‏ Joel 2

Ордуларнынъ келюви

1 ^aСионда бору чалынъыз,
азиз дагъымда телюке сигналыны беринъиз.
Топракъта яшагъан эр кес къоркъудан титресин,
РАББИнинъ куню келеята, энди о якъындыр.
2 ^bКъою къаранлыкъ куню,
булут ве тютюн кунюдир о.
Чокъ сайылы ве кучьлю халкъ,
танъ ярыгъы киби, дагълар бою даркъала.
Бойле сою ич бир вакъыт олмады,
эм келеджекте яшайджакъ адамларнынъ заманында да олмайджакъ.

3 ^cОларнынъ огюнде атеш якъа,
артында алев яндыра.
Огдеки топракълар – Эдем багъчасы кибидир,
артларындан исе бош чёллерге чевирилир.
Ич бир шей олардан къуртулып оламаз.
4 ^dОларнынъ корюниши атларгъа ошай,
озьлери дженк атлылары киби сычрайлар.
5Дженк арабаларынынъ тасырдысынен киби,
дагъларнынъ тёпелеринден сычрайлар.
Оларнынъ шаматасы тобанны якъаяткъан атешнинъ чытырдысына ошай.
Олар – дженкке азырлангъан кучьлю бир халкъ кибидир.

6 ^eОларнынъ огюнде халкълар къоркъудан дёрт буклене,
эр кеснинъ бети агъара.
7 ^fБатырлар киби, чапалар,
джесюр аскерлер киби, диваргъа тырмашалар.
Эр бири ёлуны шашырмайып,
озь ёлундан урулмай.
8Бири-бирини басмадан,
эр бири озь ёлуны тута.
Мызракъларнен къорчалангъанларгъа атылалар
ве сагъ-селямет къалалар.
9 ^gШеэр бою чапкъалайлар,
диварларгъа тырмашалар,
эвлернинъ устюне чыкъалар,
хырсызлар киби, пенджерелерден кирелер.
10 ^hОларнынъ огюнде ер юзю къыбырдай,
коклер титрей,
кунеш ве ай сёне,
йылдызлар ярыгъыны джоя.
11 ⁱРАББИ кучьлю сесинен Озь ордусына буюра.
Онынъ аскерлери пек чокъ сайылыдыр,
Онынъ буюргъанларыны беджергенлер къудретлидир.
Не де къоркъунчлыдыр РАББИнинъ буюк куню!
Онъа ким даянып олур?

Тёвбеге чагъырув

12 ^jАмма шимди де РАББИ айта ки:
– Ашамайып-ичмейип, агълап ве зар чекип,
джан-юректен Манъа къайтынъыз.
13 ^kУрбаларынъызны йыртмагъа керекмей,
юреклеринъиз исе сызласынлар.
Алланъыз РАББИге къайтынъыз,
О, мераметли ве шефкъатлыдыр,
чокъ сабырлы ве ишанчлыдыр.
О, джезасыны ёлламай.
14 ^lКим бильсин, бельки О, фикирини денъиштирир
ве сизни аджыр,
сизге берекет берер,
Алланъыз РАББИге ашлыкъ
ве ичерлик бахшышларыны кетирмеге ёл ачар.
15 ^mСионда бору чалынъыз,
ашаманъыз-ичменъиз,
эр бирини топлашувгъа чагъырынъыз.
16 ⁿХалкъны топланъыз, топлашув япынъыз,
акъсакъалларны чагъырынъыз,
яшларны ве къундакъ балаларыны топланъыз.
Киев озь ханесинден ве келин озь одасындан
келип чыкъсын.
17 ^oРуханийлер, РАББИнинъ хызметчилери,
Эйваннен къурбан ерининъ арасында агъласынлар
ве бойле деп ялварсынлар:
«Я РАББИ, халкъынъны аджы.
Сенинъ мирасынъны масхара этмесинлер,
халкълар оны мыскъылламасынлар.
Миллетлер арасында:
“Аллалары къайда?” – демесинлер».

Къуртулыш

18 ^pО заман РАББИ Озь топрагъыны къорчалайджакъ,
Озь халкъыны аджыйджакъ.
19РАББИ халкъына джевап береджек:
– Мына, Мен сизге ашлыкъ, янъы шарап,
зейтюн ягъыны береджегим,
ве сиз оларгъа тояджакъсынъыз.
Бир даа сизни ашаламагъа
халкъларгъа ёл бермейджегим.
20 ^qШимальден кельген душманларны сизден узакълаштыраджагъым,
сувсуз ве бош бир топракъкъа къувалайджагъым.
Огден кеткенлерни Олю денъизге котерип атаджагъым,
арттан кельгенлерни Акъ денъизге ташлайджагъым.
Олар яман къокъу даркъатаджакъ,
сасыкъ къокъулары котериледжек,
чюнки олар чокъ яманлыкъ эттилер.
21 ^rКъоркъма, топракъ! Къуван ве шенълен!
РАББИ буюк ишлер япты!
22 ^sЭй, кийик айванлар, къоркъманъыз!
Чёль отлакълары отны осьтюрир,
тереклер мейва берер,
инджир ве юзюм де озь берекетини кетирир.
23 ^tЭй, Сион халкъы,
Алланъыз РАББИде къуван ве шенъленинъиз!
О, ягъмурны сизге тамам кереги къадар береджек,
ве, эвельки киби, кузьде ве баарьде ягъмурны ягъдыраджакъ.
24Арманлар ашлыкъкъа толаджакъ,
юзюм ве зейтюн басылгъан ерлерден
янъы шарап ве зейтюн ягъы тёкюлип ташаджакъ.
25 ^uБерекетинъизни тыртыр, сарынчкъа, чегертки
ве къонъузлар ашагъан йыллары ичюн,
сизге къаршы ёллагъан буюк ордум ичюн
акъкъынъызны къайтарырым.
26О заман сиз тойгъандже ашарсынъыз,
сизлер ичюн аджайип шейлер япкъан
Алланъыз РАББИнинъ Адыны шуретлейджексинъиз.
Сонъ халкъым эбедиен масхара олмайджакъ.
27 ^vО вакъыт Мен Исраильнинъ арасында олгъанымны биледжексинъиз,
Мен – РАББИм, сизинъ Алланъыз,
башкъа бири ёкъ.
Халкъым омюрлик бир даа масхара олмайджакъ.

Раббиге иман эткенлер ичюн къуртулыш

28 ^w– Ондан сонъ Мен эр бир джангъа Рухумны береджегим,
ве огъулларынъызнен къызларынъыз пейгъамберлик этеджек,
сизинъ къартларынъыз тюшлер кореджек,
ве йигитлеринъиз руялар кореджек.
29О куньлерде къул ве къулкъаларынъызгъа да
Рухумны береджегим.
30 ^xКоклерде ве ер юзюнде
бельгилеримни косьтереджегим:
къан, атешни ве думан диреклерини ёллайджагъым.
31 ^yКунешни къаранлыкъ къаплайджакъ,
ай къангъа бояланаджакъ.
Ве ондан сонъ РАББИнинъ буюк
ве къоркъунчлы куню келеджек.
32 ^zО заман РАББИнинъ Адыны айтып чагъыргъан эр кес къуртуладжакъ.
Сион дагъында Ерусалимде къуртулгъанлар топланаджакъ ▼

▼Я да «Ерусалимде къуртулыш оладжакъ».

.
РАББИ айткъаны киби, сагъ къаладжакъ адамлар
РАББИ чагъыргъан халкъ оладжакъ.