‏ Leviticus 15

Арамлангъан адамлар акъкъында къанун

1РАББИ Мусагъа ве Харунгъа бойле деди:

2– Исраиль огъулларына бойле илян этинъиз:

Адамнынъ беденинден бир акъув олгъанда, озь акъувындан о адам арамдыр. 3Акъувы ичюн арамлыкъ акъкъында къанун будыр. Акъув акъа берсе де, акъып битсе де, адам энди арамдыр. 4Акъувы олгъан адамнынъ яткъан эр тюрлю тёшеги, отургъан эр бир ери арамдыр. 5 ^aКим онынъ яткъан ерине токъунса, озюни ве озь урбаларыны сувнен ювмакъ керек. Акъшамгъадже о, арам олур. 6Ким акъувы олгъан адамнынъ отургъан ерине отурса, озюни ве озь урбаларыны сувнен ювмакъ керек. Акъшамгъадже о, арам олур. 7Ким акъувы олгъан адамнынъ тенине токъунса, озюни ве озь урбаларыны сувнен ювмакъ керек. Акъшамгъадже о, арам олур. 8Акъувы олгъан адам темиз адамгъа тюкюрсе, шу адам озюни ве озь урбаларыны сувнен ювмакъ керек. Акъшамгъадже о, арам олур. 9Акъувы олгъан адам отургъан эр араба акъшамгъадже арам олур. 10Ким онынъ отургъан бирде-бир шейге токъунса, акъшамгъадже арам олур. Ким буларнынъ бирде-бир шейини ташыса, о, озюни ве озь урбаларыны сувнен ювмакъ керек. Акъшамгъадже о, арам олур. 11Акъувы олгъан адам къолларыны ювмаздан биревге токъунса, о адам озюни ве озь урбаларыны сувнен ювмакъ керек. Акъшамгъадже о, арам олур. 12 ^bАкъувы олгъан адам бирде-бир балчыкъ бардакъкъа токъунса, оны парламакъ керек. Агъачтан япылгъан эр бир савутны сувнен ювмакъ керек.

13Акъувы олгъан адамнынъ акъувы кесильген сонъ, о темизленмек ичюн еди кунь беклесин. Сонъ о, урбаларыны ювсун. Озь беденини о, чокъракъ сувунен ювмакъ керек. Сонъ о, темиз олур. 14 ^cСекизинджи куню о, эки кийик гогерджинни я да эки гогерджин баласыны алсын, РАББИнинъ огюне, Корюшюв Чадырынынъ киришине кельсин ве оларны руханийге берсин. 15Руханий бирини гуна ичюн къурбан оларакъ, экинджисини исе бутюнлей якъыладжакъ къурбан оларакъ кетирсин. Бойле этип, руханий онынъ акъувы ичюн РАББИнинъ огюнде одеме этсин.

16 ^dБир акъайнынъ урлугъы акъкъанда, о, бутюн беденини сувнен ювсун. Акъшамгъадже о, арам олур. 17Урлукъ тийген эр бир урба я да териден япылгъан шей де ювулсын. Акъшамгъадже о, арам олур. 18Акъай къадыннен ятып, акъайда урлугъы акъкъанда, олар экиси де сувнен ювунсынлар. Акъшамгъадже олар арам олур.

19 ^eКъадыннынъ устю кирленгенде, онынъ беденинден къан акъкъанда, о, темизленмек ичюн, еди кунь беклесин. Онъа токъунгъан эр ким акъшамгъадже арам олур. 20Устю кирленген вакътында, темизленюв вакътында къадыннынъ эр яткъан, эм де эр отургъан ери арам олур. 21Ким къадыннынъ тёшегине токъунса, озюни ве озь урбаларыны сувнен ювмакъ керек. Акъшамгъадже о, арам олур. 22Ким къадыннынъ отургъан насылдыр шейине токъунса, озюни ве озь урбаларыны сувнен ювмакъ керек. Акъшамгъадже о, арам олур. 23Къадыннынъ яткъан тёшегине я да отургъан шейине токъунгъан эр кес акъшамгъадже арам олур. 24 ^fЭгер акъайы онен ятса, онынъ арамлыгъы акъайына кечеджек. О акъай еди кунь арам олур, ве о, ятаджакъ тёшек де арам олур.

25 ^gКъадыннынъ устю кирленген куньлеринден тыш вакъытта онынъ къан акъувы олгъанда, я да акъув адеттеки куньлеринден сонъ девам эткенде, устю кирленген куньлериндеки киби, бутюн акъув куньлеринде о, арам олур. 26Устю кирли олгъан вакътында киби, бутюн акъув вакътында о яткъан эр бир тёшек, эр бир отургъан шей арам олур. Бу, устю кирленген вакътында, темизленюв вакътында олгъан арамлыкъкъа ошай. 27Оларгъа токъунгъан эр ким арам олур. О озюни ве озь урбаларыны сувнен ювмакъ керек. Акъшамгъадже о, арам олур.

28Онынъ акъувы биткен сонъ, къадын еди кунь беклесин. Сонъ о, темиз олур. 29 ^hСекизинджи куню о, эки кийик гогерджинни я да эки гогерджин баласыны алсын ве оларны руханийге, Корюшюв Чадырынынъ киришине кетирсин. 30Руханий бирини гуна ичюн къурбан оларакъ, экинджисини исе бутюнлей якъыладжакъ къурбан оларакъ чалсын. Бойле этип, руханий онынъ акъувы ичюн РАББИнинъ огюнде одеме этсин.

31 ⁱБойле этип, Исраиль огъулларыны арамлыкътан къорчаланъыз. Ойле олмаса, оларнынъ арасында олгъан Мескенимни арамлайджакълар ве озь арамлыгъында оледжеклер.

32Будыр – адамны арам эткен акъув ве урлукънынъ акъувы акъкъында къанун, 33эм де темизленюв вакътында устю кирленген къадын, акъувлары олгъан акъай я да къадын, арам олгъан къадыннен яткъан акъай акъкъында къанундыр.