‏ Lamentations 1

Ерусалим тул къадын киби къалды

Алеф 1Инсан толу олгъан шеэр
бир озю къалды;
халкълар арасында буюк олгъан шеэр
тул къадын киби олды;
виляетлер арасындаки башлыкъ
къулгъа чевирильди.
Беит 2 ^aГеджелери аджджы-аджджы агълай,
янакъларында козьяшы;
оны севгенлернинъ арасында
гонъюль аладжакъ сою ёкъ;
достлары эписи онъа хаинлик этип,
душмангъа чевирильди.
Гимел 3 ^bЕхуда беля ве агъыр къуллукъ ичинде
сюргюнликке огърады;
халкълар арасында отура,
раатлыкъ ерини тапамай;
сыкъынты вакътында
оны къувалагъанлар артына етти.
Далет 4Сион ёллары агълайлар,
чюнки байрамгъа кеткенлер ёкъ;
эписи къапулары янларында ич ким къалмады,
руханийлери ич чекелер;
къызлары гъам-къасевет чекелер,
озю де аджджы алда.
Хе 5 ^cОны чекиштиргенлер башлыкъларына чевирильди,
душманлары раат олды;
яман япкъанлары чокъ олгъаны ичюн,
РАББИ башына беля тюшюрди;
душманларынынъ огюнде
балалары сюргюнлик этильди.
Вав 6Сион къызынынъ ▼

▼Сион къызы – Сион дагъында тургъан Ерусалим шеэри ве анда яшагъан адамлар.

бутюн гузеллиги учып кетти,
башлыкълары отлакъ тапамагъан сыгъынлар киби олды;
такъаттан кесилип,
къувалагъанларынынъ огюнде кеттилер.
Зайин 7 ^eЕрусалим беля вакътында, азап чеккен куньлеринде
эвель куньлериндеки байлыгъыны хатырлады;
лякин душманлар халкъны енъдилер,
халкъкъа кимсе ярдым этмеди;
душманлар шеэрге бакъалар,
харап олгъанындан кулелер.
Хет 8 ^fЕрусалим буюк гуна япты,
онынъ ичюн арам олды;
оны шуретлеген эр кес, айыбыны корип,
энди оны мыскъыллайлар;
шеэр озю де ич чекип,
юзюни чевире.
Тет 9 ^gЭтегинде арамлыкъ бар эди,
амма не оладжагъыны тюшюнмеди;
башкъаларны шашырып, пек ашаланды,
гонъюль аладжакъ кимсеси де ёкъ эди.
«Я РАББИ! Беляма бакъ!
Душманым кучьлю олды!»
Ёд 10 ^hДушман энъ къыйметли шейлерине
къолуны узатты;
О, коре ки,
Мукъаддес Ерине миллетлер кирелер;
Сен исе, я Рабби, Сенинъ джемаатынъда олмагъа
оларгъа разылыкъ бермединъ.
Каф 11 ⁱБутюн халкъы отьмек къыдырып,
ич чекелер;
джаныны къуртармакъ ичюн,
ашкъа къыйметли шейлерини берелер.
«Я РАББИ, корь мени,
не къадар ашалангъаныма бакъ».
Ламет 12Эй, сизлер, ёлдан кечкенлер!
Башларынъызгъа бу тюшмесин!
Бакъынъыз да корюнъиз,
хасталыгъыма ошагъан хасталыкъ бармы?
Бу хасталыкъны РАББИ башыма
гъазабы алевленген куню ёллады!
Мим 13 ^jКемиклериме атешни юксекликтен ёллады,
бутюн беденимни къаплады;
аякъларыма къапкъан къойды,
мени къачмагъа меджбур этти;
мени бакъымсыз этти,
эр бир кунь хаста олам.
Нун 14 ^kРабби Озь къолунен яманлыкъларымны
боюндырыкъ киби, бойнума багълады;
бири-бирине багъланып,
бойнума асалар;
Рабби такъатымны алды,
ойле адамларнынъ къолуна берди ки,
оларны енъип оламайым!
Самек 15Меним эписи кучьлю адамларымны
Рабби ёкъ этти;
йигитлеримни йыкъмакъ ичюн,
манъа къаршы чокъ адамны топлады;
юзюмни баскъаны киби,
Рабби Ехуда къызыны таптады.
Айин 16 ^lБунынъ ичюн агълайым,
козьяшларымны тёкем;
мени джанландыраджакъ бири,
меним гонъюль алыджым узакъ;
балаларым ольдюрилелер,
душманларым енъелер.
Пе 17 ^mСион къолларыны узата,
амма гонълюни аладжакъ ёкъ.
РАББИ буюрды,
ве душманлар Якъупны алкъагъа алды;
Ерусалим араларында арам олды.

Саде 18 ⁿРАББИ адалетлидир,
мен сёзюне бойсунмадым.
Эй, бутюн халкълар! Динъленъиз,
меним азапларыма бакъынъыз;
къызларымнен
огъланларым эсирликке кетелер.
Коф 19 ^oДостларымны чагъырам,
амма олар мени алдатты;
руханийлеримнен акъсакъалларым
шеэрлерде гъайып олалар,
джанларыны къуртармакъ ичюн
аш къыдыралар.
Реш 20 ^pБакъ, я РАББИ,
мен ярамайым;
ичим-багърым тарсыкъа,
юрегим яна;
инатлыкънен Санъа къаршы чыкътым,
шимди исе тышарыда къылыч балаларны кесе,
эвимде олюм мени беклей.
Шин 21Ич чеккенимни эшиттилер,
амма гонъюль алыджым ёкъ;
эписи душманларым белягъа огърагъанымны
эшиттилер,
буны манъа Сен япкъанынъа
къувандылар.
Сен эвельден айткъан кунь кельди,
олар да мен киби олгъайды!
Тав 22 ^qЯманлыкъларынынъ эписини корь;
акъсыз япкъанларым ичюн
манъа бутюн эткенлеринъни оларгъа да яп.
Инъильтилерим артыкъ агъыр,
юрегим де такъаттан кесиле.