Mar 1 | CrhCTB | STEP

‏ Mark 1

Ягъя Алланынъ Сёзюни анълата

1 – 2 ^a‌ ^bАлланынъ Огълу Иса Месих акъкъында Къуванчлы Хабернинъ башланувы.

Ешая пейгъамбер китабында Алланынъ бойле сёзлери язылгъан: Мына, Мен Сенинъ огюнъден хаберджимни ёллайым.
О, сенден эвель барып, Сенинъ ёлунъны азырлайджакъ.
3 ^cСахрада онынъ сеси янъгъырайджакъ:
– Раббининъ ёлуны азырланъыз,
кечеджек ерлерини тюм-тюз этинъиз!

4 ^dБойлеликнен, сахрада Ягъя пейда олып, адамларны сувгъа батырып чыкъара башлады. Адамларны гуналарынынъ багъышланмасы ичюн тёвбе этип, сувгъа батырылып чыкъмагъа давет эте эди.

5 ^eАдамлар Ягъягъа бутюн Еудие мемлекетинден ве Ерусалим шеэринден келе эдилер ве озь гуналарыны айта эдилер. Ягъя кельгенлерни Иордан озенининъ сувуна батырып чыкъара эди.

6 ^fЯгъя деве юнюнден орюльген урба, белинде мешин къушакъ такъып юре эди. Ашагъан ашы – чегертки ве кийик бал эди. 7 О, шойле хитап этип айта эди:

– Меним пешимден менден Къудретлиси келеята. Мен эгилип, Онынъ аякъкъапларынынъ багъыны чезмеге биле ляйыкъ дегилим. 8 ^gМен сизлерни сувгъа батырып темизлейим, О исе, сизлерни Мукъаддес Рухнен темизлейджек.

Исанынъ сувгъа батырылып чыкъувы ве сынавы

9 ^h‌ ⁱО куньлерде Галилеянынъ Назарет шеэринден Иса келип чыкъты. Ягъя Оны Иордан озенине батырып чыкъарды. 10 ^jИса сувдан чыкъкъанда, кок ярылды да, О, Алланынъ Рухуны корьди. Рух Исагъа гогерджин киби эне эди.

11 ^kКоклерден:

– Сен Меним севимли Огълумсынъ, Сенден пек мемнюним, – деген бир сес эшитильди.

12 ^lШу ань Рух Исаны сахрагъа алып барды. 13 ^mАнда къыркъ кунь девамында Шейтан Оны сынавгъа огърата эди. Иса кийик айванлар арасында яшай эди; Онъа мелеклер хызмет эте эдилер.

Иса Галилея балыкъчыларыны чагъыра

14 ⁿ‌ ^oЯгъя зиндангъа тюшкен сонъ, Иса Галилеягъа кельди, Алладан Къуванчлы Хаберни даркъатып юре башлады.

15 ^p– Вакъты-саати кельди! Алланынъ Падишалыгъы якъынлашты! Тёвбе этинъиз, Къуванчлы Хаберге инанынъыз! – дей эди Иса.

16 ^q‌ ^rГалилея голю боюндан кечеяткъанда, Иса Симонны ве къардашы Андрейни корьди. Олар балыкъчы олып, балыкъ сачмаларыны гольге атмакъта эдилер. 17 ^sИса оларгъа:

– Меним артымдан юрюнъиз. Шимди сиз балыкъ дегиль де, инсан тутаджакъсынъыз, – деди.

18 ^tАгъа-къардашлар аман сачмаларыны ташлап, Исанынъ пешинден кеттилер. 19 Бираз юрген сонъ, Иса Зебедайнынъ огълу Якъупны ве онынъ къардашы Юханны корьди. Олар къайыкъ ичинде отурып, балыкъ сачмаларыны тюзетмекте эдилер. 20 Иса агъа-къардашны чагъырды, ве олар бабалары Зебедайны ыргъатларнен берабер къайыкъта къалдырып, Онынъ пешинден кеттилер.

Джин ургъан адам

21 ^u‌ ^vОлар Къафарнаум шеэрине кельген сонъ, биринджи раатлыкъ куню Иса синагогагъа кирип, адамларны огретип башлады. 22 ^wОнынъ айткъан сёзлерини эшиткенлер эписи шашып къалдылар. О, Къанун оджалары киби дегиль, буюк къудрет берильген адам киби огрете эди. 23 Шу арада синагогагъа джин ургъан бир адам кирди.

