Lev 24 | CrhCTB | STEP | РАББИ Мусагъа бойле деди:

‏ Leviticus 24

Къандиль акъкъында къарарнаме

1 РАББИ Мусагъа бойле деди:

2 ^a– Исраиль огъулларына эмир эт ки, олар санъа, орталыкъны ярыкълаткъан лампатлар даима якъылып турсун деп, келиде басылгъан темиз зейтюн ягъыны кетирсинлер. 3 Харун эр вакъыт акъшамдан сабагъадже лампатларны Корюшюв Чадырында, Шаатлыкъ Сандыгъыны сакълагъан перденинъ огюнде, РАББИнинъ огюнде къойсун. Сизинъ эписи несиллеринъизге бу – эбедий низамнамедир. 4 Олар эр вакъыт темиз къандиль устюнде, РАББИнинъ огюнде лампатларны къойсунлар.

Пителер акъкъында къарарнаме

5 Энъ яхшы богъдай унуны алып, он эки пите пишир. Эр питеде эки чанакъ ^{▼▼Эки чанакъ – къ. еуд. «(эфанынъ) он пайда эки пайы».} ун олсун. 6 ^cОларны алтышар-алтышар эки сырагъа РАББИнинъ огюне темиз стол устюне къой. 7 Эр бир сыра устюне темиз къокъулы май къой. Бу, эслетме оларакъ, пите янында олып, РАББИге атеште якъыладжакъ бахшыш олсун. 8 Исраиль огъуллары адындан пителерни эр вакъыт, эр раатлыкъ куню РАББИ огюне къоймакъ керек. Бу, эбедий васиеттир. 9 ^dПителер Харуннынъ ве онынъ огъулларынынъки олсун. Олар пителерни азиз ерде ашасынлар. РАББИнинъ бахшышларындан бу оларгъа улу азизликтир. Бу, эбедий низамнамедир.

Аллагъа къаршы куфюр сёзлер ичюн джеза

10 Бир исраилли къадыннынъ ве мысырлы акъайынынъ бир огълу бар эди. О, исраиллилернинъ ордусына келип, бир исраилли акъайнен къавгъа этти. 11 Исраилли къадыннынъ огълу РАББИнинъ Адыны яманлады ве куфюр сёзлерни айтты. Оны Мусагъа кетирдилер. Анасынынъ ады – Шеломит эди. О, Дан къабилесинден, Диврийнинъ къызы эди. 12 ^eОгъланны сакъчыларнынъ къолуна бердилер ве РАББИнинъ къарарыны бекледилер.

13 РАББИ Мусагъа бойле деди:

14 ^f– Куфюр лаф айткъан огъланны ордудан тыш чыкъар. Айткъанларыны эшиткен эр кес онынъ башына къолларыны къойсун да, бутюн джемаат оны ташнен урып ольдюрсин. 15 ^gИсраиль халкъына бойле айт:

Алласы акъкъында куфюр сёзлер айткъан эр бир адам озь гунасы ичюн джеза алсын. 16 ^hАлланынъ Адыны яманлагъан адам мытлакъа ольдюрильсин. Бутюн джемаат оны ташнен урып ольдюрсин. Кельмешекми, исраиллими РАББИнинъ Адыны яманласа, ольдюрильсин.

17 ⁱБашкъа адамны ольдюрген адам мытлакъа ольдюрильсин. 18 ^jБир айванны ольдюрген адам шу айваннынъ ерине бир айван берип одесин. 19 ^kКим башкъа адамны яраласа, озюне де айны шей япылсын. 20 Къырыкъ ичюн къырыкъ, козь ичюн козь, тиш ичюн тиш къаршылыкъ олсун. Бир адам башкъасыны насыл яраласа, оны да айны яраласынлар. 21 Бир айванны ольдюрген адам айваннынъ акъкъыны тёлесин. Башкъа адамны ольдюрген адам исе ольдюрильсин. 22 ^lЭм кельмешекни, эм исраиллини айны бойле суд этинъиз. Мен – РАББИм, сизинъ Алланъыз.

23 Муса буларны Исраиль огъулларына бильдиргенинден сонъ, куфюр сёзлерни айткъан адамны ордудан тыш чыкъардылар ве ташларнен урып ольдюрдилер. РАББИ Мусагъа насыл буюргъан олса, Исраиль огъуллары ойле де яптылар.