Joh 5 | CrhCTB | STEP | Бундан сонъ еудийлернинъ бир байрамына Иса Ерусалимге барды.

‏ John 5

Бетзата хавузында тедавийленюв

1 Бундан сонъ еудийлернинъ бир байрамына Иса Ерусалимге барды. 2 ^aЕрусалимнинъ Къойлар Къапусы янында еудийдже Бетзата деген беш софалы бир хавуз бар эди. 3 – 4 Бу софаларда пек чокъ хаста, кёр, топал ве паралич ургъан адамлар ята эдилер. ^{▼▼Бир къач эльязмаларда бойле сёзлер де бар: «Олар сувнынъ чалкъанмасыны беклей эдилер. 5.4 Чюнки Раббининъ бир мелеги хавузгъа тюше-тюше, сувны арекетке кетире эди. Сув чалкъангъанынен хавузгъа биринджи олып ким тюшсе, эр бир хасталыкътан къуртула эди».} 5 Бу ерде отуз секиз йыл девамында хаста олып яткъан бир адам бар эди. 6 Иса онынъ яткъаныны корьди, чокъ вакъыттан берли хаста олгъаныны бильди де, ондан:

– Сагъ олмагъа истейсинъми? – деп сорады. 7 Хаста Исагъа джевап берип:

– Эфендим! Сув чалкъангъанда, мени хавузгъа тюшюрген адам ёкъ. Мен баргъандже, менден эвель башкъасы тюше, – деди.

8 ^c– Еринъден тур, тёшегинъни алып бар! – деди Иса хастагъа. 9 Хаста шу ань сагъ олды. Тёшегини алып, юрип кетти.

О кунь раатлыкъ куню эди. 10 ^dШунынъ ичюн еудийлер сагъ олгъан адамгъа:

– Бугунь раатлыкъ куню. Санъа тёшегинъни алып кетирмеге мумкюн дегиль! – дедилер.

11 – Мени тедавийлеген адам манъа: «Тёшегинъни алып бар», – деди, – джевап берди о адам.

12 – «Тёшегинъни алып бар», – деген адам ким? – деп сорадылар олар ондан. 13 Сагъ олгъан адам исе Онынъ ким олгъаныны бильмей эди. О ерде халкъ чокълугъы себебинден Иса андан кимсеге дуйдурмайып кеткен эди.

14 Сонъ Иса о адамны Алланынъ Сарайында тапты.

– Мына, сен сагъ олдынъ. Энди гуна япма, ёкъса санъа даа да бетер шей оладжакъ, – деди онъа.

15 Бу адам барып, еудийлерге оны тедавийлеген Иса олгъаныны бильдирди. 16 ^eБунынъ ичюн еудийлер Исаны къувалап башладылар, чюнки О, бойле ишлерни раатлыкъ кунюнде япа эди. 17 Амма Иса оларгъа шойле деди:

– Меним Бабам шимдигедже чалыша, Мен де чалышам.

18 ^fШунынъ ичюн еудийлер Исаны ольдюрмек ичюн, даа чокъ арекет эте башладылар, чюнки Иса раатлыкъ кунюни бозгъанындан гъайры Аллагъа «Бабам» дей эди ве шунынънен Озюнинъ Аллагъа тенъ олгъаныны косьтере эди.

Огъулнынъ къувети

19 Иса еудийлерге къаршы чыкъып, шай деди:

– Сизге керчектен догърусыны айтам: Огъул Бабасынынъ япкъан ишлерини корьмегендже, Озю ич бир шей япалмаз. Бабасы не япса, Огълу да тамам шу шейлерни япа. 20 ^gБаба Огълуны севе ве Огълуна Озю япкъан эр шейни косьтере. О, сизни шашыртып, бундан да буюк шейлерни косьтереджек. 21 ^hБаба насыл этип олюлерни тирильтсе ве оларгъа аят берсе, Огъул да кимни истесе, оны тирильте. 22 ⁱБаба ич кимсени суд этмей, лякин суд этмеге акъкъыны бутюнлей Огълуна берди. 23 ^jШунынъ ичюн, адамларнынъ эписи Бабаны урьмет эткени киби, Огълуны да урьмет этсинлер. Огълуны урьмет этмеген адам исе Оны ёллагъан Бабаны да урьмет этмей.

