‏ Lamentations 2

Ерусалимнинъ джезасы акъкъында

Алеф 1 ^aРабби гъазабында Сион къызыны
къара булутларнен къаплады;
Исраильнинъ дюльберлигини
коклерден ерге ташлады;
ачувлангъан куню аякълары тургъан ерни
акъылына биле кетирмеди!
Беит 2 ^bРабби Якъупнынъ яшагъан ерини
гъайып этти, аджымады;
гъазапнен Ехуда къызынынъ
къавий къалелерини йыкъты;
падишалыкъларнен башлыкъларыны да
ерге урды, арам этти.
Гимел 3 ^cКъызгъын гъазабында
Исраильнинъ бутюн кучьлю адамларыны къырды;
душманларындан къорчаламакътан вазгечти,
орталыкъны якъып йыкъкъан атеш киби,
Якъупнынъ ичинде алевленип янды.
Далет 4 ^dДушман киби, яйыны керди,
залым киби, къолуны котерди;
козьге корюнген энъ яхшы шейлерни ёкъ этти,
Сион къызынынъ Чадырына
атеш киби, гъазабыны ёллады.
Хе 5Рабби душман киби олды,
Исраильни ёкъ этти;
эписи сарайларыны харап этти,
къалелерини йыкъып ташлады;
Ехуда къызыны
такъмакъ ве агълавгъа толдурды!
Вав 6Багъчаны киби, яшагъан ерини йыкъты,
топлашув ерини къырды;
РАББИ байрамларны ве раатлыкъ куньлерини
Сионда унуттырды;
гъазабы къайнагъанда,
падишанен руханийге де нефретнен бакъты.
Зайин 7Рабби къурбан ерини ред этти,
Мукъаддес Еринден вазгечти;
къавийлештирильген сарайларынынъ диварларыны
душманларынынъ къолуна берди;
РАББИнинъ Эвинде олар байрам куню дайын
шамата эттилер.
Хет 8РАББИ Сион къызынынъ диварыны йыкъмагъа къарар этти;
ольчю йипини тартты,
йыкъмакътан къол чекмеди;
къавийлештирильген диварларыны чытырдатты,
олар бирликте кучьсюз олды.
Тет 9 ^eАраба къапулары ерге тюшти,
Рабби мандалларыны йыкъып, къырып ташлады!
Шеэрнинъ падишасынен башлыкълары
башкъа халкъларгъа сюргюнликке кетти;
Къанун ёкъ олды,
пейгъамберлер де РАББИден хаберлерни алмай.
Ёд 10 ^fСион къызынынъ акъсакъаллары ер устюнде
индемезден отуралар;
башларына топракъ септи,
устьлерине чувал токъумаларыны кийдилер;
Ерусалим къызлары да
бетлеринен ерге йыкъылдылар.
Каф 11Козьлерим агъламакътан кёр олды,
ичим-багърым къайнай,
халкъымнынъ къызы гъайып олгъаны ичюн,
юрегим яна;
балаларнен сабийлер
шеэр сокъакъларында ачлыкътан эслерини джоялар.
Ламет 12 ^g«Ашлыкънен шарап къайда?»
– деп сорайлар аналарындан;
шеэр сокъакъларында
яралылар киби яталар,
аналарынынъ багърында
сонъки нефес алалар.
Мим 13Эй, Ерусалим къызы! Санъа не айтайым?
Сени неге ошатайым?
Эй, Сион къызы! Сени неге бенъзетейим?
Гонълюнъни насыл этип алайым?
Яранъ денъиз къадар балабандыр,
сени ким яхшы этип олур?
Нун 14 ^hПейгъамберлеринъ санъа
ялан ве бош хабер эттилер;
къабаатларынъны косьтермедилер,
сюргюнликтен къорчаламадылар;
санъа бош яланлар айтып,
сени ёлдан урдылар.
Самек 15 ⁱЕрусалим къызы акъкъында
ёлдан кечкен эр кес эль чырпып, устьлеринден кулип,
сызгъыраджакъ, баш саллайджакъ ве:
«Энъ дюльбер айтылгъан,
бутюн ернинъ къуванчы сайылгъан шеэр бумы?»
– деп сорайджакълар.
Пе 16 ^jДушманларынъ эписи агъызларыны керип,
сени мыскъыллайлар;
сызгъыралар,
тишлерини гъыджырдаталар;
«Биз оны ёкъ эттик!
Тек бу кунни беклей эдик, энди корьдик!» – дейлер.
Айин 17 ^kРАББИ ниетини беджерди,
къадимий куньлерде айткъан Сёзюни ерине кетирди;
аджымаздан, ерге урды,
душманларынъа сенинъ алынъа къуванмагъа,
сени чекиштиргенлерге енъмеге ёл ачты.
Саде 18 ^lЭй, Сион къызынынъ диварлары,
Раббиге юректен ялварынъыз;
дерья киби,
гедже-куньдюз козьяш тёкюнъиз;
раатлыкъ бильменъиз,
козьлеринъ козьяштан къурумасын.
Коф 19 ^mКъаранлыкъта турып,
токътамайып, геджелери къычыр;
Раббининъ огюнде
юрегинъни бошат;
къолларынъны Онъа узат,
эр сокъакъ башында ачлыкътан ольген
балаларынънынъ джанлары ичюн ялвар.
Реш 20 ⁿЯ РАББИ, бакъ да корь!
Кимге бойле яптынъ?
Къадынлар озь балаларыны,
эмиздирген бебейлерини ашайлар;
Раббининъ Мукъаддес Еринде
душманлар руханийлернен пейгъамберлерни ольдюрелер.
Шин 21Балалар ве къартлар сокъакъларда,
ерде ята;
къызларымнен огъулларым
къылычнен ольдюрильди;
гъазаплангъан кунюнъде оларны ольдюрдинъ,
оларны аджымаздан сойдынъ.
Тав 22Байрам кунюне адамларны киби,
манъа эр тарафтан къоркъуларымны чагъырдынъ;
РАББИ ачувлангъан куню
ич кимсе къачып къуртуламады, сагъ къалмады;
беслеп осьтюрген балаларымны
душманларым ёкъ этти.