‏ John 13

Иса шегиртлерининъ аякъларыны юва

1 ^aПесах Байрамындан эвель Иса бу дюньядан Бабанынъ янына кетмек вакъты кельгенини биле эди. О, бу дюньяда Озюнъкилерни севген эди ве шимди оларны сонъунадже севди. 2 ^bАкъшамлыкъ ашы вакъты эди. Шейтан энди Симон Искариот огълу Иуданынъ юрегине Исаны сатмакъ ниетини къойгъан эди. 3 ^cБаба эр шейни Исанынъ къолуна бергенини, Алладан чыкъып, кене Алланынъ янына къайтаяткъаныны билип, 4Иса софра башындан турды, усть урбасыны чыкъарды, бир эльбез алды да, белине багълады. 5 ^dЛегенге сув къойып, шегиртлерининъ аякъларыны юва, белине багълагъан эльбезнен сюртип къурута башлады.

6Симон Пётрнынъ янына кельгенде:

– Рабби! Сен меним аякъларымны ювмагъа истейсинъми?! – деди Пётр.

7– Не япкъанымны шимди анъламайсынъ. Сонъ анълайджакъсынъ, – деди Иса онъа джевап берип.

8 ^e– Меним аякъларымны ич бир вакъыт ювмайджакъсынъ! – деди Пётр.

– Эгер ювмасам, Меннен бирликте пайынъ олмайджакъ, – деди Иса. 9О вакъыт Симон Пётр:

– Рабби, тек аякъларымны дегиль, къолларымны, башымны да юв! – деди. 10 ^fИса онъа:

– Ювулгъан адам бутюнлей темиз, онынъ тек аякъларыны ювмакъ керек. Сиз темизсиз, амма эпинъиз дегиль, – деди. 11 ^gИса Оны сатаджакъ адамны биле эди, шунынъ ичюн: «Эпинъиз темиз дегильсиз», – деди.

12Шегиртлерининъ аякъларыны ювгъан сонъ, Иса усть урбасыны кийип, ерине ерлешти. Шегиртлерине деди:

– Мен сизге не япкъанымны анъладынъызмы? 13 ^hСиз Манъа «Оджа» ве «Рабби» дейсиз, эм догъру айтасыз, чюнки Мен бу олам. 14 ⁱЭгер Мен Рабби ве Оджа олып, аякъларынъызны ювгъан олсам, сизге де бир-биринъизнинъ аякъларынъызны ювмакъ керек. 15 ^jМен сизге орьнек косьтердим. Энди Мен сизге не япкъан олсам, сизге де ойле япмакъ керек. 16 ^kСизге керчектен догърусыны айтам: къул озь эфендисинден устюн дегиль, ёлланылгъан да оны ёллагъандан устюн дегильдир. 17 ^lЭгер буны анъласанъыз, буны беджерип бахтлы олурсыз!

18 ^mМен эпинъиз акъкъында айтмайым, – девам этти Иса. – Мен сайлагъан адамларымны билем. Лякин отьмегимни ашагъан адамнынъ Манъа къаршы табаныны котергени акъкъында Языда язылгъан сёзлер беджерильмек керек. 19 ⁿШимдиден, даа бу вакъиалар олмаздан эвель, Мен буны сизге айтам, чюнки бу вакъиалар олгъан сонъ, сиз иман этеджексиз ки, Мен – Одырым. 20 ^oСизге керчектен догърусыны айтам: ким Мен ёллайджакъ адамны къабул этсе, Мени къабул эте. Мени къабул эткен исе Мени Ёллагъанны къабул эте.

Иса шегиртлеринден бири Оны сатаджагъы акъкъында айта

21 ^p‌ ^qБу сёзлерни айткъан сонъ, Исанынъ джаны пек сыкъылды. Энди ачыкътан-ачыкъ айтып башлады:

– Сизге керчектен догърусыны айтам: Мени сизден биринъиз сатаджакъ.

22Шегиртлери исе, О, ким акъкъында айткъаныны бильмейип, шашкъынлыкънен бир-бирине бакъып тура эдилер. 23 ^rОлардан бири Исанынъ янында ята эди. Иса оны пек севе эди. 24Симон Пётр онъа, Иса ким акъкъында айткъаныны сораса, деп ишмар этти. 25О, Исанынъ кокрегине башыны къойып:

– Рабби, о кимдир? – деп сорады. 26Иса джевап берип:

– Мен бу пите парчасыны ашкъа батырып кимге берсем, одыр, – деди. Сонъ О, бир пите парчасыны батырып, Симон Искариот огълу Иудагъа берди. 27Шу ань, Иуда питени алгъанынен, онынъ ичине Шейтан кирди.

– Япаджагъынъны тез-тез яп, – деди онъа Иса.

28Иса бу сёзлерни не ичюн айткъаныны софра этрафындакилерден ич кимсе анъламады. 29 ^sАкъча къутусы Иудада олгъаны ичюн, базылары тюшюндилер ки, Иса онъа: «Байрам ичюн бизге керек олгъан шейлерни сатын ал» я да «Фукъарелерге бир шей бер», – деди. 30Иуда исе питени алып, бирден тышарыгъа чыкъып кетти. Энди гедже тюшкен эди.

Янъы эмир

31 ^tИуда чыкъып кеткен сонъ, Иса деди:

– Шимди Инсан Огълу шерефленди, Инсан Огълунда Алла да шерефленди. 32 ^uЭгер Алла Инсан Огълунда шерефленген олса, Алла Озюнде Инсан Огълуны шерефлейджек, Оны тез арада шерефлейджек. 33 ^vБалалар! Мен сизлернен берабер даа аз вакъыт оладжагъым. Мени къыдыраджакъсыз. Еудийлернинъ башлыкъларына айткъаным киби, сизге де айтам: Мен кетеяткъан ерге сиз барып оламайсыз.

34 ^wСизге янъы эмир берем: бир-биринъизни севинъиз. Мен сизни насыл севген олсам, сиз де бир-биринъизни шойле севинъиз. 35Эгер аранъызда бир-биринъизге севги олса, сиз Меним шегиртлерим олгъанынъызны эписи биледжек.

Иса Пётрнынъ ёлдан уруладжагъы акъкъында эвельден айта

36 ^xСимон Пётр Исагъа деди:

– Рабби, Сен къаерге кетесинъ?

– Мен кетеяткъан ерге сен артымдан шимди барып оламайсынъ, амма сонъ бараджакъсынъ, – деп джевап берди онъа Иса.

37 ^y– Рабби, – деди онъа Пётр, – не ичюн артынъдан шимди барып оламайым? Мен Сен ичюн джанымны береджегим!

38 ^zИса джевап берип:

– Мен ичюн джанынъны береджексинъми? Санъа керчектен догърусыны айтам: хораз къычырмаздан эвель, сен Менден учь кере вазгечеджексинъ, – деди.