‏ John 2

Галилеянынъ Кана шеэринде никях тою

1 ^aУчюнджи куню Галилеянынъ Кана шеэрчигинде никях тою олды. О ерде Исанынъ анасы бар эди. 2Тойгъа Иса шегиртлеринен де чагъырылгъан эдилер. 3Шарап биткен сонъ, Исанынъ анасы Онъа:

– Оларда шарап къалмагъан, – деди. 4 ^bИса онъа:

– Къадын, бу бизим ишимиз дегиль. Меним вакъыт-саатим даа кельмеди, – деди. 5О вакъыт анасы хызметчилерге:

– О, сизге не айтса, оны япынъыз, – деди.

6 ^cО ерде еудийлернинъ элялланув адети ичюн, эр бири дёрт-алты буюк къопкъа ▼

▼Дёрт-алты буюк къопкъа – къ. юн. «эки-учь метретес».

сув сыгъдыргъан алты дане таш савут бар эди.

7Иса хызметчилерге:

– Савутларны сувгъа толдурынъыз, – деди. Олар савутларны четлеринедже толдурдылар. 8Сонъ Иса оларгъа:

– Энди чомучлап алынъыз да, тойбашына алып барынъыз, – деди. Олар ойле де япты.

9Тойбашы шарап олгъан сувны ичип бакъты. Шарап къайдан кельгенини о бильмей эди, тек сувны чекип кельген хызметчилер биле эди. Тойбашы киевни чагъырып, онъа:

10– Эр кес башта яхшы шарапны къоя, мусафирлер ичип тойгъан сонъ, ярамайджа союны бере. Сен исе яхшы шарапны шу вакъыткъадже сакълап туткъансынъ! – деди.

11Иса буны Галилеянынъ Кана шеэрчигинде япты; бу шей Онынъ аджайип бельгилерининъ башы олды. Бойле этип, Иса Озь шуретини косьтерди, ве шегиртлери Онъа иман эттилер.

12 ^eБундан сонъ Иса, анасы, къардашлары ве шегиртлери Къафарнаум шеэрине кельдилер ве о ерде бир къач кунь отурдылар.

Иса Алланынъ Сарайында

13 ^f‌ ^gЕудийлернинъ Песах Байрамы якъынлашкъаны ичюн, Иса Ерусалим шеэрине кетти. 14Алланынъ Сарайы азбарына киргенинен, бугъалар, къойлар, гогерджинлер саткъанларны ве пара алмаштырыджыларнынъ отургъаныны корьди. 15Иса аркъандан бир къамчы ясады да, Сарайнынъ азбарындан эписини бугъаларынен ве къойларынен берабер къувып чыкъарды, пара алмаштыргъанларнынъ масаларыны авдарып, акъчаларыны септирип йиберди. 16 ^hГогерджинлерни саткъанларгъа:

– Буларны бу ерден ёкъ этинъ, Бабамнынъ Эвини базиргян эвине айландырманъыз! – деди.

17 ⁱО вакъыт Онынъ шегиртлери: «Ичимде Сенинъ Эвинъе олгъан шевкъим яна», – язылгъан сёзлерни хатырладылар.

18 ^jСонъ еудий башлыкълары джевап берип:

– Бойле шейлерни япасынъ, амма бизге насыл бельги береджексинъ? – дедилер. 19 ^kИса оларгъа:

– Бу Сарайны йыкъынъыз, ве Мен оны учь кунь ичинде тиклейджем, – деди.

20Олар Исагъа:

– Бу Сарай къыркъ алты йылда къурулгъан, Сен исе оны учь куньде тиклемеге истейсинъ?! – дедилер.

21Иса «Сарай» деп, Озь бедени акъкъында дей эди. 22 ^lО, олип тирильген сонъ, шегиртлери бу сёзлерни хатырладылар ве Мукъаддес Языгъа да, Исанынъ сёзюне де инандылар.

Иса адамларнынъ юреклерини биле

23 ^mИса Ерусалимде Песах Байрамында олгъанда, чокъ адамлар Онынъ япкъан аджайип бельгилерини корип, Онъа иман эттилер. 24Амма эписи адамларнынъ юреклерини бильгени ичюн, Иса Озю оларгъа ишанмай эди. 25Исагъа адамлар акъкъында шаатлыкъ бермек керекмей эди. Адамнынъ юрегинде не олгъаныны О, Озю биле эди.