24 ^kСизге керчектен догърусыны айтам: Меним сёзлеримни динълеген ве Мени Ёллагъангъа иман эткен адам эбедий аятны ала. О, суд этильмейджек, лякин энди олюмден аяткъа кечкендир. 25 ^lСизге керчектен догърусыны айтам: ойле заман келеята ве энди кельди ки, олюлер Алла Огълунынъ сесини эшитеджек, ве Онынъ сесини эшиткенлер тири оладжакълар. 26 ^mАлланынъ Озю аят чокърагъы олгъаны киби, аят чокърагъы олмагъа Огълуна да ёл берди. 27 ⁿБаба Огълуна суд этмек акъкъыны да берген, чюнки О – Инсан Огълудыр. 28 ^oБунъа шашманъыз. Ойле заман келеята ки, мезарлыкъта олгъанларнынъ эписи Онынъ сесини эшитеджек 29 ^pве тышарыгъа чыкъаджакълар. Яхшылыкъ япкъанлар тирилип, эбедий омюрни аладжакълар, ярамайлыкъ япкъанлар исе тирилип, судгъа кетеджеклер.

Иса акъкъында шаатлыкълар

30 ^qМен Озь-Озюмден ич бир шей япып оламайым. Насыл эшитсем, ойле суд этем. Меним судум адалетлидир, чюнки Мен Озь истегенимни дегиль, Мени Ёллагъаннынъ истегенини беджермеге истейим. 31 ^rЭгер Озюм акъкъымда Мен Озюм шаатлыкъ япсам, шаатлыгъым керчек дегиль. 32 Меним акъкъымда шаатлыкъ япкъан башкъасы бар, ве билем ки, Онынъ Меним акъкъымда шаатлыгъы керчектир.

33 ^sСиз Ягъянынъ алдына адамларны ёлладынъыз, ве Ягъя акъикъаткъа шаатлыкъ этти. 34 Мен Озюм инсанларнынъ шаатлыгъыны къабул этмейим, лякин сиз буны эшитип къуртулсын деп, Мен буны айтам. 35 ^tЯгъя – къандиль, о, яна ве нур сача эди. Сиз онынъ ярыгъында аз олса да, къувана эдинъиз. 36 ^uАмма Менде Ягъя япкъан шаатлыкътан даа буюк шаатлыкъ бар. Меним акъкъымда Мени Бабам ёллагъанына Баба Манъа берген, Мен беджерген ишлернинъ озьлери шаатлыкъ этелер.

37 Меним акъкъымда Мени ёллагъан Бабамнынъ Озю де шаатлыкъ этти. Сиз Онынъ сесини ич бир вакъыт эшитмединъиз, къыяфетини де корьмединъиз. 38 Онынъ Сёзю юрегинъизде яшамай, чюнки О ёллагъан Инсангъа инанмайсыз. 39 ^vСиз Мукъаддес Языларны дикъкъатнен огренесиз, оларнынъ ярдымынен эбедий аятны алмагъа тюшюнесиз. Бу Язылар исе Меним акъкъымда шаатлыкъ этелер. 40 Амма сиз эбедий аятны алмакъ ичюн, Манъа кельмеге истемейсиз.

41 ^wМен адамлардан шерефни къабул этмейим. 42 Лякин сизни билем: юреклеринъизде Аллагъа севги ёкъ. 43 ^xМен Бабамнынъ Адындан кельдим, лякин сиз Мени къабул этмейсиз. Озь адындан келеджек башкъасыны къабул этерсиз. 44 ^yСиз бир-биринъизден шереф алмагъа бегенесиз, лякин бирден-бир Алланынъ шерефини къазанмагъа арекет этмейсиз. Шу алда насыл этип иман этеджексиз? 45 Мен сизни Бабамнынъ алдында къабаатларым, деп тюшюнменъиз. Сизни сиз умют эткен Муса къабаатлар. 46 ^zЭгер Мусагъа инансанъыз, Манъа да инаныр эдинъиз, чюнки о, Меним акъкъымда язгъан. 47 Мусанынъ язгъанларына инанмасанъыз, Меним сёзлериме насыл инанаджакъсыз?