‏ Job 5

Элифаз Эюпны къабаатлай

1 ^aЭгер ялварсанъ, санъа джевап бериледжекми?
Азиз мелеклернинъ къайсына кетеджексинъ?
2 ^bАхмакъны ачувы ольдюрир,
акъылсызны пахыллыгъы гъайып этер.
3Мен ахмакънынъ яхшы яшагъаныны корьгенимнен,
шу дакъкъасы онынъ эвини къаргъадым.
4Балалары ярдым корьмез,
шеэр къапусы янында олар адалетни тапмаз,
оларнынъ къорчалайыджысы олмаз.
5Ач олгъанлар онынъ берекетини ашар,
тикенлернинъ арасында олгъанларыны биле топлар,
ве сувсагъанлар ахмакънынъ байлыгъыны ютар.
6Беля тоз-топракътан пейда олмаз,
къаза бош ерден кельмез.
7Атеш ялынлары тёпеге учкъаны киби,
азап чекмек де – эр кеснинъ къысметидир.

Элифаз айта ки, эр шейни Аллагъа къалдырмакъ керек

8Сенинъ еринъде мен Аллагъа ялварыр эдим,
ишимни Аллагъа къалдырыр эдим.
9 ^cО, акъылымыз етмеген буюк ишлерни япа,
аджайип шейлер япкъанларыны саймагъа чаре ёкъ.
10 ^dЕр юзюне ягъмур ягъдырыр,
тарлаларгъа сувлар акъызыр.
11 ^eХорлангъанларны О, юксельтир,
агълагъанларны къуртарыр.
12Айнеджи олгъанларнынъ макъсатларыны бозар,
къоллары ниетлерини беджермез.
13 ^fО, акъыллы адамларны оларнынъ айнеджилигинен тутып алыр,
яланджыларнынъ планлары да бошуна олур.
14 ^gКуньдюз къаранлыкъ оларны къаплар,
уйле вакътында да, геджеси киби, къармаланалар.
15 ^hАлла фукъарени къылычтан къорчалар,
кучьлюнинъ агъзындан ве къолундан оларны къуртарыр.
16 ⁱГъарип ишаныр,
яманлыкъ озь агъзыны къапатыр.
17 ^jАлла акъыл огреткен адам не бахтлыдыр,
шунынъ ичюн Къудретли Алланынъ тербиесини ред этме.
18 ^kО, эм яралар, эм яраларны сарар.
Урса биле, къоллары шифа берер.
19 ^lАлты белядан сени къуртарыр,
единджиси де санъа зарар кетирип олмаз.
20 ^mАчлыкъта олюмден,
дженкте къылычтан О, сени къорчалайджакъ.
21 ⁿКъамчыдай аджджы тиллерден сакъланаджакъсынъ,
буюк белялар кельгенде, къоркъмайджакъсынъ.
22Ёкъ этилюв ве ачлыкъ олгъанда, куледжексинъ,
кийик айванлар да сени къоркъузмайджакъ.
23Тарладаки ташлар – сенинъ тарафынъда,
кийик айванларнен муаббетликте яшайджакъсынъ.
24Биледжексинъ ки, чадырынъда аманлыкъ бар.
Эвинъе бакъып, ич бир къусур тапмайджакъсынъ.
25 ^oБалаларынъ чокълашаджакъ,
эвлятларынъ да ер юзюндеки от киби оладжакъ.
26 ^pПишкен богъдай вакътына джыйылгъаны киби,
мезаргъа къартлыгъынъда киреджексинъ.

27Бакъ, биз бойле нетиджеге кельдик,
мен санъа айткъаным догърудыр.
Онынъ ичюн буны динъле ве акълынъда тут.