Jos 5 | CrhCTB | STEP | РАББИ Иорданнынъ сувларыны, Исраиль огъуллары кечсинлер деп, къуруткъаныны денъизге тараф Иорданнынъ гъарп тарафында яшагъан эписи аморлы падишалар ве денъиз янындаки эписи ханаанлы падишалар эшиттилер. Къоркъудан оларнынъ отьлери патлады, ве Исраиль огъулларына къаршы турмакъ ичюн джесюрликлери къалмады.

‏ Joshua 5

1 РАББИ Иорданнынъ сувларыны, Исраиль огъуллары кечсинлер деп, къуруткъаныны денъизге тараф Иорданнынъ гъарп тарафында яшагъан эписи аморлы падишалар ве денъиз янындаки эписи ханаанлы падишалар эшиттилер. Къоркъудан оларнынъ отьлери патлады, ве Исраиль огъулларына къаршы турмакъ ичюн джесюрликлери къалмады.

Гилгалда олгъан сюннет

2 О заман РАББИ Ехошуагъа:

– Чакъмакъташтан кескин пычакъ яп да, Исраиль огъулларыны экинджи кере сюннет эт, – деди.

3 Ехошуа озюне кескин пычакълар япып, Гивеат-Хааралот ^{▼▼Гивеат-Хааралот – къ. еуд. «сюннет тёпелиги» манасыны ташый.} деген ерде Исраиль огъулларыны сюннет этти.

4 ^bЕхошуа оларны сюннет эткенининъ манасы бойледир: Мысырдан чыкъкъан бутюн халкъ, эписи дженкке ярагъан акъайлар, Мысырдан чыкъып сахра бою юргенлеринде ольдилер. 5 Мысырдан чыкъкъан халкъ сюннет этильген эди. Мысырдан чыкъкъан сонъ, сахрада догъгъан акъайлар исе сюннет этильмеген эдилер. 6 ^cМысырдан чыкъкъан, дженкке ярагъан бутюн халкъ ольмегендже, Исраиль огъуллары 40 йыл сахра бою юрдилер. Олар РАББИнинъ сесини динълемедилер. Шунынъ ичюн РАББИ, бизге бермеге баба-деделерине ант эткен, сютнен бал акъкъан топракъны олар корьмезлер, деп емин этти. 7 ^dОларнынъ ерине РАББИ оларнынъ огъулларыны осьтюрди, ве Ехошуа оларны сюннет этти. Олар эвель сюннетсиз эдилер, чюнки ёл бою сюннет этильмедилер.

8 Бутюн халкъ сюннет этильген сонъ, яхшы олмагъандже, озь ерлеринде, ордуда къалдылар. 9 ^eРАББИ Ехошуагъа:

– Бугунь Мен устюнъизден Мысыр масхаралыгъыны алып ташладым, – деди.

Онынъ ичюн о ер бу куньге къадар Гилгал ^{▼▼Гилгал – къ. еуд. бу аднынъ айтылувы «алып ташламакъ» манасыны анълаткъан ибаренинъ айтылувына ошай.} деп адлана.

10 ^gИсраиль огъуллары Гилгалда ордунен ерлештилер ве айнынъ 14-юнджи кунюнинъ акъшамы Ерихоннынъ тегиз ерлеринде Песах Байрамыны кечирдилер. 11 Песахнынъ экинджи куню бу топракънынъ берекетини, маясыз пишкен пителерни, къызартылгъан захирени ашап башладылар. 12 ^hТопракънынъ берекетини ашап башлагъан сонъ, экинджи куню манна башкъа тюшмеди. Исраиль огъулларында манна башкъа ёкъ эди, о йылы олар Ханаан топрагъынынъ берекетини ашадылар.

Нун огълу Ехошуа ве мелек

13 ⁱКуньлерден бири Ехошуа Ерихоннынъ янында олгъанында, козьлерини котерип, къолунда къылычы олгъан адамны корьди. Онынъ янына барып, Ехошуа:

– Сен бизимкилеринден я да душманларымыздансынъмы? – деди.

14 – Ёкъ, – деди о. – Мен РАББИнинъ ордусынынъ ёлбашчысы олам, онынъ ичюн мында кельдим.

Ехошуа бель букип, бетини ергедже тийгизди ве:

– Эфендим, къулунъа не айтарсынъ? – деди.

15 ^jРАББИнинъ ордусынынъ ёлбашчысы Ехошуагъа:

– Аякъларынъдан аякъкъапларынъны чыкъар, чюнки тургъан еринъ азиздир, – деди.

Ехошуа бойле де япты.

16 Ерихон сакинлери Исраиль огъулларындан къоркъкъанлары ичюн, шеэрнинъ къапулары япыкъ ве килитли эдилер. Шеэрден кимсе чыкъмай ве кирмей эди.