсынъ,
гъурурлы далгъаларынъ бу ерде токътап къаладжакъ», – дедим.

Танъ, къаранлыкъ ве олюлернинъ дюньясы акъкъында

12Омюринъде сабагъа буюрдынъмы?
Танъгъа ерини косьтердинъми?
13Ер юзюнинъ уджларыны тутып,
андаки яман адамларны силькитмеге,
14печат чамурны денъиштиргени киби,
ер юзюни денъиштирмеге,
оны чешит ренкли урбаны киби, донатмагъа,
15 ^gяман адамларнынъ ярыгъыны алмагъа,
къолларынынъ кучюни ёкъ этмеге танъгъа айттынъмы?

16Денъизнинъ чокъракъларына далдынъмы?
Теренликнинъ тюбюнде юрдинъми?
17Олюм къапулары сенинъ огюнъде ачылдымы?
Олюм кольгесининъ къапуларыны корьдинъми?
18Дюньянынъ кенишлигини огрендинъми?
Эгер буларнынъ эписини бильсенъ, айт.

19Ярыкъ булунгъан ерге ёл къайда?
Къаранлыкънынъ чети де къаерде?
20Онынъ сынъырларына барып еттинъ, эбет?
Эвине кеткен ёлны билесинъ?
21Шуны билесинъ,
чюнки санки о заманда энди догъдынъ!
Йылларынънынъ сайысы да пек буюктир!

Коклер акъкъында

22 ^hКъаргъа толу анбарларгъа кирдинъми?
Бурчакъ сакълангъан ерни корьдинъми?
23 ⁱМен оларны сыкъынты куньлери ичюн,
уруш ве дженк куньлери ичюн сакълайым.
24Яшын парылдагъан ёлу къайда?
Куньдогъуш елининъ ер юзюнде эскен ёлу къаерде?
25 ^jЯгъмур тамчылары акъсын деп,
ёлны ким ача?
Гудюрдили яшынгъа ёлуны ким косьтере?
26 ^kСонъ ягъмур бакъымсыз топракъларгъа,
адам яшамагъан чёльге ягъа,
27сахраны ве чёльни сувгъа тойдура
ве отны осьтюре.
28 ^lЯгъмурнынъ бабасы бармы?
Чыкъ тамчыларыны ким яратыр?
29 ^mБуз кимнинъ къурсагъындан чыкъар?
Коктен тюшкен къыравны ким догъар?
30 ⁿСувлар таш киби къаттылашыр,
терен сувларнынъ устю бузлап къалыр.

31 ^oУлькер йылдызларыны багълап олурсынъмы?
Орионнынъ багъларыны чезерсинъми?
32 ^pМевсимлеринде йылдыз такъымларыны чыкъарып олурсынъмы?
Джетемен йылдыз уюрине ёл косьтерирсинъми?
33 ^qКоклернинъ низамнамелерини билесинъми?
Ер юзюнде Онынъ акимдарлыгъыны къурып олурсынъмы?

34Башынъа номай ягъмур ягъсын деп,
булутларгъа сесинъни эшиттирирсинъми?
35Яшынлар йибергенинъе коре кетерлерми?
Санъа: «Бизлер мындамыз», – деп айтарлармы?
36Юрекке акъыл ким къойды?
Акъылгъа анълавны ким берди? ▼

▼Я да «Къара лейлекке акъыл, хоразгъа анълавны ким берди?»

37Булутларны саймагъа кимнинъ акъылы етер?
Кок савутларыны авдарып,
38тозны ятыштырып,
ер юзюни къурутып,
топракъ томарларыны ким япып олур?

Кийик айванларнынъ омюри акъкъында

39– 40 ^sАрслан сакъланып яткъанда,
онъа кийик айванны тутып олурсынъмы?
Балалары ювасында, я да талда тюбюнде раатлангъанда,
оларнынъ къурсакъларыны тойдурырсынъмы?
^tКъузгъуннынъ балалары ашсыз вакътында анда-мында атылгъанда,
Алланы ярдымгъа чагъыргъанда,
къузгъунгъа ашайджакъ ашыны ким азырлай?
41