‏ Job 8

Билдаднынъ биринджи лафы

Билдад Эюпкъа Аллагъа дува этмесини огрете

1 ^aШуалы Билдад бойле джевап берди:

2– Даа чокъ ойле айтаджакъсынъмы?
Сёзлеринъ бошуна уфюрген ель киби.
3 ^bАлла адалетсиз суд этерми?
Къудретли Олгъан акъикъатны чевирирми?
4Огъулларынъ Алланынъ огюне гуна ишлеген олсалар,
О, оларгъа къабаатларынынъ джезасыны бергендир.
5Эгер сен Алланы къыдырсанъ,
Къудретлиге ялварсанъ,
6 ^cэгер сен темиз ве догъру олсанъ,
О, шимди сени къорчалар
ве сенинъ инсафлы эвинъе тынчлыкъ-аманлыкъ берер.
7Илериде оладжакъ байлыгъынъ ойле буюк оладжакъ ки,
эвельки бутюнлей козюнъе корюнмейджек.

Гунакяр ве инсафлы адамларнынъ яшайышы акъкъында

8 ^dЭвель яшагъан несиллерден сора,
деделери нелер огренгенини анъла.
9 ^eБиз тек тюневин догъдыкъ,
бир шей бильмеймиз,
ер юзюндеки куньлеримиз – бир талдадыр.
10Деделер санъа акъыл огретир,
икмет сёзлерини айтарлар.
11Батакълыкъ олмагъан ерде папирус оту осерми?
Сув олмагъан ерде къамыш осерми?
12 ^fО, даа ешиль олып, кесильмеден,
сув олмаса, башкъа отлардан эвель къуруп кетер.
13 ^gАлланы унуткъан эр кеснинъ сонъу бойледир,
алласызларнынъ умюти гъайып олур.
14 ^hОнынъ ишанчы дагъылыр,
о, орюмчекнинъ йипчигине ишаныр.
15 ⁱЭвине таяныр да, эви авдарылыр,
онъа япышыр да, турып оламаз.
16Ойле адам кунешнинъ тюбюнде семирир,
пытакълары багъча бою дагъылыр,
17тамырлары таш обасына сарылыр,
ташларнынъ арасында ер къыдырыр.
18 ^jАмма еринден чыкъарылгъанда,
ери: «Сени ич корьмедим», – деп оны ред этеджек.
19Бакъ, къуванчынынъ сонъу будыр.
Топракътан исе башкъалар котерилир.

20Алла мытлакъа инсафлы адамны ред этмез,
яманлыкъ эткенлерине ярдым этмез.
21 ^kО, сенинъ агъзынъны кене кулькюге,
дудакъларынъны къуванч къычырувларына толдураджакъ.
22 ^lСени кореджек козю олмагъанлар масхара олурлар,
яман адамларнынъ чадырлары ёкъ олурлар.