‏ Job 39

1 ^aДагъ эчкилерининъ не вакъыт догъаджагъыны билесинъми?
Кийик сыгъыннынъ балалагъаныны корьдинъми?
2Юклюлерининъ айларыны сайып олурсынъмы?
Догъаджакъ вакъытларыны билесинъми?
3Чёкип, балаларыны догъарлар,
юклеринден къуртулырлар.
4Балалары кучьке кирип, къырда осерлер,
кетер, бир даа къайтмазлар.

5Кийик эшекни ким бошатып йиберди?
Ким онынъ багълавларыны чезди?
6Юрт оларакъ онъа чёльни,
мескен оларакъ тузлу топракъны бердим.
7Шеэрдеки къалабалыкъкъа о кулер,
чобаннынъ къычыргъаныны эшитмез.
8Отлагъанда, дагъларны доланыр,
эр тюрлю ешиллик къыдырыр.

9Кийик бугъа санъа хызмет этмеге истерми?
Ашлавынънынъ янында о, геджени кечирирми?
10Сабаннен баразна ачсын деп,
оны йипнен багълап олурсынъмы?
Артынъдан кетип, топракъны уфатырмы?
11Кучю чокъ олгъаны ичюн,
умютинъни онъа багъларсынъмы?
Озь ишинъни онъа ишанырсынъмы?
12Урлугъынъны санъа къайтарып,
богъдайынъны арманынъа топлайджагъында эминсинъми?

Девекъушу, ат ве къыргъый акъкъында

13Девекъушу къанатларынен къувана-къувана ура,
амма олар лейлекнинъ къанаты ве пуфы киби оламаз.
14Девекъушу йымырталарыны ерге къояр,
оларны къумда къыздырыр,
15аякъ астында эзиледжеклерини,
кийик айванлар таптайджакъларыны тюшюнмез.
16 ^bО, балаларына, озюнки дегиль киби, серт бакъар,
чеккен замети бошуна кетеджегинден къоркъмаз.
17Чюнки Алла онъа акъыл огретмеди,
анълавдан пай бермеди.
18Лякин къанатларыны керип чапмакъ ичюн котерильгенде,
атнен атлыгъа кулер.

19Аткъа кучь берген,
бойнуна ялын кийдирген сенсинъми?
20 ^cОны сарынчкъа киби секирмеге огреткен сенсинъми?
Бурун къапакъларынынъ хырылдысынен къоркъу сачар!
21Аякълары топракъны басар,
кучюнден севинчнен джошар,
силягъа къаршы чыкъар.
22Телюкеге кулер, ич бир шейден къоркъмаз,
къылыч огюнде арткъа адым атмаз.
23Атнынъ устюнде окълукъ жанъгъырдар,
мызракъ ве къылыч парылдар.
24 ^dАфакъаны къайнагъанда,
о ерни тепинип, тез секире,
бору чалгъанда, еринде турамаз.
25Бору чалгъанда, о: «И-го-го», – деп кишнер,
дженк къокъусыны, ёлбашчыларнынъ гурьлеген сесини,
къычыргъанларыны узакътан дуяр.

26Къыргъый сенинъ акъылынънен учармы,
къанатларыны дженюпке догъру ачармы?
27Къартал сенинъ эмиринъе коре тёпеге котерилирми,
буюргъанынъа коре ювасыны юксекликте къурармы?
28О къаяда, кескин ташларнынъ кенарында,
янына барылмаз ерлерде яшай.
29Ашайджагъыны андан къаравлар,
козьлери узакъ корелер.
30Онынъ балалары къаннен бесленир,
олюлер къайда олса, о да андадыр.

Алла Эюпны джевап бермеге чагъыра

31РАББИ Эюпкъа лафыны бойле девам этти:

32 ^e– Къудретли Алланен давалашкъан адам
Оны догъру ёлгъа къойып олурмы?
Алланы къабаатлагъан джевап берсин.

33О заман Эюп РАББИге бойле джевап берди:

34 ^f– Мына, мен мискин бир инсаным,
Санъа насыл джевап берип олурым?
Агъзымны къолумнен къапатырым.
Бир кере агъзымны ачтым –
бир даа джевап бермем,
экинджи кере айттым,
амма башкъа бир шей къошмам.
35