‏ Leviticus 18

Озь яшайышында азизлик акъкъында

1РАББИ Мусагъа бойле деди:

2– Исраиль халкъына бойле айт:

Мен – РАББИм, сизинъ Алланъыз. 3 ^aСизлер яшагъан Мысыр топрагъындаки адамларнынъ япкъанларыны япманъыз. Мен сизни алып кетеджек Ханаан топрагъындаки адамларнынъ япкъанларыны да япманъыз. Оларнынъ низамнамелерине коре яшаманъыз. 4Меним къарарларымны беджеринъиз, Меним низамнамелеримни тутунъыз ве оларгъа коре яшанъыз. Мен – РАББИм, сизинъ Алланъыз. 5 ^bМеним низамнамелеримни ве къарарларымны тутунъыз ве беджеринъиз. Оларны беджерген адам оларнынъ ярдымынен яшайджакъ. Мен – РАББИм.

6Ич кимсе озь сой-сопунен ятмагъа ниетленмесин. Мен – РАББИм.

7Ананънен ве бабанънен ятма. Ананънен ятма. О, сенинъ ананъдыр.

8 ^cБабанънынъ апайынен ятма. Бу – бабанънынъ аврет ерлерининъ ачылышыдыр.

9 ^dОзь татанънен, къызкъардашынънен, бабанънынъ къызынен я да ананънынъ къызынен ятма. Олар сенинъ къорантанъда я да башкъа къорантада догъгъан олса да, эп бир оларнен ятма.

10Огълунънынъ къызынен я да къызынънынъ къызынен ятма. Бу – сенинъ аврет ерлеринънинъ ачылышыдыр.

11Бабанъдан догъгъан, бабанънынъ апайынынъ къызынен ятма. О – сенинъ татанъ я да къызкъардашынъ. Онен ятма.

12Аланънен ятма. О – бабанънынъ догъмушыдыр.

13Тизенънен ятма. О – ананънынъ догъмушыдыр.

14Эмдженънен ятма ве онынъ апайына якъынлашма. О, сенинъ дудунъдыр.

15 ^eКелининънен ятма. О – огълунънынъ апайыдыр, онен ятма.

16 ^fДудунънен ятма. Бу – агъанънынъ аврет ерлерининъ ачылышыдыр.

17 ^gКъадыннен ве онынъ къызынен ятма. Огълунынъ къызынен ве къызынынъ къызынен ятмагъа ниетленме. Олар къадыннынъ якъын сойларыдыр. Бу – яманлыкътыр.

18 ^hКъадынгъа ве онынъ татасына бирден эвленме. Ёкъса олар бири-бирини куньлер. Сенинъ апайынъ сагъ олгъанда, онынъ татасынен я да къызкъардашынен ятма.

19 ⁱАпайынъ устю кирли олгъанда, онен ятмакъ ичюн якъынлашма.

20 ^jБашкъа адамнынъ апайынен ятма. Ёкъса сен урлугъынъны йиберип, арамланырсынъ.

21Эвлятларынъны атештен кечирип, Молек путуна берме ве бунынънен Алланънынъ Адыны яманлама. Мен – РАББИм.

22 ^kАпайнен яткъанынъ киби, акъайнен ятма. Бу, пистир.

23 ^lНасылдыр айваннен ятма. Ёкъса сен урлугъынъны йиберип, арамланырсынъ. Къадын да джынсий мунасебетте булунмакъ ичюн айваннынъ огюне турмасын. Бу, пистир.

24Бутюн айтылгъанларынен озюнъни арамламанъыз. Мен огюнъизден бутюн къувалайджакъ халкълар айны бу ишлернен озьлерини арамладылар. 25 ^mБутюн топракъ арам олды. Шунынъ ичюн Мен халкъларны бутюн яманлыкълары ичюн джезаларым, ве ер юзю онынъ устюнде яшагъанларны къусаджакъ.

26Сизлер исе, эм исраиллилерден олгъан, эм аранъызда яшагъан кельмешеклерден олгъан эр кес Меним низамнамелеримни ве къарарларымны беджеринъиз, бу пис ишлерни япманъыз. 27Бу топракъта сизден эвель яшагъан халкълар бутюн бу пис шейлерни япа эдилер, ве топракъ арам олды. 28Топракъ сизден эвель яшагъан халкъларны къускъаны киби, сиз топракъны арамлайджакъ вакъытта о, сизлерни де къусаджакъ.

29Бойле пис шейлерни япкъан адамларнынъ джанлары халкъ арасындан ёкъ этиледжеклер.

30Буюргъанларымны беджеринъиз ве сизден эвель олгъан адамларнынъ пис низамнамелерини тутманъыз, оларнынъ себебинден арам олманъыз. Мен – РАББИм, сизинъ Алланъыз.