‏ Mark 13

Иса Алланынъ Сарайы бозуладжагъы акъкъында эвельден айта

1 ^aИса Алланынъ Сарайындан чыкъаяткъанда, шегиртлеринден бириси:

– Оджам, бакъ, не къадар дюльбер ташлар ве биналар! – деди.

2 ^bИса онъа джевап берип:

– Бу буюк биналарны коресинъми? Амма бу ерде таш устюнде таш къалмайджакъ, – деди.

Оладжакъ беля ве къувгъунлыкълар акъкъында

3 ^cИса Зейтюн дагъында, Алла Сарайынынъ къаршысында отургъан вакъытта Пётр, Якъуп, Юхан ве Андрей бир озьлери къалып, Ондан сорадылар:

4– Бизлерге айт, бу шейлер не вакъыт оладжакъ? Буларнынъ эписининъ биткенини насыл бельги бильдиреджек? – дедилер.

5 ^dИса лафыны бойле башлады:

– Ич кимсе сизлерни алдатмасын деп, сакът олунъыз! 6 ^eЧокъ адамлар Меним Адым иле келип: «Мен Месихим», – деп, чокъ адамларны алдатаджакълар.

7 ^fСиз якъын дженк шаматасыны ве узакъ дженк акъкъында хаберлерни эшитирсиз. Амма къоркъманъыз: ойле олмакъ керек. Лякин бу даа сонъу дегиль. 8 ^gХалкъ халкъкъа къаршы, падишалыкъ падишалыкъкъа къаршы котериледжек. Тюрлю топракъларда ер тепренювлери ве ачлыкълар оладжакъ. Лякин булар тек буюк азапларнынъ башланувыдыр. 9 ^hСизлер козь-къулакъ олунъыз. Сизни махкемеге береджеклер, синагогаларда котеклейджеклер. Мен ичюн сизни акимлер ве падишаларнынъ алдына турсатып, Мен акъкъымда шаатлыкъ яптыраджакълар. 10 ⁱБашта эписи халкълар Къуванчлы Хаберни эшитмек кереклер. 11 ^jСизни махкемеге берген вакъытта, не айтаджагъым экен, деп тюшюнменъиз. Шу саатте сизлерге не берильсе, оны айтынъыз. Анда сиз дегиль, Мукъаддес Рух джевап береджек. 12 ^kАгъасы – къардашыны, бабасы – баласыны олюм панджасына береджеклер. Балалар озь ана-бабаларына къаршы чыкъып, оларны ольдюреджеклер. 13 ^lМен ичюн эр кес сизлерден нефретленеджек. Лякин сонъунадже сабыр эткен адам къуртарыладжакъ.

Буюк беля

14 ^m‌ ⁿЭгер «пис арамлыкъ» ляйыкъ олмагъан ерде тургъаныны корьсенъиз (окъугъан адам озю анъласын!), Еудиеде олгъан адамлар дагъларгъа къачсынлар. 15 ^oДам устюнде тургъан адам ашагъа тюшип, бир шей алмакъ ичюн эвине кирмесин. 16Тарлада олгъан адам усть урбасыны алмагъа къайтып бармасын. 17 ^pО куньлерде юклю ве бала эмиздирген къадынларгъа беля оладжакъ! 18Къачувынъыз къышта олмасын деп, дувалар окъунъыз. 19 ^qШу куньлерде, Алла дюньяны яраткъан вакъыттан башлап бу куньлерге къадар олмагъан ве даа бир кере олмайджакъ буюк белялар оладжакъ. 20 ^rЭгер Рабби о куньлернинъ сайысыны азлаштырмагъан олса, ич бир джан къуртулып оламаз эди. Лякин О, сайлагъан адамларнынъ хатири ичюн, шу куньлерни азлаштырды. 21 ^sЭгер о вакъыт кимдир сизге: «Бакъынъыз, Месих мында!» я да: «О, анда!» – десе, инанманъыз. 22 ^tЯлан месихлер ве ялан пейгъамберлер пейда олып, имкяны олса, сайлангъанларны биле ёлдан урмакъ ичюн, аджайип шейлер япаджакълар ве бельгилер косьтереджеклер. 23 ^uСизлер исе сакът олунъыз. Мен буны сизлерге эвельден айтып берем.

Инсан Огълунынъ келюви акъкъында

24 ^v‌ ^wШу куньлерде, шу буюк мусибеттен сонъ «Кунеш къара оладжакъ,
ай да ярыкъ бермейджек.
25 ^xЙылдызлар коктен тюшеджеклер,
ве коклердеки кучьлер сарсыладжакълар».

26 ^yО вакъытта булутлар устюнде, буюк къудрет ве шан-шурет иле келеяткъан Инсан Огълуны кореджеклер. 27 ^zСонъ О, мелеклерни ёллап, дюньянынъ дёрт тарафындан, кокнинъ четинден ернинъ четинедже олгъан, Озю сайлагъан адамларыны топлайджакъ.

Инджир тереги акъкъында кинаели икяе

28 ^aaИнджир тереги сизге кинаели дерс олсун: онынъ пытагъы къабарып, япракълары ачылгъанда, яз якъынлашкъаныны билесиз. 29Сиз де, буларнынъ эписи мейдангъа кельгенини корсенъиз, билинъиз: О энди якъын, босагъада тура. 30 ^abСизлерге догърусыны айтам: шимдики несиль ёкъ олмаздан эвель, буларнынъ эписи оладжакъ. 31 ^acКок ве ер из къалдырмайып кечерлер, лякин Меним сёзлерим кечмез.

Кунь ве саат акъкъында кимсе бильмей

32 ^ad‌ ^aeБу къайсы куню ве саат къачта оладжагъы акъкъында не Огъул, не коктеки мелеклер билелер. Тек Баба биле.

33 ^afСакът олунъыз! Козь-къулакъ олып турунъыз, чюнки бу заман не вакъыт келеджегини бильмейсиз. 34 ^agБу бунъа ошай: бир адам, сеферге кетип, озь эвини къулларына къалдырып, эр бирине махсус вазифе бере. Къапу къаравулына исе козь-къулакъ олмакъны буюрып, ёлгъа чыкъа. 35 ^ahБунынъ ичюн эр заман азыр олунъыз. Эв саиби не вакъыт келеджегини – акъшаммы, яры геджедеми, хоразлар къычыргъандамы, я да саба эртеми – бильмейсиз. 36 ^aiО, апансыздан келип, сизлерни юкълап къалгъанынъызны тапмасын! 37Сизлерге не айткъан олсам, эписине де шуны айтам: козь-къулакъ олунъыз!