Job 42 | CrhCTB | STEP | О заман Эюп РАББИге бойле джевап берди:

‏ Job 42

Эюп тёвбе эте

1 О заман Эюп РАББИге бойле джевап берди:

2 ^a– Сен эр шейни япып оладжагъынъны билем,
ич бир ниетинъ токътатылмаз.
3 ^b«Бильгисиз сёзлернен
Меним япкъанларыма шубеленген бу адам кимдир?» – деп сорадынъ.
Бойледже, мен анъламайып айта эдим,
аджайип ишлеринъ акъкъында бильмей эдим.
4 ^c«Энди динъле, Мен лаф этейим, – дединъ.
– Мен сорайым, сен джевап бер».
5 Сенинъ акъкъынъда къулакънен эшиткен эдим,
шимди исе козьлеримнен Сени корьдим.
6 ^dШунынъ ичюн озюмни корьмеге козюм ёкъ ^{▼▼Я да «айткъанымдан къайтам».},
тоз ве куль ичинде тёвбе этем.

Нетидже

7 ^fРАББИ бойле сёзлерни Эюпкъа айткъан сонъ, теманлы Элифазгъа бойле деди:

– Санъа ве эки достунъа ачувландым, чюнки къулум Эюп догъру лаф эткен олса да, сиз Меним акъкъымда догъру лаф этмединъиз. 8 ^gШимди еди бузав ве еди къочкъар алынъыз, къулум Эюпкъа кетинъиз ве оларны озьлеринъиз ичюн бутюнлей якъыладжакъ къурбан оларакъ кетиринъиз. Къулум Эюп сиз ичюн дува этер. Мен онынъ дувасыны къабул этерим ве, сизлер Меним акъкъымда къулум Эюп киби догъру айтмасанъыз да, сизни джезаламам.

9 ^hТеманлы Элифаз, шуалы Билдад ве наамалы Цофар кетип, РАББИнинъ оларгъа буюргъаныны яптылар. РАББИ Эюпнынъ дувасыны къабул этти.

10 ⁱЭюп достлары ичюн дува эткенден сонъ, РАББИ онъа эвельки барлыгъыны къайтарды. Бундан гъайры, РАББИ Эюпта олгъанынынъ эки къат зиядесини берди. 11 ^jО вакъыт бутюн огълан къардашлары ве къызкъардашлары, эвельки танышларнынъ эписи Эюпнынъ янына кельди ве эвинде онен берабер байрам яптылар. Къасеветлеринен пайлашып, РАББИ Эюпнынъ башына тюшюрген белялары ичюн гонълюни ала эдилер. Эр бири онъа пара ^{▼▼Пара – къ. еуд. «бир кесита», агъырлыгъы ве дегери бельгисиз олгъан бир къадимий парадыр.} ве бир алтын юзюк берди.

12 РАББИ Эюпнынъ сонъки йылларыны берекетли япып, эвелькисинден чокъ багъышлады. Онынъ 14 000 къой-эчкиси, 6 000 девеси, 1 000 чифт бугъасы, 1 000 эшеги олды. 13 ^lОнынъ даа еди огълу ве учь къызы олды. 14 Биринджи къызынынъ адыны «Гогерджин», экинджисининъ «Хош Къокъулы Чечек», учюнджисининъ «Кирпиклернинъ Парылдысы» ^{▼▼Къ. еуд. «Емима», «Кеция», «Керен-Хаппук».} адыны къойды. 15 ⁿМемлекетнинъ ич бир еринде Эюпнынъ къызлары къадар дюльбер къызлар ёкъ эди. Бабалары оларгъа, агъа-къардашларына киби, байлыгъынынъ пайларыны берди.

16 ^oБундан сонъ Эюп 140 йыл даа яшады, огъулларыны ве дёртюнджи несильге къадар торунларыны корьди. 17 Эюп омюрине тойды ве къартайып кечинди.