24 ^x– Эй, назаретли Иса, Сен бизден не истейсинъ? Бизни гъайып этмек ичюн кельдинъми? Мен Сенинъ ким олгъанынъны билем! Сен Алланынъ Азизисинъ! – деп къычырды о.

25 Иса джинге шойле эмир этти:

– Сус да, бу адамдан чыкъ!

26 ^yДжин адамны сарсытып, къаба бир сеснен багъырып, онынъ ичинден чыкъты. 27 ^zБуны корьгенлер эписи шашып къалдылар. Бир-биринден:

– Бу насыл шей? – деп сорай эдилер. – Насылдыр бир яп-янъы огретюв… Онынъ къудрети о къадар буюк ки, О, арам рухларгъа эмир эте, олар исе Онъа бойсуналар.

28 Онынъ акъкъында хабер бутюн Галилея топракъларына тез-тез даркъалды.

Иса Пётрнынъ къайнанасыны ве джин ургъан адамларны тедавийлей

29 ^aaИса синагогадан чыкъар-чыкъмаз, Якъуп ве Юханнен берабер Симон ве Андрейнинъ эвине кирдилер. 30 ^abСимоннынъ къайнанасы юксек сыджакънен хаста ята эди. Шуны ашыкъып Исагъа айттылар. 31 ^acО, хастанынъ янына барып, оны къолундан тутып турсатты. Къадыннынъ сыджагъы шу дакъкъасы тюшти. О турып, оларгъа софраны донатты.

32 Акъшам олып, кунеш къонгъан сонъ, Исанынъ огюне бутюн хасталарны ве джин ургъанларны кетирдилер. 33 Бутюн шеэр эалиси оларнынъ къапусы огюнде топланды. 34 ^adИса чешит тюрлю хасталарны тедавийледи, чокъ шейтанларны къувып чыкъарды, амма оларгъа ич бир шей айтмагъа ясакъ этти. Олар исе Онынъ ким олгъаныны биле эдилер.

Иса Галилеяда Алланынъ Сёзюни анълата

35 ^ae‌ ^afСаба, танъ атмаздан эвель турып, Иса эвден чыкъты ве адам олмагъан бир ер тапып, дувалар окъуп башлады. 36 Симон аркъадашларынен берабер Исаны эр ерде къыдырып башладылар. 37 Оны тапып:

– Эписи Сени къыдыралар, – дедилер.

38 ^ag– Айдынъыз, башкъа ерлерге барайыкъ, – деди оларгъа Иса. – Къомшу къасабаларгъа барып, анда да Алланынъ Сёзюни анълатаджагъым. Мен шу макъсатнен ёлгъа чыкътым.

39 Бойледже, Иса оларнынъ синагогаларында Алланынъ Сёзюни анълатып ве шейтанларны къувып чыкъарып, бутюн Галилея топрагъыны айланып чыкъты.

Иса лепрагъа огърагъанны тедавийлей

40 ^ah‌ ^aiКуньлернинъ биринде Исагъа бир адам кельди. Онынъ бутюн тенини арам лепра хасталыгъы баскъан. О, Исанынъ янына барып, тиз чёкип ялварды:

– Эгер истесенъ, мени эляллап тедавийлерсинъ.

41 Иса оны аджыды, къолуны узатып хастагъа тийди де, шойле деди:

– Мен истейим, сени эляллап тедавийлейим.

42 ^ajШу дакъкъасы лепра хасталыгъы ёкъ олып, адам элял олды. 43 – 44 ^akИса оны сертликнен тенбиелеп:

– Сакъын, кимсеге бир шей айтма! Руханийге барып корюн де, тедавийленгенинъ ичюн Муса буюргъан шейни бер де, шу эписине шаатлыкъ олсун, – деди.

45 ^alАмма о адам кетип, озюнен олгъан вакъианы орталыкъкъа даркъатып башлады. Нетиджеде, Иса энди шеэр ичине ачыкъ кирип оламайып, адамсыз ерлерде къала эди. Лякин адамлар Онъа анда да эр ерден келе эдилер.