Jonah 3
Юнус Аллагъа бойсуна
1РАББИ Юнускъа экинджи кере шай деди: 2 a– Тез буюк Ниневе шеэрине кет. Анда санъа берген хаберимни айт. 3РАББИ айткъаны киби, Юнус Ниневе шеэрине ашыкъып кетти. Ниневе шеэри пек буюк шеэр эди. Бутюн шеэрни айланып чыкъмакъ ичюн, учь кунь керек эди. 4Юнус шеэрге кирип, кунь бою шеэрде юрип олгъаны къадар юре ве бойле айта эди: – Къыркъ куньден сонъ Алла Ниневе шеэрини ёкъ этеджек! 5 bНиневелилер Аллагъа иман этип, бир шей ашамайджакъ-ичмейджеклерини илян эттилер, оларнынъ буюги-уфагъы эписи къаба токъулгъан басмадан урба кийдилер. 6 cХабер Ниневенинъ падишасына барып етти. О, тахтындан турып, урбаларыны чыкъарды, къаба токъулгъан басмадан урба кийди ве куль обасына отурды. 7Сонъ падиша озь адындан ве буюк адамларынынъ адындан бойле илян этмеге буюрды: – Халкъ бир шей ашамасын-ичмесин. Айванлар, туварлар ве къой-эчкилер де бир шей ашамасын, отлакъкъа бармасын, сув ичмесин. 8 dЭм адамлар, эм айванлар къаба токъулгъан басмадан урба кийсинлер ве гъайретнен ярдым сорап, Аллагъа ялварсынлар. Эр кес озь яман ёлундан чевирильсин ве озь акъсызлыгъыны къалдырсын. 9 eКим бильсин, бельки Алла къарарыны денъиштирир ве бизге языкъсыныр, Озь атешли гъазабыны бизден чевирир, ве биз эляк олмамыз. 10 fАлла оларнынъ ишлерини, яман ёлларындан чевирильгенлерини корип, оларгъа эвельден айткъан фелякетни ёллайджагъына языкъсынды ве беляны ёлламады.
Copyright information for
CrhCTB