‏ Joel 3

Алла халкъларны суд эте

1 ^aМына, о куньлерде ве о заманларда
Ехуда ве Ерусалим халкъыны
сюргюнликтен къайтараджагъым.
2 ^bМен эписи халкъларны топлайджагъым
ве Ехошафат вадийине алып кетиреджегим.
Анда Мен оларны мирасым ичюн,
Исраиль халкъым ичюн суд этеджегим, –
олар Исраильни халкъларнынъ арасында дагъытты
ве Меним топрагъымны пай этти.
3 ^cОлар халкъымны джереп чекип болюштилер,
яш огъланларны ороспуларгъа денъиштирдилер,
яш къызларны шарапкъа саттылар
ве сархошлангъандже ичтилер.

4 ^dЭй, Тир ве Сидон шеэрлери, бутюн Фелестин виляетлери,
Манъа япаджагъынъыз недир?
Сиз Мени джезаламагъа истейсинъизми?
Акъкъымны береджек оласынъызмы?
Манъа япаджакъ олгъанларынъызны
Мен тез ве къолайлыкънен башларынъызгъа тюшюреджегим.
5 ^eСиз алтынымны ве кумюшимни алдынъыз,
энъ яхшы къыйметли шейлеримни
сизинъ ибадетханелеринъизге кирсеттинъиз.
6Ехудалыларны ве Ерусалим огъулларыны
юнанларгъа саттынъыз,
озь мемлекетинден оларны узакълаштырдынъыз.
7Мына, Мен оларны сиз саткъан еринъизден къайтараджагъым,
оларгъа япкъанларынъызны сизге япаджагъым.
8 ^fМен огъулларынъызны ве къызларынъызны
ехудалыларгъа сатаджагъым,
олар исе оларны узакъта яшагъан бир халкъкъа,
шевалыларгъа сатаджакълар.
Бу – РАББИнинъ айткъаныдыр.

9Халкълар арасында буны илян этинъиз:
Дженкке азырланынъыз!
Батырларны котеринъиз!
Эписи аскерлер кельсинлер,
дженкке чыкъсынлар!
10 ^gСабан тишлеринъизден къылычларны япынъыз,
пычакъларынъыздан мызракъларны ясанъыз.
Къуветли олмагъан:
«Мен – батырым!» – десин.
11Эй, къомшу халкълар,
тез келинъиз, анда топлашынъыз!

Я РАББИ! Батырларынъны алып кель!

12 ^hХалкълар чыкъсынлар
ве Ехошафат вадийинде топлансынлар.
Мен анда отураджагъым
ве чевре-четтеки эписи халкъларны суд этеджегим.
13 ⁱОракъларынъызны ишлетинъиз, –
ашлыкъ пишти.
Келинъиз, юзюмни басынъыз, –
юзюм сыкъылгъан ерлер толу,
шарап фычылары ташалар.
Халкъларнынъ яманлыкълары пек буюк!

14 ^jУкюм чыкъарылгъан вадийинде – адам сюрюлери,
РАББИнинъ куню укюм чыкъарыладжакъ ерге якъынлашты!
15 ^kКунеш ве ай къарараджакъ,
йылдызларнынъ парылдысы гъайып оладжакъ.

Алла Исраильни багъышлай ве акълай

16 ^lРАББИ Сиондан гудюрдейджек,
Ерусалимден сесини чыкъараджакъ.
Коклер ве ер тепренеджек.
Лякин РАББИ Озь халкъыны къорчалайджакъ,
Исраиль огъулларына сакъланув ери оладжакъ.

17 ^mО заман биледжексинъиз ки,
Мен – РАББИм, сизинъ Алланъыз.
Мен Сионда, азиз дагъымда ерлештим.
Ерусалим шеэри азиз ер оладжакъ,
чет адамлар бир даа оны таптамайджакъ.
18 ⁿО куню дагълардан юзюм шырасы тамлайджакъ,
байырлардан сют акъаджакъ,
Ехуданынъ эписи озенлери сувгъа толаджакъ.
РАББИнинъ Эвинден бир чокъракъ чыкъаджакъ
ве Шиттим вадийине сув береджек.
19 ^oАмма Мысыр мемлекети къуру сахра оладжакъ,
Эдом топрагъы бош чёльге чевириледжек,
чюнки олар Ехуда огъулларыны чекиштирди,
топракъларында къабаатсыз адамларнынъ къаныны тёктилер.
20 ^pЕхудалылар эбедий яшайджакъ,
Ерусалим шеэри несильден несильге къаладжакъ.
21 ^qКъан тёккенлери ве къабаатлы олгъанлары ичюн Мен оларны даа багъышламадым,
лякин эписи бир Мен оларны багъышлайджагъым.
Мен, РАББИ, Сионда булунам.