‏ Lamentations 3

Йирмеянынъ къасевети

Алеф 1 ^aМен – къасевет корьген адамым,
РАББИ гъазапнен мени урды.
2 ^bО мени къувды,
ярыкъкъа дегиль, къаранлыкъкъа алып кетти;
3манъа чевирилип,
бутюн кунь къолуны менден алмай.
Беит 4 ^cТенимнен теримни ёкъ этти,
кемиклеримни къырды;
5 ^dмени алкъагъа алды,
чевре-четиме аджджы беля къойды;
6 ^eчокътан ольген адамны киби,
мени къаранлыкъ ерде ерлештирди.
Гимел 7Чевре-четиме дивар къойды,
чыкъып оламайым,
агъыр зынджырнен багълады;
8 ^fмен къычырып, ярдымгъа чагъыргъанда,
дуваларымны къабул этмеди;
9 ^gёлларымны ташларнен къапатты,
туткъан ёлларымны къыйыш япты.
Далет 10 ^hО, сакъланып беклеген аюв киби,
гизли ерде отургъан арслан киби олды;
11меним ёлумны къапатты,
мени парчалады, ярдымсыз къалдырды;
12 ⁱяйыны чекти,
окълары ичюн мени нишан этип къойды.
Хе 13 ^jОкълугъындан окъларыны алып,
бюйреклериме атты;
14 ^kбутюн халкъ огюнде масхара олдым,
мени эр кунь йырларнен мыскъыллайлар.
15 ^lРабби манъа аджджы отьлер ашатты,
зафра ичирди.
Вав 16Тишлеримни ташларнен къырды,
мени ерге таптады,
17джанымнынъ раатлыгъы гъайып олды,
аманлыкъ не олгъаныны унуттым.
18«Кучюм битти,
РАББИге олгъан умютим кесильди», – дедим.
Зайин 19Чеккен азабымны ве раатсызлыгъымны,
зафра киби аджджы алымны акъылынъда тут.
20Буны акъылыма кетиргенимде,
джаным сыкъыла.
21Юрегиме джевап берип,
бунъа умют этем:
Хет 22«РАББИнинъ буюк севгиси битмеди,
Онынъ мерамети гъайып олмады;
23 ^mолар эр саба янъыдан келелер;
Сенинъ ишанчлыгъынъ буюктир!»
24 ⁿ«РАББИ – меним къысметим, – дей джаным.
– Онынъ ичюн Онъа ишанаджагъым!»
Тет 25РАББИге ишангъанларгъа,
Оны къыдыргъан джангъа О, яхшылыкънен бакъа.
26РАББИден сабырнен къуртулыш беклемек –
яхшыдыр!
27Яшлыкътан сабыр этмеге огренген адамгъа
яхшы олур!
Ёд 28 ^oРабби адамны тербиелегенде,
о, индемейип, бир озю къалсын;
29бетинен ерге тюшип:
«Бельки, умютим кесильмеди», – деп тюшюнсин;
30 ^pоны ургъанларгъа янагъыны чевирсин,
айыпкъа толсун.
Каф 31 ^qРабби эр вакъыт юзь чевирмез;
32 ^rбеля ёлласа да,
буюк севгисинен мерамет де эйлер.
33Инсан огъулларыны джезаламагъа,
оларгъа дерт бермеге севмей.
Ламет 34Ер юзюнде бутюн къапатылгъанларны
аякъларнен таптагъанларда,
35Юдже Алланынъ огюнде
адамны адалетсиз суд эткенлерде,
36адамнынъ давасыны янълыш чезгенлерде,
Рабби буны корьмезми, аджеба?!
Мим 37 ^sРабби буюрмаса,
адам бир шей айтып, беджерирми?
38 ^tЯманлыкъ да, яхшылыкъ да
Юдже Алланынъ эмиринден олгъанда,
39яшагъанлар не ичюн агъланалар?
Эр кес озь гуналары ичюн агълансын!
Нун 40Туткъан ёлларымызны сынап огренейик
ве РАББИге къайтайыкъ;
41 ^uкоклердеки Аллагъа юреклеримизни чевирейик,
Онъа къолларымызны котерейик;
42 ^v«Биз Санъа къаршы чыкътыкъ, инатландыкъ,
ве Сен бизни багъышламадынъ», – айтайыкъ.
Самек 43Ачувланып, бизни къувалайсынъ,
аджымайып, ольдюресинъ;
44дуваларымыз Санъа етмесин деп,
булутларнынъ артында сакъланасынъ;
45халкълар арасында
чёплюк ве ташлантылар олдыкъ.
Пе 46 ^wБутюн душманларымыз
бизге къаршы агъызларыны ачтылар;
47 ^xкъоркъугъа ве чукъурларгъа тюштик,
беля-къазагъа огърадыкъ;
48 ^yхалкъым гъайып олгъаны ичюн
козьяшларым дерья киби акъа.
Айин 49 ^zКозьяшларым токътамаздан акъа,
эр вакъыт агълайым;
50РАББИ коклерден бакъып, корьмегендже,
токътатмайджагъым;
51шеэримнинъ бутюн къызларына бакъкъанда,
юрегим яна.
Саде 52 ^aaБир тюрлю себеп олмайып,
душманларым мени, бир къуш киби, авлайлар;
53 ^abмени сагъ алымда чукъургъа ташладылар,
устюме таш аттылар;
54 ^acсувлар башыма къадар котерильди,
«Гъайып олдым», – деп тюшюндим.
Коф 55 ^adЯ РАББИ, терен чукъурдан
Сени Адынънен чагъырдым.
56Сен сесимни эшиттинъ,
«Къулагъынъны къапатма, къуртар, ярдым эт манъа», – дедим.
57Сени чагъыргъанымда, якъынлаштынъ,
ве: «Къоркъма!» – дединъ.
Реш 58 ^aeРабби, Сен меним ишимни чездинъ,
джанымны сатын алып, къуртардынъ.
59Я РАББИ, чекишкенимни корьдинъ,
давамны адалетли суд эт.
60 ^afОларнынъ бутюн ачувларыны,
манъа къаршы къара ниетлерини корьдинъ.
Шин 61Я РАББИ, оларнынъ мыскъылларыны эшиттинъ,
манъа къаршы къара ниетлерини бильдинъ;
62душманларым мени яманлайлар,
эр кунь мени мыскъыллайлар;
63бакъ, отурсалар да, турсалар да,
эр вакъыт йырлап, мени кулелер.
Тав 64Джезала оларны, я РАББИ,
къоллары япкъанларына коре бер акъларыны;
65акъылларыны ал,
оларны къаргъа;
66ачувнен къувала,
ер юзюнден ёкъ эт оларны, я РАББИ!